ملادېنوۋ ب د ت خەۋپسىزلىك كېڭىشىگە سۇنغان دوكلاتىدا، بىرىنچى باسقۇچنىڭ يولغا قويۇلۇشى بىلەن مۇھىم ياخشىلىنىشلار قولغا كەلگەن بولسىمۇ، غەززەدىكى ۋەزىيەتنىڭ يەنىلا ئىنتايىن مۇرەككەپ ئىكەنلىكىنى تەكىتلىدى. ئۇ ئاساسلىق مۇلازىمەتلەرنىڭ ئۇرۇشتىن ئىلگىرىكى ئىقتىدارىدىن خېلىلا تۆۋەن سەۋىيەدە ئىشلەۋاتقانلىقىنى، سەھىيە سىستېمىسىنىڭ پۈتۈنلەي ۋەيران بولۇش خەۋپىگە دۇچ كەلگەنلىكىنى ۋە رايوندا نورمال ئىشلەۋاتقان بىر ئىقتىسادنىڭ قالمىغانلىقىنى قەيت قىلدى.
ئۈچ جىددىي مۇھىم ۋەزىپىنى خۇلاسىلىگەن ملادېنوۋ بىرىنچى مۇھىم ئىشنىڭ رەفاھ چېگرا ئېغىزىنىڭ ئوچۇق تۇرۇشى ۋە تېخىمۇ كۆپ كىشىنىڭ غەززەگە كىرىش-چىقىشىغا رۇخسەت قىلىنىشى ئىكەنلىكىنى ئەسكەرتتى. ئۇ چېگرا ئېغىزىنىڭ مەشغۇلاتىغا قارىتا قويۇلىدىغان ھەر قانداق چەكلىمىنىڭ ئۇرۇش توختىتىشنىڭ ئىككىنچى باسقۇچىنى يولغا قويۇشقا بىۋاسىتە توسالغۇ بولىدىغانلىقى ھەققىدە ئاگاھلاندۇردى.
ئىنسانپەرۋەرلىك ياردەم مەسىلىسىدە نۆۋەتتىكى ياردەم ئېقىمىنىڭ ئېھتىياج كۆلىمىگە يەتمەيدىغانلىقىنى بىلدۈرگەن ملادېنوۋ غەززەگە مال توشۇشىغا رۇخسەت قىلىنىدىغان يۈك ئاپتوموبىللىرى سانىنىڭ يېقىن كەلگۈسىدە كۆپەيتىلىشى كېرەكلىكىنى تەكىتلىدى. ئالاھىدە ۋەكىل تەمىنلەش لىنىيەسىنىڭ تەييار ئىكەنلىكىنى، ئەمما كىرىش-چىقىش يوللىرىنىڭ ياخشىلىنىشى كېرەكلىكىنى تىلغا ئېلىپ: «2 مىليوندىن ئارتۇق ئادەم غۇرۇرى دەپسەندە قىلىنىدىغان تۇرمۇش شارائىتىدا ياشاشقا تاقەت قىلىپ تۇرالمايدۇ» دېدى ۋە ۋاقىتلىق پاناھلىنىش لايىھەلىرىنى تېزلىتىشكە چاقىردى.
ياردەم بوشلۇقى داۋاملاشماقتا
«ھېچقانداق پىلان مۇكەممەل ئەمەس» دېگەن ملادېنوۋ ئۇرۇش توختىتىش كېلىشىمىنىڭ تولۇق ئىجرا قىلىنىشىنى تەلەپ قىلدى. ئۇ مەزكۇر كېلىشىمنىڭ قورالسىزلاندۇرۇش، قايتا قۇرۇش، مەمۇرىي باشقۇرۇشقا ئۆتۈش ۋە پەلەستىن ئورگانلىرىنىڭ قايتا بىرلىشىشىنى تەرتىپكە سالىدىغان بىردىنبىر ھۆججەت ئىكەنلىكىنى بىلدۈردى. ملادېنوۋ يەنە: «ئەگەر بىز ئىسرائىلىيەلىكلەر بىلەن پەلەستىنلىكلەر ئوتتۇرىسىدىكى تىنچلىقنى ئىلگىرى سۈرۈشتە سەمىمىي بولساق، بۇ پىلاننى يولغا قويۇشتىمۇ ئوخشاشلا سەمىمىي بولۇشىمىز كېرەك» دېدى.
ئامېرىكا قوشما ئىشتاتلىرىمۇ ئىنسانپەرۋەرلىك ياردەم تىرىشچانلىقلىرىنىڭ يېتەرلىك بولمايۋاتقانلىقىنى ئېتىراپ قىلدى. ئامېرىكا ئەلچىسى مايك ۋالتز ئوخشاش بىر يىغىندا تېخىمۇ كۆپ ئىشلەشكە توغرا كېلىدىغانلىقىنى، بېسىپ ئۆتۈشكە تېگىشلىك ئۇزۇن بىر مۇساپە بارلىقىنى بىلدۈردى. ئۇ ۋاشىنگتوننىڭ غەززەگە ۋە غەززە ئىچىدىكى ئىنسانپەرۋەرلىك ياردەملەرگە ئېرىشىشنى كۈچەيتىش ئۈچۈن، ب د ت دىكى شېرىكلىرى بىلەن ھەر كۈنى ئىشلەۋاتقانلىقىنى تىلغا ئالدى. تېخىمۇ كۆپ مەڭگۈلۈك تۇرالغۇ ۋە سەھىيە مۇلازىمىتىگە ئېھتىياج بارلىقىنى ئەسكەرتكەن ۋالتز ئۆتكەن ئايلاردا ھەپتىلىك 4000 دىن ئارتۇق ياردەم يۈك ئاپتوموبىلىنىڭ كىرگەنلىكىنى، ئەمما شۇنىڭدىن كېيىن بۇ ساننىڭ ئازىيىپ كەتكەنلىكىنى قەيت قىلدى.
