پەلەستىن سەھىيە مەنبەلىرىنىڭ بىلدۈرۈشىچە، دۈشەنبە كۈنى ئىسرائىلىيە ئارمىيەسىنىڭ غەززەگە قىلغان ھۇجۇملىرىدا ئۈچ پەلەستىنلىك ھاياتىدىن ئايرىلغان، تۆت بالىنى ئۆز ئىچىگە ئالغان 30 دىن ئارتۇق كىشى يارىلانغان. غەززە شەھىرى، خان يۇنۇس ۋە مەركىزىي رايوندىكى ئەززۇۋەيدە يېزىسىنى نىشان قىلغان بۇ ھۇجۇملاردا، ئۆي-ماكانلىرىدىن ئايرىلىپ قالغان ئائىلىلەرنىڭ چېدىرلىرى، ئاممىۋى سورۇنلار ۋە بىر ئاپتوموبىل زەربىگە ئۇچرىغان.
غەززە شەھىرىنىڭ شىمالىدىكى ئەششىفا دوختۇرخانىسى مەنبەلىرى، ئىسرائىلىيەنىڭ ئۇچقۇچىسىز ھاۋا ئاپپاراتىنىڭ ئەسسافتاۋى مەھەللىسىدىكى بىر پۇقراۋى ئاپتوموبىلنى نىشان قىلغانلىقىنى، نەتىجىدە بىر پەلەستىنلىكنىڭ ھاياتىدىن ئايرىلىپ، بىرنەچچە كىشىنىڭ يارىلانغانلىقىنى بىلدۈردى. ئەششىفا دوختۇرخانىسى ئەتراپىدىكى ئۆيىنىڭ ئۆگزىسىگە تىكىلگەن چېدىرغا ئىسرائىلىيە ئۇچقۇچىسىز ھاۋا ئاپپاراتىنىڭ زەربە بېرىشى نەتىجىسىدە يارىلانغان 50 ياشلىق مۇھەممەد خادىر ئاججۇر ئىسىملىك پەلەستىنلىكمۇ دوختۇرخانىدا قۇتقۇزۇش ئۈنۈم بەرمەي ھاياتىدىن ئايرىلدى.
ئۇچقۇچىسىز ھاۋا ئاپپاراتلىرىنىڭ ھۇجۇملىرى غەززە شەھىرىنىڭ مەركىزىدىكى ئاھالىلەر زىچ ئولتۇراقلاشقان رايونغا تىكىلگەن چېدىرنىمۇ نىشان قىلغان بولۇپ، ھۇجۇمدا ئىككىسى ئېغىر ئون پەلەستىنلىك يارىلاندى. غەززەنىڭ جەنۇبىدىكى خان يۇنۇسنىڭ ئەلمەۋاسى رايونىدا، پەلەستىنلىك مۇساپىرلار پاناھلىنىۋاتقان چېدىرغا قىلىنغان ھۇجۇمدا بىر كىشى ھاياتىدىن ئايرىلدى، يەتتە كىشى يارىلاندى.
غەززە سەھىيە مىنىستىرلىقىنىڭ باياناتىغا قارىغاندا، ئىسرائىلىيەنىڭ ئۇرۇش توختىتىش كېلىشىمىنى داۋاملىق دەپسەندە قىلىشى سەۋەبىدىن، دۈشەنبە كۈنىگىچە ھاياتىدىن ئايرىلغان پەلەستىنلىكلەر سانى 1 مىڭ 372 گە، يارىلانغانلار سانى 4 مىڭ 659 غا يەتكەن. مىنىستىرلىق يەنە 2023-يىلى ئۆكتەبىردىن بۇيان ئىسرائىلىيەنىڭ غەززەدىكى ئىرقىي قىرغىنچىلىق ئۇرۇشىدا جەمئىي 73 مىڭدىن ئارتۇق پەلەستىنلىكنىڭ ھاياتىدىن ئايرىلغانلىقىنى، 174 مىڭدىن ئارتۇق كىشىنىڭ يارىلانغانلىقىنى ئۇقتۇردى.
