نىگېرىيە ئارمىيەسى يەكشەنبە كۈنى ئېلان قىلغان باياناتىدا، كادۇنا ئۆلكىسىنىڭ شىمالىي غەربىدىكى بىر چېركاۋغا قىلىنغان ھۇجۇمدا گۆرۈگە ئېلىنغان 31 پۇقرانى قۇتقۇزۇۋالغانلىقىنى، ۋەقە يۈز بەرگەن جايدىن بەش كىشىنىڭ جەسىتى تېپىلغانلىقىنى ئېلان قىلدى.
ئارمىيەنىڭ بىلدۈرۈشىچە، ھۇجۇم كاچىيا (Kachia) يەرلىك ھۆكۈمەت رايونىدىكى ئارىكو (Ariko) يېزىسىدا، پاسخا بايرىمى مۇراسىمى جەريانىدا يۈز بەرگەن. باياناتتا ھەربىي قىسىملارنىڭ ھۇجۇمچىلارنى قوغلاۋاتقانلىقى بىلدۈرۈلدى.
خىرىستىيانلار ئىتتىپاقى (CAN) كادۇنا ئۆلكىلىك رەئىسى كالېب مائاجى (Caleb Maaji) يەكشەنبە كۈنى ئارىكو يېزىسىدا ئىككى چېركاۋنىڭ ھۇجۇمغا ئۇچرىغانلىقىنى ئېيتتى. مائاجى يەتتە كىشىنىڭ ئۆلتۈرۈلگەنلىكىنى ۋە سانى ئېنىق بولمىغان نۇرغۇن كىشىنىڭ گۆرۈگە ئېلىنغانلىقىنى بىلدۈردى.
مائاجى رويتېرس ئاگېنتلىقىغا بايانات بېرىپ: «ئېنىقلاش خىزمەتلىرى يەنىلا داۋاملىشىۋاتىدۇ» دېدى.
نىگېرىيەنىڭ شىمالىي غەربى رايوندىكى كەڭ ئورمانلىقلاردا يوشۇرۇنغان قوراللىق گۇرۇپپىلارنىڭ تۆلەم تەلەپ قىلىش مەقسىتىدە ئېلىپ بارغان تۈركۈملەپ ئادەم قاچۇرۇش ۋە يېزا بېسىش ۋەقەلىرىنى ئۆز ئىچىگە ئالغان شۇنداقلا يىللاردىن بۇيان داۋاملىشىۋاتقان زوراۋانلىق پاتقىقىغا قارشى كۈرەش داۋاملاشماقتا.
