ئامېرىكا پىرېزىدېنتى دونالد ترامپنىڭ غەززە ئۇرۇش توختىتىش پىلانى قورالسىزلاندۇرۇش ۋە قايتا قۇرۇشنى نىشان قىلغان ئىككىنچى باسقۇچقا قەدەم قويدى. ئامېرىكانىڭ بىر ئەمەلدارى ئەنقەرەنىڭ ئۇرۇش توختىتىشنى ئىشقا ئاشۇرۇشتا ناھايىتى مۇھىم رول ئوينىغانلىقىنى بىلدۈردى.
ئامېرىكانىڭ بىر ئەمەلدارى ئامېرىكا پىرېزىدېنتى دونالد ترامپنىڭ غەززە پىلانىنىڭ ئىككىنچى باسقۇچىغا ئۆتۈشى بىلەن تەڭ، تۈركىيەنىڭ غەززەدە ئۇرۇش توختىتىشنىڭ كاپالەتكە ئىگە قىلىنىشىدا ناھايىتى زور ئەھمىيەتكە ئىگە رول ئوينىغانلىقىنى ئېيتتى.
غەززە ھەققىدە مۇخبىرلارغا مەلۇمات بەرگەن ئامېرىكانىڭ ئىككى ئەمەلدارىدىن بىرى بولغان ۋە ئىسمىنىڭ ئاشكارىلىنىشىنى خالىمىغان ئامېرىكا ئەمەلدارى مۇنداق دېدى:
«پىرېزىدېنت ترامپ بۇنىڭ ئۈچۈن چىن دىلىدىن مىننەتدار.
جۇمھۇر رەئىس رەجەپ تاييىپ ئەردوغان، تاشقى ئىشلار مىنىستىرى خاقان فىدان ۋە مىللىي ئىستىخبارات ئىدارىسىنىڭ باشلىقى ئىبراھىم قالىننىڭ ھەممىسى بۇ مۇساپىگە قاتناشتى ۋە بىز بىلەن بىرلىكتە خىزمەت ئىشلەپ كۆرۈنەرلىك نەتىجىلەرنى قولغا كەلتۈردى. ئۇلارنىڭ بۇ باسقۇچقا قاتنىشىشى ناھايىتى زور ئەھمىيەتكە ئىگە.
ترامپ ھاكىمىيىتى تۈركىيە بىلەن ئىسرائىلىيە ئوتتۇرىسىدىكى مۇناسىۋەتنىڭ قايتىدىن ئەسلىگە كېلىشىنى كۆرۈشنى خالايددۇ. ۋاشىنگتون مۇشۇنداق بىر ئۆزگىرىشنىڭ مۇمكىنلىكىگە ئىشىنىدۇ.»
بۇ باياناتلار، ترامپنىڭ ئالاھىدە ۋەكىلى ستېۋ ۋىتكوفنىڭ غەززە ئۇرۇش توختىتىش پىلانىنىڭ ئىككىنچى باسقۇچقا قەدەم قويغانلىقىنى، بۇ باسقۇچتا قورالسىزلاندۇرۇش، باشقۇرۇش ۋە قايتا قۇرۇشقا ئەھمىيەت بېرىلىدىغانلىقىنى ئېلان قىلىشىدىن كېيىن بېرىلدى.
ۋىتكوف ئاممىۋى ئورتاقلىشىش تور بېتى X سەھىپىسىدە ئېلان قىلغان باياناتىدا مۇنداق دېدى:
«ئىككىنچى باسقۇچ، غەززەدە ۋاقىتلىق تېخنىك خادىملاردىن تەشكىل تاپقان پەلەستىن باشقۇرۇش ئاپپاراتى بولغان غەززە باشقۇرۇش دۆلەتلىك كومىتېتىنىڭ قۇرۇلۇشىنى، غەززەنىڭ تولۇق قورالسىزلاندۇرۇلىشىنى ۋە قايتا قۇرۇلۇشىنى، شۇنداقلا بارلىق ھوقۇق بېرىلمىگەن خادىملارنى قورالسىزلاندۇرۇشنىڭ باشلىنىشىنى نىشان قىلىدۇ.»
ۋىتكوف ئامېرىكانىڭ ھاماستىن كېلىشىم دائىرىسىدىكى مەجبۇرىيەتلىرىنى، جۈملىدىن «ھاياتىدىن ئايرىلغان ئەڭ ئاخىرقى تۇتقۇننىڭ مېيىتىنى دەرھال قايتۇرۇپ بېرىش» نى كۈتىدىغانلىقىنى ئەسكەرتىپ مۇنداق دېدى:
«بۇ مەجبۇرىيەتلەرنى ئادا قىلماسلىق ئېغىر ئاقىۋەتلەرنى كەلتۈرۈپ چىقىرىدۇ.»
ئامېرىكا ئەمەلدارلىرىدىن بىرى، ئىككىنچى باسقۇچنىڭ باشلىنىشىنىڭ بۇ مۇساپىدە ھالقىلىق بىر بۇرۇلۇش نۇقتىسى ئىكەنلىكىنى تەكىتلەپ مۇنداق دېدى:
«بۇ ھەقىقەتەن ناھايىتى زور ئەھمىيەتكە ئىگە، چۈنكى غەززەنى قايتا تەرەققىي قىلدۇرۇش ئۈچۈن ھەقىقەتەن ياخشى پىلانىمىز بار. كېيىنكى باسقۇچ پەلەستىن زېمىنى ئۈچۈن ناھايىتى چوڭ ئۆزگىرىش بولىدۇ.»
