پەلەستىن قۇددۇس ۋالىيلىقى دۈشەنبە كۈنى، ئىسرائىلىيەنىڭ ئىشغال ئاستىدىكى شەرقىي قۇددۇسنىڭ جەنۇبىدا تەخمىنەن 650 قورولۇق يېڭى بىر قانۇنسىز كۆچمەن رايونى قۇرۇشقا مۇناسىۋەتلىك پىلانلارنى ئىلگىرى سۈرگەنلىكىنى بىلدۈردى.
ۋالىيلىق ئېلان قىلغان باياناتىدا، ئىسرائىلىيە رايونلۇق پىلانلاش ۋە قۇرۇلۇش كومىتېتىنىڭ، پەلەستىنلىكلەرنىڭ ئۆيلىرىگە تۇتاش تەخمىنەن 2.7 گېكتارلىق بىر مەيداننى ئۆز ئىچىگە ئالىدىغان ۋە «Nofei Rachel» دەپ ئاتالغان كۆچۈش لايىھەسىگە مۇناسىۋەتلىك پىلاننى ئېلان قىلغانلىقىنى بىلدۈردى.
پىلاننىڭ كۆچمەنلەر رايونىنى كەڭەيتىپ ئەمەلىي ۋەزىيەتنى ئۆزگەرتىش بىلەن بىرگە، پەلەستىنلىكلەرنىڭ مەۋجۇتلۇقىنى ۋە شەھەر كېڭىيىشىنى چەكلەش مەقسەتلىك ئىسرائىلىيەنىڭ قانۇنسىز كۆچۈش سىياسەتلىرىنىڭ بىر پارچىسى ئىكەنلىكى ئەسكەرتىلدى.
بۇنىڭدىن باشقا دۈشەنبە كۈنى ئىسرائىلىيەلىك كىشىلىك ھوقۇق گۇرۇپپىسى «Ir Amim»، ئىسرائىلىيەنىڭ ئاخىرقى ھەپتىلەردە ئىشغال ئاستىدىكى شەرقىي قۇددۇستا ئومۇمىي سانى 3400 دىن ئارتۇق ئۆينى ئۆز ئىچىگە ئالغان ئۈچ چوڭ قانۇنسىز كۆچۈش رايونى قۇرۇش لايىھەسىنى ئىلگىرى سۈرگەنلىكى ئاشكارىلاندى.
ب د ت ۋە كۆپىنچە دۆلەتلەر ئىشغال ئاستىدىكى پەلەستىن تۇپراقلىرىدا قۇرۇلغان ئىسرائىلىيە كۆچمەنلىرى رايونلىرىنى خەلقئارالىق قانۇنلارغا بىنائەن پۈتۈنلەي قانۇنسىز دەپ قوبۇل قىلىدۇ. بۇ ئەھۋالنىڭ ئىككى دۆلەتلىك ھەل قىلىش چارىسىنىڭ ئېھتىماللىقىنى ئاجىزلاشتۇرىدىغانلىقىنى تەكىتلەيدۇ.
ئىسرائىلىيەلىك «Peace Now» ھەرىكىتى، ئىشغال ئاستىدىكى غەربىي قىرغاقتا تەخمىنەن 500 مىڭ قانۇنسىز ئىسرائىلىيەلىك كۆچمەن بارلىقىنى ۋە بۇلارغا ئىلاۋەتەن ئىشغال ئاستىدىكى شەرقىي قۇددۇستىكى قانۇنسىز كۆچمەنلەر رايونلىرىدا تەخمىنەن 250 مىڭ ئىسرائىلىيەلىكنىڭ قانۇنسىز ياشايدىغانلىقىنى مۆلچەرلىمەكتە.
