تۈركىيە جۇمھۇرىيىتى جۇمھۇر رەئىسى ئەردوغان تۈرك دۆلەتلىرى تەشكىلاتىنىڭ غەيرىي رەسمىي باشلىقلار يىغىنىغا قاتنىشىش ئۈچۈن يېتىپ بارغان قازاقىستاننىڭ تۈركىستان شەھرىدە ئۆزبېكىستان پىرېزىدېنتى مىرزىيويېۋ بىلەن كۆرۈشتى.
ئەردوغان چۈشكەن مېھمانخانىدا ئاخبارات ۋاسىتىلىرىغا يېپىق ھالەتتە ئىشقا ئاشۇرۇلغان ئۇچرىشىشقا تاشقى ئىشلار مىنىستىرى خاقان فىدانمۇ قاتناشتى.
جۇمھۇر رەئىسلىك مەھكىمىسى ئۇچۇر - ئالاقە ئىشلىرى ئىدارىسى ئۇچرىشىش ھەققىدە بايانات ئېلان قىلدى
تۈركىيە جۇمھۇرىيىتى جۇمھۇر رەئىسلىك مەھكىمىسى ئۇچۇر - ئالاقە ئىشلىرى ئىدارىسى جۇمھۇر رەئىس ئەردوغاننىڭ، قازاقىستاننىڭ تۈركىستان شەھرىدە ئۆتكۈزۈلگەن تۈرك دۆلەتلىرى تەشكىلاتىنىڭ غەيرىي رەسمىي باشلىقلار يىغىنى دائىرىسىدە ئۆزبېكىستان پىرېزىدېنتى مىرزىيويېۋ بىلەن كۆرۈشكەنلىكى توغرىسىدا بايانات ئېلان قىلدى.
باياناتتا مۇنداق دېيىلدى:
«ئۇچرىشىشتا، ئىككى رەھبەر، تۈركىيە-ئۆزبېكىستان مۇناسىۋەتلىرى، رايونلۇق ۋە خەلقئارالىق مەسىلىلەرنى مۇزاكىرە قىلدى. جۇمھۇر رەئىس ئەردوغان كۆرۈشۈشتە، تۈركىيە بىلەن ئۆزبېكىستان ئوتتۇرىسىدا دۆلەت مۇداپىئە سانائىتى ۋە سودىنى ئۆز ئىچىگە ئالغان ھەر ساھەدە ھەمكارلىقنى ئىلگىرى سۈرۈش ئۈچۈن داۋاملىق خىزمەت ئىشلەيدىغانلىقلىرىنى ئىپادىلىدى. جۇمھۇر رەئىسىمىز ئىككى دۆلەتنىڭ خەلقئارالىق مۇنبەرلەردىمۇ ھەمدەملىكىنى يەنىمۇ يۈكسەك سەۋىيەگە يەتكۈزىدىغانلىقىغا ئىشىنىدىغانلىقىنى بىلدۈردى، شۇنداقلا مىرزىيويېۋنى تۈركىيەدە ئۆتكۈزۈلىدىغان تۈرك دۆلەتلىرى تەشكىلاتى باشلىقلار يىغىنى ۋە بىرلەشكەن دۆلەتلەر تەشكىلاتى كىلىمات ئۆزگىرىشى رامكا ئەھدىنامىسىنى تۈزگۈچى تەرەپلەرنىڭ 31-قېتىملىق يىغىنىغا تەكلىپ قىلدى.»
