تۈركىيە تاشقى ئىشلار مىنىستىرى خاقان فىدان گىرېتسىيە تاشقى ئىشلار مىنىستىرى گىيورگوس گېراپېترىتىس بىلەن ئىسرائىلىيەنىڭ خەلقئارا سۇمۇد فىلوتىغا قىلغان ھۇجۇمى ھەققىدە سۆھبەت ئۆتكۈزدى.

تۈركىيە جۇمھۇرىيىتى تاشقى ئىشلار مىنىستىرلىقىنىڭ دىپلوماتىك مەنبەلىرىگە ئاساسلانغاندا، خاقان فىدان پەيشەنبە كۈنى گىرېتسىيە تاشقى ئىشلار مىنىستىرى گىيورگوس گېراپېترىتىس بىلەن ئۆتكۈزگەن تېلېفون سۆھبىتىدە، ئىسرائىلىيەنىڭ خەلقئارا سۇ تەۋەلىكىدە ياردەم فىلوتىغا قىلغان ھۇجۇمى ھەققىدە مۇزاكىرە ئېلىپ بارغان.

 مىنىستىرلىق تەرىپىدىن بۇ ھەقتە باشقا تەپسىلىي مەلۇمات بېرىلمىدى.

ئىسرائىلىيە بۇنىڭدىن ئىلگىرى، گىرىت ئارىلى ساھىللىرىدا خەلقئارا سۇ تەۋەلىكىدە فىلوتتىن تۇتقۇن قىلىنغان ئونلىغان كىشىلىك ھوقۇق پائالىيەتچىسىنىڭ گىرېتسىيە قىرغاقلىرىغا ئېلىپ بېرىلىپ، شۇ يەردە قۇرۇقلۇققا چىقىرىلىدىغانلىقىنى بىلدۈرگەن ئىدى.

فىلوت ئىسرائىلىيەنىڭ قورشاۋىنى بۇزۇپ تاشلاشنى نىشان قىلماقتا

ئىسرائىلىيەنىڭ غەززەگە يۈرگۈزۈۋاتقان قورشاۋىنى بۇزۇپ تاشلاشنى ۋە ئىنسانىي ياردەم يەتكۈزۈشنى نىشان قىلغان خەلقئارا سۇمۇد فىلوتى 2026-يىللىق باھار پائالىيىتى ئۈچۈن 12-ئاپرېل كۈنى بارسېلونادىن غەززەگە قاراپ يولغا چىققان ئىدى.

سىجىليا ئارىلىدا باشقا ئىشتىراكچىلارمۇ قوشۇلغاندىن كېيىن، فىلوت 26-ئاپرېل سەپىرىنى داۋاملاشتۇردى.

29-ئاپرېل كېچىسى، ئىسرائىلىيە دۆلەت خەۋپسىزلىك كۈچلىرى گىرىت ئارىلى ساھىللىرىدىكى خەلقئارا سۇ تەۋەلىكىدە كىشىلىك ھوقۇق پائالىيەتچىلىرى ئولتۇرغان پاراخوتلارغا قانۇنسىز شەكىلدە مۇداخىلە قىلدى.

فىلوت مەسئۇللىرىنىڭ بىلدۈرۈشىچە، پاراخوتلاردا تۈركىيە پۇقرالىرىنىمۇ ئۆز ئىچىگە ئالغان 39 دۆلەتتىن 345 ئىشتىراكچى بار ئىدى.

2025-يىلى سېنتەبىردىكى بۇنىڭدىن ئىلگىرىكى بىر تەشەببۇستىمۇ، ئىسرائىلىيە ئارمىيەسى ئاقدېڭىزدىكى خەلقئارا سۇ تەۋەلىكىدە خەلقئارا سۇمۇد فىلوتىنى توختاتقان، پائالىيەتچىلەرنى تۇتقۇن قىلغان ۋە پاراخوتلارنى تارتىۋالغان ئىدى.