بۇ نۆۋەتلىك چېمپىيونلۇق مۇسابىقىسى بۇلغارىيەنىڭ پايتەختى سوفىيەدىكى ئاسىكس تەنتەربىيە زالىدا ئۆتكۈزۈلمەكتە. خەتىجە ئاقباش كۈندۈزدىكى مۇسابىقە باسقۇچىدا 51 كىلوگىراملىقلار بويىچە مەيدانغا چۈشتى.
دۇنيا ۋە ئولىمپىك تەنھەرىكەت مۇسابىقىلىرىدە مېدالغا ئېرىشكەن تۈركىيەلىك ماھىر خەتىجە ئاقباش ئەنگلىيەلىك رۇبى ۋايت بىلەن بولغان مۇسابىقىنىڭ بىرىنچى ئايلانمىسىدا مەغلۇپ بولغان بولسىمۇ، ئەمما ئىككىنچى ۋە ئۈچىنچى ئايلانمىلاردا غەلىبە قىلىپ، رەقىبىنى 2 گە قارشى 3 نەتىجە بىلەن يېڭىپ، يېرىم ھەل قىلغۇچ مۇسابىقىگە قاتنىشىش سالاھىيىتىگە ئېرىشتى.
خەتىجە ئاقباش يېرىم ھەل قىلغۇچ مۇسابىقىدە ئەتە پولشالىق ماھىر ناتالىيا كۇچېۋىسكا بىلەن جەڭگە چۈشىدۇ.
كەسپىي ھاياتىدا تۇنجى قېتىم 51 كىلوگىراملىقلار بويىچە مۇسابىقىگە قاتناشقان خەتىجە ئاقباش، بۇ غەلىبىسى ئارقىلىق مىس مېدالغا ئېرىشىشنى كاپالەتكە ئىگە قىلىش بىلەن بىرگە، ئۆزىنىڭ كەسپىي ھاياتىدىكى كەم بولۇۋاتقان ياۋروپا چېمپىيونلۇق مېدالىنى قولغا كەلتۈردى.
تۈركىيەلىك تەنھەرىكەتچى خەتىجە ئاقباشنىڭ كەسپىي ھاياتىدا بىر دانە ئولىمپىك كۈمۈش مېدالى، شۇنداقلا دۇنيا چېمپىيونلۇق مۇسابىقىلىرىدە قولغا كەلتۈرگەن بىر ئالتۇن ۋە بىر كۈمۈش مېدالى بار.
