تۈركىيە جۇمھۇرىيىتى مىللىي ئىستىخبارات ئىدارىسى باشلىقى ئىبراھىم قالىن ئىستانبۇلدا پەلەستىن ئىسلامىي قارشىلىق كۆرسىتىش ھەرىكىتى — ھاماس سىياسىي بىيۇروسى باشلىقى خەلىل ئەلھەييە ۋە ئۇنىڭ ھەمراھلىقىدىكى ۋەكىللەر ئۆمىكى بىلەن كۆرۈشۈپ، غەززە تىنچلىق پىلانىنىڭ ئىككىنچى باسقۇچىنى ئىلگىرى سۈرۈشكە قارىتىلغان تىرىشچانلىقلارنى مۇزاكىرە قىلدى.
ئانادولۇ خەۋەر ئاگېنتلىقىغا ئۇچۇر بەرگەن مەنبەلەر، سۆھبەتنىڭ تىنچلىق پىلانىنىڭ ئىككىنچى باسقۇچىغا ئۆتۈش ئۈچۈن تەييارلانغان يول خەرىتىسىنى چۆرىدىگەن ھالدا ئېلىپ بېرىلغانلىقىنى ۋە قاتناشقۇچىلارنىڭ ھاماسنىڭ تەكلىپكە بەرگەن ئىجابىي جاۋابىنى ئالاھىدە تىلغا ئالغانلىقىنى بىلدۈردى.
ئىككى تەرەپ ئىسرائىلىيەنىڭ يول خەرىتىسىنى ئىجرا قىلىشنىڭ ئورنىغا غەززەدىكى ھەربىي تاجاۋۇزچىلىقىنى كۈچەيتىۋاتقانلىقىدىن ئەندىشە قىلىۋاتقانلىقىنى ئوتتۇرىغا قويدى.
تەرەپلەر خەلقئارا جەمئىيەتنىڭ ئىسرائىلىيەنىڭ تاجاۋۇزچىلىقىنى تېزرەك توختىتىش ئۈچۈن دەرھال ھەرىكەتكە ئۆتۈشى كېرەكلىكىنى تەكىتلىدى.
خەلقئارا تىرىشچانلىق
سۆھبەتتە، غەززەدىكى ئىسرائىلىيەنىڭ ھەربىي قىرغىنچىلىقى داۋاملىشىۋاتقان بىر پەيتتە، ئىشغال ئاستىدىكى ئىيوردان دەرياسىنىڭ غەربىي قىرغىقى ۋە شەرقىي قۇددۇستا پەلەستىنلىكلەرنىڭ ھوقۇق-مەنپەئەتلىرىنىڭ دەپسەندە قىلىنىشىمۇ مۇزاكىرە قىلىندى.
قاتناشقۇچىلار ئىشغال ئاستىدىكى زېمىنلاردا داۋاملىشىۋاتقان قانۇنسىز ئىسرائىلىيە يەھۇدىي ئولتۇراق رايونى قۇرۇش پائالىيەتلىرى ۋە كۆچمەنلەر سادىر قىلىۋاتقان زوراۋانلىقلارنىڭ شىددەت بىلەن كۆپەيگەنلىكىگە دىققەت تارتتى.
مەنبەلەر تۈركىيەنىڭ مەيلى سىياسىي تىرىشچانلىقلار، مەيلى ئىنسانپەرۋەرلىك ياردەملىرىنى كۆپەيتىشنى مەقسەت قىلغان تەشەببۇسلار ئارقىلىق غەززەنى قوللايدىغانلىقىنى يەنە بىر قېتىم جەزملەشتۈرگەنلىكىنى بىلدۈردى.
قاتناشقۇچىلار غەززەدە تىنچلىقنىڭ ئورنىتىلىشىغا ياردەم بېرىش مەقسىتىدە تۈركىيە، قاتار ۋە مىسىرنىڭ ئورتاق تىرىشچانلىقىنىڭ ئەھمىيىتىنى يەنە بىر قېتىم تەكىتلەپ ئۆتتى.
ھاماس ۋەكىللەر ئۆمىكى يەنە تۈركىيە جۇمھۇر رەئىسى رەجەپ تاييىپ ئەردوغانغا ئەنقەرەنىڭ غەززەدە تىنچلىق ئورنىتىش يولىدا كۆرسەتكەن تىرىشچانلىقلىرى ئۈچۈن تەشەككۈر ئېيتتى.
