ھۇسىيلارنىڭ ھەربىي باياناتچىسى يەھيا سەرىئ، ھۇسىيلارغا قاراشلىق «ئەلمەسىرە» تېلېۋىزىيەسىدە مەخسۇس بايانات ئېلان قىلىپ مۇنداق دېدى: «قوراللىق كۈچلىرىمىز سەل ئىلگىرى سەئدە ۋىلايىتىنىڭ ھاۋا بوشلۇقىدا چارلاش قىلىۋاتقان بىر ئۇرۇش ئايروپىلانىنى قۇرۇقلۇقتىن ھاۋاغا قويۇپ بېرىلىدىغان باشقۇرۇلىدىغان بومبىسى ئارقىلىق نىشانغا ئالدى. بومبا ئايروپىلانغا بىۋاسىتە تېگىپ، ئۇنى چۈشۈپ كېتىش خەۋپىگە يۈزلەندۈردى».
باياناتچى سەرىئنىڭ سۆزىگە قارىغاندا، بۇ ئايروپىلان سەئۇدى ئەرەبىستان ھاۋا ئارمىيەسىنىڭ «Typhoon» تىپلىق ئۇرۇش ئايروپىلانى بولۇپ، ئۇ ئەسلىدە سەئۇدى ئەرەبىستاننىڭ غەربىي قىسمىغا جايلاشقان تايىف ھەربىي بازىسىدىن قوزغالغانىدىكەن. ھازىرغىچە سەئۇدى ئەرەبىستان تەرەپ بۇ ۋەقەگە قارىتا ھېچقانداق رەسمىي بايانات ئېلان قىلمىدى.
مۇشۇ ۋەقەگە ئۇلىشىپلا، «ئەلمەسىرە» تېلېۋىزىيەسى يەمەننىڭ پايتەختى سانانىڭ قەستەن ھاۋا ھۇجۇمىغا ئۇچرىغانلىقىنى خەۋەر قىلدى. بۇ ھۇجۇملارنىڭ كەلتۈرۈپ چىقارغان ئۆلۈم-يېتىم ۋە ۋەيرانچىلىق ئەھۋالى ھەققىدە ئېنىق مەلۇمات بېرىلمىدى.
يەمەندىكى توقۇنۇشلارنىڭ ئارقا كۆرۈنۈشى
يەمەندە 2014-يىلى سېنتەبىردە ھۇسىي قوراللىقلىرى پايتەخت سانا ۋە باشقا بىر قىسىم مۇھىم ۋىلايەتلەرنى ئۆز كونتروللۇقىغا ئالغاندىن بۇيان، مەملىكەت ئىچىدىكى قانلىق ئىچكى ئۇرۇش ئۈزلۈكسىز داۋام قىلىپ كەلمەكتە. ھۆكۈمەت كۈچلىرى بىلەن ھۇسىيلار ئوتتۇرىسىدىكى توختاۋسىز توقۇنۇشلار دۆلەتنى ئېغىر ئىنسانپەرۋەرلىك كىرىزىسىغا پاتتۇرۇپ قويغان بىر پەيتتە، سەئۇدى ئەرەبىستان يېتەكچىلىكىدىكى ئەرەب ئەللىرى ئىتتىپاقىمۇ 2015-يىلى مارتتىن باشلاپ خەلقئارا جەمئىيەت ئېتىراپ قىلغان قانۇنلۇق يەمەن ھۆكۈمىتىنى قوراللىق قوللاپ، ھۇسىيلارغا قارشى كۈرەش قىلىپ كەلمەكتە.
