تۈركىيە مىللىي ئىستىخبارات ئىدارىسى («MİT») باشلىقى ئىبراھىم قالىن لىۋىيە مەملىكەتلىك بىرلىك ھۆكۈمىتىنىڭ مۇداپىئە مىنىستىرى ۋەكىلى ئابدۇسالام زۇبى ھەمدە مەزكۇر ھۆكۈمەتنىڭ باش مىنىستىرى ئابدۇلھەمىد دىبەيبەنىڭ دۆلەت خەۋپسىزلىكى مەسلىھەتچىسى ئىبراھىم دىبەيبە بىلەن ئۇچراشتى.
خەۋپسىزلىك مەنبەلىرىدىن ئىگىلەنگەن ئۇچۇرلارغا قارىغاندا، مەزكۇر ئۇچرىشىش ئەنقەرەدە ئۆتكۈزۈلگەن.
بۇ قېتىملىق سۆھبەتتە، لىۋىيەنىڭ ئىچكى ۋەزىيىتى، رايون خەۋپسىزلىكى، تۈركىيە-لىۋىيە ھەمكارلىقىنى يەنىمۇ ئىلگىرى سۈرۈش ئۈچۈن تاشلىنىدىغان قەدەملەر، شۇنداقلا لىۋىيەدە مۇقىملىقنى ساقلاش يولىدا كۆرسىتىلىۋاتقان تىرىشچانلىقلار توغرىسىدا نۇقتىلىق پىكىر ئالماشتۇرۇلغان.
ئۇچرىشىش جەريانىدا، زۇبى بىلەن دىبەيبە تۈركىيەنىڭ لىۋىيەدە جارى قىلدۇرۇۋاتقان ئاكتىپ ۋە ئىجادىي رولىغا يۇقىرى باھا بېرىدىغانلىقىنى بىلدۈردى.
ئىبراھىم قالىن تۈركىيەنىڭ لىۋىيەنىڭ تىنچلىق ۋە مۇقىملىقنى ساقلاش خىزمەتلىرىنى كۈچلۈك قوللىشىنىڭ ئۈزلۈكسىز داۋاملىشىدىغانلىقىنى ئالاھىدە تەكىتلىدى.
مىللىي ئىستىخبارات ئىدارىسى باشلىقى يەنە، تۈركىيەنىڭ لىۋىيەدە دۆلەت بىرلىكىنى ئىشقا ئاشۇرۇش، شۇنداقلا شەرق ۋە غەربتىكى ھۆكۈمەتلەرنى «بىر لىۋىيە» كۈنلۈكى ئاستىدا بىرلەشتۈرۈش مۇساپىسىنى ئىزچىل قوللايدىغانلىقىنى شەرھلەپ ئۆتتى.
لىۋىيەدە تاشلىنىدىغان قوشۇمچە قەدەملەر مۇزاكىرە قىلىندى
شۇنىڭ بىلەن بىر ۋاقىتتا، ئىبراھىم قالىن ئەنقەرەدە لىۋىيە ئىچكى ئىشلار مىنىستىرى ئىماد ئەت-ترابلۇسى بىلەنمۇ ئايرىم كۆرۈشتى.
بۇ قېتىملىق ئۇچرىشىشتا، لىۋىيەدە خەۋپسىزلىك ۋە مۇقىملىقنى تېخىمۇ كۈچەيتىش ئۈچۈن تاشلىنىدىغان قوشۇمچە قەدەملەر ئەتراپلىق مۇزاكىرە قىلىندى.
ترابلۇسى سۆز ئارىسىدا، تۈركىيەنىڭ لىۋىيە مەملىكەتلىك بىرلىك ھۆكۈمىتىنى تەمىنلەۋاتقان ياردەملىرىدىن تولىمۇ مەمنۇن ئىكەنلىكىنى ئىزھار قىلدى.
بۇنىڭغا جاۋابەن قالىنمۇ لىۋىيەنىڭ خەۋپسىزلىكى ۋە تەرەققىياتىنى قوللاشلارنىڭ توختاپ قالمايدىغانلىقىنى؛ شۇنداقلا تۈركىيەنىڭ لىۋىيەنى ئۆز ئىچىگە ئالغان شىمالىي ئافرىقا رايونىدا تېررورلۇققا قارشى تۇرۇش، ئادەم ئەتكەسچىلىكى ۋە قانۇنسىز كۆچمەنلەر مەسىلىلىرىگە تاقابىل تۇرۇشتا يېقىندىن ھەمكارلىشىشنى ئىزچىل داۋاملاشتۇرىدىغانلىقىنى قەيت قىلدى.
