شىمالىي قىبرىس تۈرك جۇمھۇرىيىتىدە (ش ق ت ج) جۇمھۇر رەئىسلىك سايلىمىنىڭ تۇنجى ئايلانمىسى ئۈچۈن بېلەت تاشلاش جەريانى يەكشەنبە كۈنى ئەتىگەندە باشلاندى.
شىمالىي قىبرىس تۈرك جۇمھۇرىيىتى پۇقرالىرى، ئەتىگەن سائەت 8 دە باشلانغان بېلەت تاشلاشقا، پۈتۈن مەملىكەت مىقياسىدا قۇرۇلغان 777 بېلەت ساندۇقىدا كەچ سائەت 6 گىچە قاتنىشالايدۇ.
شىمالىي قىبرىس تۈرك جۇمھۇرىيىتىدە جەمئىي 218 مىڭ 313 تىزىملاتقان سايلىغۇچى بار.
ھازىرقى جۇمھۇر رەئىس ئەرسىن تاتار مۇستەقىل نامزات سۈپىتىدە مۇسابىقىگە قاتنىشىۋاتقان بولسا، ئاساسلىق ئۆكتىچى پارتىيە جۇمھۇرىيەتچى تۈرك پارتىيەسىنىڭ (CTP) رەھبىرى تۇفان ئەرخۇرمان پارتىيەسىنىڭ نامزاتى سۈپىتىدە سايلامغا قاتناشماقتا.
مەھمەت ھاسگۈلەر، ئارىف سالىھ قىرداغ، ئەھمەت بوران ۋە ئىبراھىم يازىجى مۇستەقىل نامزات سۈپىتىدە مۇسابىقىلىشىۋاتقان بولسا، ئوسمان زوربا قىبرىس سوتسىيالىستىك پارتىيەسىگە ۋەكىللىك قىلىدۇ.
سايلامغا قاتنىشىشى كۈتۈلگەن ۋە ئىسمى بېلەت تالونىدا يېزىلغان ھۈسەيىن گۈرلەك، شەنبە كۈنى بايانات ئېلان قىلىپ، نامزاتلىقتىن ۋاز كېچىپ، ئەرسىن تاتارنى قوللايدىغانلىقىنى ئېلان قىلدى.
تۇنجى ئايلانمىدا بېلەتنىڭ %50 تىن كۆپرەكىگە (مۇتلەق كۆپ سانلىق) ئېرىشكەن نامزات جۇمھۇر رەئىس بولۇپ سايلىنىدۇ.
ھېچقانداق نامزات مۇتلەق كۆپ سانلىققا ئېرىشەلمىسە، تۇنجى ئايلانمىدا ئەڭ كۆپ بېلەتكە ئېرىشكەن ئىككى نامزات، يەتتە كۈن ئىچىدە ئۆتكۈزۈلىدىغان ئىككىنچى ئايلانمىغا قاتنىشىدۇ.
ئىككىنچى ئايلانمىدا ئەڭ كۆپ بېلەتكە ئېرىشكەن نامزات جۇمھۇر رەئىس بولۇپ سايلىنىدۇ.
