ئىران تاشقى ئىشلار مىنىستىرى ئابباس ئاراقچى ئىسلامئابادقا يۈرۈپ كەتكەندىن كېيىن تاشقى ئىشلار مىنىستىرلىقى باياناتچىسى ئىسمائىل بەقائى بايانات بېرىپ، ئامېرىكا كۇشنېر ۋە ۋىت كوفنى پاكىستانغا ئەۋەتسە، تېھراننىڭ كۆز قاراشلىرىنىڭ ھەيئەتكە پاكىستان ئارقىلىق يەتكۈزۈلىدىغانلىقىنى بىلدۈردى.
ئىران تاشقى ئىشلار مىنىستىرلىقى باياناتچىسى تاشقى ئىشلار مىنىستىرى ئابباس ئاراقچىنىڭ پاكىستان پايتەختىگە يېتىپ بارغانلىقىنى، ئەمما ئامېرىكا بىلەن ھېچقانداق بىۋاسىتە ئالاقە ئورنىتىلمايدىغانلىقىنى تەكىتلىدى. ئىسمائىل بەقائى شەنبە كۈنى ئاراقچىنىڭ پاكىستاننىڭ يۇقىرى دەرىجىلىك ئەمەلدارلىرى بىلەن سۆھبەت ئۆتكۈزىدىغانلىقىنى قەيت قىلدى. ئاراقچىنى ئايرودۇرۇمدا پاكىستان تاشقى ئىشلار مىنىستىرى ئىسھاق دار، باش ئىشتاب باشلىقى مارشال ئاسىم مۇنىر ۋە باشقا يۇقىرى دەرىجىلىك ئەمەلدارلار كۈتۈۋالدى.
بەقائى ئامېرىكا مەركەزلىك ئىجتىمائىي تاراتقۇ سۇپىسى «X» تىكى ئۇچۇرىدا، سۆھبەتلەرنىڭ «داۋاملىشىۋاتقان ۋاسىتىچىلىك ۋە ياخشى نىيەتلىك تەشەببۇسلار بىلەن ماسلاشقان ھالدا» ئېلىپ بېرىلىدىغانلىقىنى يازدى. ئۇ مەقسەتنىڭ «ئامېرىكا تەرىپىدىن تېڭىلغان تاجاۋۇزچىلىق ئۇرۇشى»نى ئاخىرلاشتۇرۇش ۋە رايوندا مۇقىملىقنى قايتىدىن ئەسلىگە كەلتۈرۈش ئىكەنلىكىنى ئەسكەرتىپ: «ئىران بىلەن ئامېرىكا ئارىسىدا ھەرقانداق بىر سۆھبەت پىلانلانمىدى. ئىراننىڭ كۆز قاراشلىرى پاكىستانغا يەتكۈزۈلىدۇ» دېدى.
مەزكۇر ئۇچرىشىشلار پاكىستاننىڭ ئىران بىلەن ئامېرىكا ئارىسىدىكى جىددىيچىلىكنى پەسەيتىش ئۈچۈن مۇرەسسە قىلىش تىرىشچانلىقىنى كۈچەيتكەن بىر مەزگىلىگە توغرا كەلدى. ئىلگىرى ئاقساراي باياناتچىسى كارولىن لېۋىت ئامېرىكا ئالاھىدە ئەلچىسى ستىۋ ۋىت كوف ۋە پىرېزىدېنت دونالد ترامپنىڭ كىيۆ ئوغلى جارېد كۇشنېرنىڭ ئىران ۋەكىللىرى بىلەن كۆرۈشۈش ئۈچۈن شەنبە كۈنى پاكىستانغا بارىدىغانلىقىنى ئېيتقانىدى.
لېۋىت «Fox News» قانىلىغا بەرگەن باياناتىدا مۇنداق دېدى: «ئالاھىدە ئەلچى ستىۋ ۋىت كوف بىلەن جارېد كۇشنېرنىڭ ئىران ۋەكىللەر ئۆمىكى بىلەن پاكىستانلىقلار ۋاسىتىچىلىك قىلىدىغان بىۋاسىتە سۆھبەتلەرگە قاتنىشىش ئۈچۈن ئەتە ئەتىگەندە قايتىدىن پاكىستانغا بارىدىغانلىقىنى جەزملەشتۈرەلەيمەن. پاكىستانلىقلار بۇ پۈتۈن جەريان بويىچە ئىنتايىن ئۈنۈملۈك ۋاسىتىچى بولۇپ كەلدى.»
لېۋىت يەنە مۇئاۋىن پىرېزىدېنت ج د ۋانسنىڭ ئامېرىكادا قالىدىغانلىقىنى، ئەمما پۈتكۈل جەريانغا كۈچلۈك ئارىلىشىۋاتقانلىقىنى ئېيتتى. ئۇ مۇخبىرلارغا پىرېزىدېنتنىڭ ۋىت كوف بىلەن كۇشنېرنى «ئىرانلىقلارنى تىڭشاش» ئۈچۈن ئەۋەتىشنى قارار قىلغانلىقىنى بىلدۈردى. لېۋىت: «ئۆتكەن بىر نەچچە كۈندە ئىران تەرەپتىن بەزى ئىلگىرىلەشلەرنى كۆردۇق» دېگەن بولسىمۇ، ئامېرىكا ئەمەلدارلىرىنىڭ نېمىلەرنى ئاڭلىغانلىقى ھەققىدە تەپسىلىي مەلۇمات بەرمىدى.
پاكىستان ئىران بىلەن ئامېرىكا ئارىسىدىكى ئىككىنچى نۆۋەتلىك سۆھبەتنى جانلاندۇرۇش تىرىشچانلىقىنى كۈچەيتمەكتە. مەنبەلەر تېھران بىلەن ئۆتكۈزۈلىدىغان بۇ سۆھبەتلەرنىڭ، 11-12-ئاپرېل كۈنلىرى ئىسلامئابادتا ئۆتكۈزۈلگەن تۇنجى قېتىملىق بىۋاسىتە سۆھبەتتىن كېيىن، مۇزاكىرىلەرنىڭ قايتىدىن باشلىنىشىغا شارائىت ھازىرلىشى مۇمكىنلىكىنى قەيت قىلدى.
مەزكۇر ئۇچرىشىشلار پاكىستان 8-ئاپرېل كۈنى ئىككى ھەپتىلىك ئۇرۇش توختىتىشقا ۋاسىتىچىلىك قىلغاندىن كېيىن ئېلىپ بېرىلدى. پىرېزىدېنت ترامپ كېيىنچە بۇ ئۇرۇش توختىتىش مۇددىتىنى ئېنىق بىر ۋاقىت جەدۋىلى ئېلان قىلماي تۇرۇپ ئۇزارتتى. بۇ تەرەققىياتلار 28-فېۋرالدا ئۇرۇش باشلانغاندىن بۇيان داۋاملىشىۋاتقان سۈركىلىشلەر ئىچىدە، توقۇنۇشلارنى ئاخىرلاشتۇرىدىغان تېخىمۇ كەڭ كۆلەملىك بىر كېلىشىمگە ئېرىشىش تىرىشچانلىقلىرىنىڭ بىر قىسمى سۈپىتىدە مەيدانغا كەلمەكتە.
