ئامېرىكا كېلەر ھەپتە بىرلەشكەن دۆلەتلەر تەشكىلاتى (ب د ت) ئومۇمىي كېڭىشىدە سۆز قىلىشى مۆلچەرلەنگەن پەلەستىن دۆلەت رەئىسى مەھمۇد ئابباسنىڭ ۋىزا ئىلتىماسىنى رەت قىلدى.

«ئىسرائىلىيە ۋاقىت گېزىتى»نىڭ بىر ئامېرىكالىق ۋە بىر پەلەستىنلىك ئەمەلدارنى مەنبە قىلغان خەۋىرىگە قارىغاندا، ئابباس ئۇدا ئىككىنچى يىلى ب د ت ئومۇمىي كېڭىشىگە سىنلىق يىغىن ئارقىلىق خىتاب قىلىشقا مەجبۇر بولىدىكەن.

ئابباستىن باشقا، ب د ت ئومۇمىي كېڭىشىگە قاتنىشىش ئۈچۈن ئامېرىكاغا بېرىشى مۆلچەرلەنگەن پەلەستىنلىك ئەمەلدارلارنىڭ ۋىزا ئىلتىماسلىرىمۇ رەت قىلىنغان.

بىر پەلەستىنلىك ئەمەلدار ئۆزىگە ۋىزا بېرىلمەسلىكىگە «ھەر قانداق ۋاقىتتا تېررورلۇق پائالىيىتى بىلەن شۇغۇللانغان ياكى تېررورلۇق تەشكىلاتى بىلەن ئالاقىسى بولغان كىشىلەرگە ۋىزا بېرىشنى چەكلەيدىغان «212- ماددا (a)(3)(B)»نىڭ سەۋەب قىلىپ كۆرسىتىلگەنلىكىنى بىلدۈردى.

ئابباسنىڭ ۋىزا ئىلتىماسىنىڭمۇ ئوخشاش سەۋەب بىلەن رەت قىلىنغان ياكى قىلىنمىغانلىقى ھازىرچە نامەلۇم.

ئامېرىكا تاشقى ئىشلار مىنىستىرلىقى بايانات ئېلان قىلىپ، «ئىسلاھات ئېلىپ بارمىغانلىقى، ئامېرىكاغا بەرگەن ۋەدىلىرىگە خىلاپلىق قىلغانلىقى ۋە تىنچلىق ئۈمىدىگە بۇزغۇنچىلىق قىلىدىغان پائالىيەتلىرىنى داۋاملاشتۇرغانلىقى» سەۋەبىدىن پەلەستىن ھۆكۈمىتى ئەمەلدارلىرىغا ۋىزا بەرمەسلىكنى ئۆز ئىچىگە ئالغان جازا تەدبىرلىرىنىڭ ئۇزارتىلىدىغانلىقىنى بىلدۈردى.

بىراق باياناتتا مەھمۇد ئابباسقا ۋىزا بېرىلمىگەنلىكى توغرىسىدىكى خەۋەرلەر تىلغا ئېلىنمىدى.