تۈركىيە جۇمھۇرىيىتى تاشقى ئىشلار مىنىستىرى مىنىستىر خاقان فىدان ئەنقەرەدە چاقىرىلغان تۈركىيە-سەئۇدى ئەرەبىستان ماسلاشتۇرۇش كېڭىشىنىڭ ئۈچىنچى قېتىملىق يىغىنىدا، ئىككى تەرەپ مۇناسىۋەتلىرىنىڭ ئورگان خاراكتېرلىك رامكا ئىچىدە مۇزاكىرە قىلىنغانلىقىنى ھەمدە غەززە باشتا بولۇپ رايون خاراكتېرلىك مەسىلىلەرنىڭ كېڭىشىلگەنلىكىنى بىلدۈردى.
تاشقى ئىشلار مىنىستىرى خاقان فىدان ئىجتىمائىي تاراتقۇ ھېسابىدا تۈركىيە-سەئۇدى ئەرەبىستان ماسلاشتۇرۇش كېڭىشىنىڭ ئۈچىنچى قېتىملىق يىغىنى ھەققىدە يازما بايانات ئېلان قىلدى.
سەئۇدى ئەرەبىستان تاشقى ئىشلار مىنىستىرى فايسال بىن فەرھان بىلەن بىرلىكتە يىغىنغا رىياسەتچىلىك قىلغانلىقىنى ئەسكەرتكەن مىنىستىر فىدان، ئالاقىدار مىنىستىرلىقلار ۋە ئورگانلارنىڭمۇ ئىشتىراك قىلىشى بىلەن سودا، ئېنېرگىيە، مۇداپىئە، مائارىپ، مەدەنىيەت، ساياھەت ۋە قاتناش قاتارلىق ئىستراتېگىيەلىك ساھەلەردىكى كومىتېت خىزمەتلىرىگە باھا بەرگەنلىكىنى ۋە ئىككى تەرەپ مۇناسىۋەتلىرىنى ئورگان خاراكتېرلىك بىر رامكا ئاستىدا مۇزاكىرە قىلغانلىقىنى ئىپادىلىدى.
ئۇ، غەززە باشتا بولۇپ رايون خاراكتېرلىك مەسىلىلەرمۇ مۇزاكىرە قىلىنغان يىغىن دائىرىسىدە، «دىپلوماتىك ۋە ئالاھىدە پاسپورت ئىگىلىرىنى ۋىزىدىن ئۆزئارا كەچۈرۈم قىلىش توغرىسىدىكى كېلىشىم»نىمۇ ئىمزالىغانلىقلىرىنى قەيت قىلدى.
مىنىستىر خاقان فىدان بۇ كېلىشىمنىڭ ھەر ئىككى دۆلەت ئۈچۈن خەيرلىك بولۇشىنى تىلىدى ھەمدە فايسال بىن فەرھان ۋە ئۇنىڭ ھەمراھلىرىغا زىيارىتى ئۈچۈن رەھمەت ئېيتتى.
