تۈركىيە جۇمھۇرىيىتى جۇمھۇر رەئىسى رەجەپ تاييىپ ئەردوغان: «رايونىمىزدا تارىخ قايتىدىن يېزىلىۋاتىدۇ. تۈركىيە ئۆزىنىڭ تىنچلىقنى ئاساس قىلغان سىياسەتلىرى بىلەن رايوننىڭ يۆنىلىشىنى بەلگىلەۋاتىدۇ» دېدى.
جۇمھۇر رەئىس ئەردوغان مالازگىرت مىللىي باغچىسىدا ئۆتكۈزۈلگەن «ئانادولۇنىڭ پەتھى قىلىنىشى – مالازگىرت غەلىبىسىنىڭ 955-يىللىقىنى خاتىرىلەش مۇراسىمى» دا سۆز قىلدى.
ئەردوغان نۇتىقىدا: «زۆرۈر تېپىلغاندا بىز ھەرقانداق نەرسىدىن ۋاز كېچەلەيمىز، ئەمما مەسىلە ۋەتىنىمىز، دۆلىتىمىز ۋە مىللىتىمىزنىڭ ئىستىقبالى بولغاندا، ھېچكىمگە باش ئەگمەيمىز» دېگەن ئىبارىلەرنى قوللاندى.
ئەردوغان سۆزىنى داۋاملاشتۇرۇپ: «بۇ جۇغراپىيەدە بىزنىڭ كۈچلۈك بولۇش، بىر ۋە باراۋەر بولۇشتىن باشقا تاللىشىمىز يوق. بىز مىللەت سۈپىتىدە قاچان بىر يەرگە جەم بولغان بولساق، مۈرىنى مۈرىگە تىرەپ بىر گەۋدىلەشكەن بولساق، ھەر دائىم غەلىبىلەرگە ئېرىشتۇق. بۇنىڭدىن 955 يىل ئىلگىرىكى مالازگىرت داستانىنىمۇ ئەنە شۇنداق يازغانلىقىمىزنى ئۇنتۇماڭلار» دېدى.
نۇتىقىدا تېررورىزمدىن خالىي تۈركىيە مۇساپىسى ئۈستىدىمۇ توختالغان ئەردوغان مۇنداق دېدى:
«بىز بۇنى قېرىنداشلىقىمىز ئۈچۈن قىلدۇق. دوست - دۈشمەن ھەممەيلەن شۇنى بىلىشى كېرەككى، رايونىمىزدا تارىخ قايتىدىن يېزىلىۋاتىدۇ. تۈركىيە ئۆزىنىڭ تىنچلىقنى ئاساس قىلغان سىياسەتلىرى بىلەن رايوننىڭ يۆنىلىشىنى بەلگىلەۋاتىدۇ. بۇنىڭ ئالدىنى ئەمدى ھېچكىم توسالمايدۇ.»
جۇمھۇر رەئىس يەنە: «ئىغۋاگەرچىلىك ۋە تۈرلۈك تۇزاقلار بىلەن تۈركىيەنىڭ ۋە تۈركىيە خەلقىنىڭ مۇقەددەس يۈرۈشىنى توختىتىپ قالالايمىز دەپ ئويلىغانلار، چوقۇم ئۈمىدسىزلىككە مەھكۇم بولىدۇ» دېدى.
