مۇھەممەد باقىر زۇلقەدر ئىستراتېگىيەلىك ئورۇنغا ئىگە ھۆرمۈز بوغۇزىنىڭ قاتناشقا ئېچىلىشى ئۈچۈن ۋاشىنگتون ھۆكۈمىتىنىڭ يۈرگۈزۈۋاتقان سىياسەتلىرىنى ئۆزگەرتىشى كېرەكلىكىنى بىلدۈرۈپ، ئامېرىكىغا ئالتە ماددىلىق شەرتلەر تىزىملىكىنى سۇندى.
شەنبە كۈنى ئېلان قىلغان باياناتىدا، ئاخىرقى ئالتە كۈندە دۆلەت مىقياسىدا ئۆتكۈزۈلگەن يىغىلىشلارنىڭ خەلقنىڭ قەتئىي ئىرادىسىنى ئەكس ئەتتۈرگەنلىكىنى تەكىتلىگەن زۇلقەدر، ئامېرىكا پوزىتسىيەسىنى ئۆزگەرتىپ، شەرتلەر ئورۇندالغانغا قەدەر بوغۇزنىڭ تاقاقلىق قېلىشنى داۋاملاشتۇرىدىغانلىقىنى ئىپادىلىدى.
ئىراننىڭ چىڭ تۇرۇۋاتقان ئالتە ئاساسىي تەلىپى تۆۋەندىكىلەرنى ئۆز ئىچىگە ئالىدۇ:
1 - تەھدىتلەرنىڭ ئاخىرلىشىشى: ئىراننىڭ دىنىي رەھبىرىگە قارىتىلغان تەھدىتلەرنىڭ ۋە دۈشمەنلەرچە سۆزلەرنىڭ دەرھال توختىتىلىشى.
2 - ھەربىي مەشغۇلاتلارنىڭ توختىتىلىشى: ئىرانغا ۋە رايوندىكى ئىتتىپاقداشلىرىغا قارىتىلغان ھەر قانداق ھەربىي ھەرىكەتنىڭ دائىمىي ئاساستا ئاخىرلاشتۇرۇلۇشى.
3 - ئامېرىكا كۈچلىرىنىڭ چېكىنىشى: ئىرانغا يۈرگۈزۈلۈۋاتقان قامالنىڭ ئارقىسىدىكى ئامېرىكا دېڭىز ۋە ھاۋا قىسىملىرىنىڭ رايوندىن چىقىپ كېتىشى.
4 - تولۇقلىما تۆلەپ بېرىلىشى: يېقىنقى دەۋردىكى توقۇنۇشلاردا ئىراننىڭ ئۇچرىغان زىيانلىرىنىڭ تۆلىنىشى.
5 - ئېمبارگولارنىڭ ئەمەلدىن قالدۇرۇلۇشى: ئىرانغا قارىتىلغان ئامېرىكا ئېمبارگولىرىنىڭ تولۇق ئەمەلدىن قالدۇرۇلۇشى.
6 - مۈلكلەرنىڭ قايتۇرۇپ بېرىلىشى: چەت ئەللەردە توڭلىتىپ قويۇلغان ئىران مۈلكلىرىنىڭ قويۇپ قويۇپ بېرىلىشى.
زۇلقەدر، دۆلەت بىخەتەرلىك ئالىي كېڭىشىنىڭ مەيلى ئۇرۇشتا ياكى سۆھبەت ئۈستىلىدە بولسۇن بۇ تەلەپلەردىن قەتئىي يانمايدىغانلىقىنى تەكىتلىدى.
بۇ ئەھۋاللار ھۆرمۈز بوغۇزىدىكى سودا قاتناشلىرىنىڭ كەلگۈسىگە مۇناسىۋەتلىك سۆھبەتلەرنىڭ تۇيۇق يولغا كىرىپ قالغان بىر دەۋرىگە توغرا كەلدى. بۇنىڭدىن ئىلگىرى پاكىستان ۋە قاتارنىڭ ۋاستىچىلىقىدا 18-ئىيۇندا ئىمزالانغان ئورتاق كېلىشىم بىلەن توقۇنۇشلار توختىتىلغان ۋە سودىنىڭ باسقۇچلار بويىچە قايتىدىن باشلىنىشى مۆلچەرلەنگەن ئىدى. ئەمما تەرەپلەرنىڭ بىر-بىرىنى كېلىشىم شەرتلىرىگە خىلاپلىق قىلىش بىلەن ئەيىبلىشى سەۋەبىدىن مۇساپە توختاپ قالغان ۋەزىيەتتە تۇرماقتا.
