قازاقىستان دۆلەت مۇداپىئە مىنىستىرلىقىنىڭ باياناتىدا بىلدۈرۈلۈشىچە، قازاقىستان دېڭىز ئارمىيەسىنىڭ كاسپىي دېڭىزى قىرغىقىدىكى مانېۋىرىدا تەلىم-تەربىيە ۋە جەڭ ۋەزىپىسى ئىجرا قىلىنىۋاتقان ۋاقىتتا، ھاۋا رايى تۇيۇقسىز بۇزۇلۇپ، شامال كۈچەيگەن. بۇنىڭ بىلەن 19 ئەسكەر دېڭىزغا چۈشۈپ كەتكەن.

باياناتتا قەيت قىلىنىشىچە، ۋەقەدە 9 ئەسكەر ھاياتىدىن ئايرىلغان، 3 ئەسكەر قۇتۇلدۇرۇلغان. يوقاپ كەتكەن 7 ئەسكەرنى ئىزدەپ قۇتقۇزۇش خىزمەتلىرىنىڭ داۋاملىشىۋاتقانلىقى ۋە ئالاقىدار ئورۇنلارنىڭ رايونغا ئەۋەتىلگەنلىكى بىلدۈرۈلدى. ۋەقەنىڭ بارلىق تەپسىلاتلىرىنى ئېنىقلاش شۇنداقلا ئىزدەپ-قۇتقۇزۇش خىزمەتلىرىگە ماسلىشىش مەقسىتىدە، دۆلەت مۇداپىئە مىنىستىرى داۋرېن كوسانوۋ نەق مەيدانغا يېتىپ بارغان.

يەنە بىر تەرەپتىن، قازاقىستان باش تەپتىش مەھكىمىسى مەزكۇر ۋەقەگە قارىتا تەكشۈرۈش باشلىغانلىقىنى ئېلان قىلدى. مەھكىمىنىڭ باياناتىدا، ۋەقەنى تەكشۈرۈش ئۈچۈن مەخسۇس گۇرۇپپا قۇرۇلغانلىقى؛ نەق مەيداندا ئىچكى ئىشلار مىنىستىرلىقى، جىددىي ئەھۋاللارغا تاقابىل تۇرۇش مىنىستىرلىقى ۋە تەپتىش خادىملىرىنىڭ خىزمەت ئىشلەۋاتقانلىقى قەيت قىلىندى. شۇنداقلا، زۆرۈر تەكشۈرۈشلەرنىڭ ئېلىپ بېرىلىۋاتقانلىقى ۋە ئەدلىيەلىك باھالىغۇچىلارنىڭ ۋەزىپىگە تەيىنلەنگەنلىكى ئىپادىلەندى.