ئامېرىكالىق بىر ئەمەلدار CNN تېلېۋىزىيە قانىلىغا بەرگەن باياناتىدا، ئامېرىكا مەركىزىي ئىستىخبارات ئىدارىسى (CIA) باشلىقى جون رەتكىلىفنىڭ تۈنۈگۈن كەچتە موسكۋاغا «ئالدىن خەۋەر قىلىنمىغان زىيارەت» ئېلىپ بارغانلىقىنى ئېيتتى.
ئەمەلدار رەتكىلىفنىڭ موسكۋادا ئۆتكۈزىدىغان يىغىنلىرىنىڭ مەزمۇنى ياكى مۇزاكىرە قىلىش پىلانلانغان تېمىلار ھەققىدە مەلۇمات بېرىشنى رەت قىلدى.
CNN نىڭ خەۋىرىدە: «بۇ رەتكىلىفنىڭ پىرېزىدېنت دونالد ترامپ دەۋرىدە موسكۋاغا قىلغانلىقى مەلۇم بولغان تۇنجى سەپىرىدۇر. زىيارەت رۇسىيە بىلەن ئۇكرائىنا ئوتتۇرىسىدىكى ئۇرۇشنى ئاخىرلاشتۇرۇش سۆھبەتلىرى توختاپ قالغان بىر مەزگىلدە ئېلىپ بېرىلدى» دېيىلدى.
ئامېرىكا مەركىزىي ئىستىخبارات ئىدارىسى بۇ ھەقتە تېخى بايانات ئېلان قىلمىدى. ئامېرىكا تاراتقۇلىرىمۇ مەزكۇر ئىدارىنىڭ ئۇچۇر بېرىشتىن «ئۆزىنى قاچۇرغانلىقى»نى خەۋەر قىلدى.
ئامېرىكا ھەربىي ترانسپورت ئايروپىلانى موسكۋاغا قوندى
ئۇچۇش ئۇچۇرلىرىنى كۆزىتىدىغان «Flightradar24» تور بېكىتىنىڭ مەلۇماتىغا قارىغاندا، ئامېرىكانىڭ «بوئىن C-17 Globemaster III» تىپلىق ھەربىي ترانسپورت ئايروپىلانى بۈگۈن ئەتىگەن موسكۋادىكى ۋنۇكوۋو خەلقئارا ئايرودۇرۇمىغا قونغان.
تور بېكىتىدىكى ئۇچۇرلاردا ئايروپىلاننىڭ مېرىلاند ئىشتاتىدىكى ئاندرېۋس بىرلەشمە ھەربىي بازىسىدىن ئۇچقانلىقى كۆرسىتىلگەن.
