دىپلوماتىك مەنبەلەردىن ئىگىلەنگەن ئۇچۇرلارغا قارىغاندا، تۈركىيە جۇمھۇرىيىتى تاشقى ئىشلار مىنىستىرى خاقان فىدان رايوندا داۋاملىشىۋاتقان ئۇرۇشنىڭ جەريانى ۋە ئۇرۇشنى توختىتىش تىرىشچانلىقلىرىنى مۇزاكىرە قىلىش ئۈچۈن سۈرىيە، قاتار ۋە ئۆزبېكىستان تاشقى ئىشلار مىنىستىرلىرى بىلەن ئايرىم-ئايرىم تېلېفون سۆھبىتى ئېلىپ باردى.
تاشقى ئىشلار مىنىستىرلىقى مەنبەلىرىنىڭ بىلدۈرۈشىچە، خاقان فىدان سۈرىيە تاشقى ئىشلار مىنىستىرى ئەسەد ھەسەن ئەلشايبانى، قاتار باش مىنىستىرى ۋە تاشقى ئىشلار مىنىستىرى مۇھەممەد بىن ئابدۇرراھمان ئەل سانى ۋە ئۆزبېكىستان تاشقى ئىشلار مىنىستىرى بەختىيار سەيدوۋ بىلەن كۆرۈشتى.
سۆھبەتتە 28-فېۋرالدا ئامېرىكا ۋە ئىسرائىلىيەنىڭ ئىرانغا قاراتقان ئورتاق ھۇجۇمى بىلەن باشلانغان «رايونلۇق توقۇنۇشنىڭ جەريانى» ۋە «توقۇنۇشلارنى توختىتىش» قا قارىتىلغان داۋاملىشىۋاتقان تەشەببۇسلارغا ئاساسلىق دىققەت قىلىندى.
تېھران ئىسرائىلىيەدىن سىرت يەنە ئىيوردانىيە، ئىراق ۋە ئامېرىكا قوشما ئىشتاتلىرى ھەربىي كۈچلىرى تۇرۇشلۇق قولتۇق دۆلەتلىرىنى نىشان قىلغان ئۇچقۇچىسىز ئايروپىلان ۋە باشقۇرۇلىدىغان بومبا ھۇجۇملىرى بىلەن جاۋاب قايتۇرغان ئىدى. بۇ ئەھۋال ئادەم ئۆلۈش ۋە يارىلىنىش، ئۇل ئەسلىھە زىيانلىرىغا يول ئېچىش بىلەن بىرگە، يەر شارى بازارلىرى ۋە ئاۋىياتسىيە ساھەسىگىمۇ زەربە بەرگەن ئىدى.
مىنىستىر خاقان فىدان ئوتتۇرا شەرقتە داۋاملىشىۋاتقان ئۇرۇشنى ئاخىرلاشتۇرۇش ئۈچۈن قويۇق دىپلوماتىك تىرىشچانلىقىنى داۋاملاشتۇرماقتا. خاقان فىدان ئىران تاشقى ئىشلار مىنىستىرى ئابباس ئاراقچىدىن سىرت يەنە ئامېرىكا قوشما ئىشتاتلىرى ۋە ياۋروپا ئىتتىپاقى ئەمەلدارلىرىنى ئۆز ئىچىگە ئالغان رايوندىكى كەسپىيداشلىرى بىلەن نۇرغۇن قېتىم تېلېفون سۆھبىتى ئېلىپ باردى.
