خىتاي بىلەن ئىسپانىيە، خىتاي دۆلەت رەئىسى شى جىنپىڭنىڭ بېيجىڭدا ئىسپانىيە باش ۋەزىرى پېدرو سانچېز بىلەن ئۆتكۈزگەن سۆھبىتىدە، «پارچىلىنىۋاتقان» دەپ تەسۋىرلەنگەن خەلقئارا تەرتىپكە قارشى مۇناسىۋەتلەرنى چوڭقۇرلاشتۇرۇش، يەر شارى خاراكتېرلىك تىنچلىق ۋە تەرەققىياتنى قوغداشقا ۋەدە بەردى.
ئىسپانىيە باش ۋەزىرى سانچېزنىڭ بۇ زىيارىتى؛ نۇرغۇن غەرب ھۆكۈمەتلىرىنىڭ بىخەتەرلىك ۋە سودا جەھەتتىكى جىددىيلىكلەرگە قارىماي، بېيجىڭ بىلەن بولغان مۇناسىۋەتلىرىنى ساقلاپ قېلىشقا تىرىشىۋاتقان مەزگىلدە ئېلىپ بېرىلدى.
شى جىنپىڭ سەيشەنبە كۈنى بەرگەن باياناتىدا: «بۈگۈنكى دۇنيادا قالايمىقانچىلىق ھۆكۈم سۈرمەكتە ۋە خەلقئارا تەرتىپ ۋەيران بولماقتا»، دەپ كۆرسىتىپ، مۇناسىۋەتلەرنىڭ چوڭقۇرلىشىشىنىڭ ھەم خىتاي ھەم ئىسپانىيەنىڭ مەنپەئەتلىرىگە ئۇيغۇن ئىكەنلىكىنى سۆزلىرىگە ئىلاۋە قىلدى. شى جىنپىڭ «قانۇن بىلەن باشقۇرۇشنى قوغداش، ھەقىقىي كۆپ تەرەپلىمىلىكنى ئورتاق قوغداش ھەمدە يەر شارى خاراكتېرلىك تىنچلىق ۋە تەرەققىياتقا كاپالەتلىك قىلىش» ئۈچۈن تېخىمۇ كۈچلۈك ئالاقە ۋە ئىشەنچ تۇرغۇزۇشقا چاقىردى.
«خەلقئارا قانۇن دەپسەندە قىلىنماقتا»
سانچېز بولسا خەلقئارا قانۇننىڭ كۆپ قېتىم دەپسەندە قىلىنغانلىقىنى بىلدۈرۈپ، تىنچلىق ۋە گۈللىنىشنى ئىلگىرى سۈرۈش ئۈچۈن تېخىمۇ يېقىن مۇناسىۋەت ئورنىتىشقا چاقىردى. سانچېز: «خىتاي بىلەن ياۋروپا ئىتتىپاقى ئوتتۇرىسىدا ئىلگىرىكى ھەرقانداق ۋاقىتتىكىدىنمۇ كۈچلۈك ئالاقە ئورنىتىشىمىز بۈگۈنكى كۈندە تولىمۇ زۆرۈر»، دېدى.
بۇ يىل خىتاينى زىيارەت قىلغان ئەنگلىيە، كانادا، فىنلاندىيە ۋە ئىرېلاندىيە رەھبەرلىرىدىن كېيىن بېيجىڭغا زىيارەتكە بارغان سانچېز، دۇنيادىكى ئىككىنچى چوڭ ئىقتىسادىي گەۋدە بولغان خىتاينى خەلقئارا مەسىلىلەردە تېخىمۇ كۆپ رول ئويناشقا چاقىردى.
سانچېز دۈشەنبە كۈنى بەرگەن باياناتىدا؛ كىلىمات كىرىزىسىدىن خەۋپسىزلىككىچە، مۇداپىئەدىن ئادالەتسىزلىككە قارشى كۈرەشكىچە بولغان كەڭ دائىرىلىك مەسىلىلەر ھەققىدە توختالدى. ئامېرىكا قوشما ئىشتاتلىرى نۇرغۇن ساھەلەردىن چېكىنىش قارارى چىقارغان بىر مەزگىلدە، ياۋروپانىڭ تىرىشچانلىقىنى ئىككى ھەسسە ئاشۇرۇشى كېرەكلىكىنى تەكىتلىدى.
ئىستراتېگىيەلىك ھەمكارلىق ۋە سودا تەڭپۇڭلۇقى
ئىسپانىيە سودىنى كېڭەيتىش ۋە خىتاينى — ترامپ تەرىپىدىن كۆرۈلگەن ئىقتىسادىي ۋە گېئوسىياسىي رىقابەتچى چۈشەنچىسىنىڭ ئەكسىچە — ئىستراتېگىيەلىك بىر ئىتتىپاقداش سۈپىتىدە قاراش مەسىلىسىدە ياۋروپانىڭ ئەڭ كۈچلۈك تەشەببۇسچىلىرىدىن بىرى بولۇپ كەلدى.
بۇنىڭدىن ئىلگىرى سانچېز، ئۈچ كۈنلۈك بېيجىڭ زىيارىتىنى باشلىغاندا خىتاينىڭ ياۋروپا ئىتتىپاقى بىلەن بولغان سودا تەڭپۇڭسىزلىقىنى «داۋاملاشتۇرغىلى بولمايدىغان» ئەھۋال دەپ تەسۋىرلىگەن ئىدى. بۇ، سانچېزنىڭ يېقىنقى تۆت يىل ئىچىدە خىتايغا قىلغان تۆتىنچى قېتىملىق زىيارىتى ھېسابلىنىدۇ.
