مەركىزىي سايلام كومىتېتىنىڭ رەئىسى نۇرلان ئابدىروۋ پايتەخت ئاستانادا ئۆتكۈزۈلگەن ئاخبارات ۋاستىلىرىنى خەۋەرلەندۈرۈش يىغىنىدا، دۆلەت بويىچە 12 مىليون 623 مىڭ 289 كىشىنىڭ بېلەت تاشلاش ھوقۇقىغا ئىگە ئىكەنلىكىنى، 9 مىڭ 865 بېلەت تاشلىغۇچىنىڭ چەت ئەللەردە ئىكەنلىكىنى بىلدۈردى.

ئابدىروۋ سايلامغا 9 مىليون 351 مىڭ 539 كىشىنىڭ قاتناشقانلىقىنى ئەسكەرتىپ، دەسلەپكى قاتنىشىش نىسبىتىنىڭ %74.08 بولغانلىقىنى تىلغا ئالدى. سايلامىنىڭ دەسلەپكى نەتىجىسىگە قارىغاندا، رقابەتلەشكەن يەتتە سىياسىي پارتىيە ئىچىدىن ئادالەت پارتىيەسى %71.17 ئاۋاز بىلەن ئالدىنقى ئورۇندا تۇرغان. ئاۋىل پارتىيەسى %6.26 ئاۋاز بىلەن ئىككىنچى، رېسپۇبلىكا (Respublica) پارتىيەسى %5.56 ئاۋاز بىلەن ئۈچىنچى بولغان.

سايلامغا قاتناشقان يەتتە سىياسىي پارتىيەنىڭ بەشى قۇرۇلتايغا كىرىش ھوقۇقىغا ئېرىشكەن.

ئاق يول دېموكراتىك پارتىيەسى %5.21، دۆلەتلىك ئىجتىمائىي دېموكراتلار پارتىيەسى (OSDP) %5.11، قازاقىستان خەلق پارتىيەسى %3.11، قازاقىستان يېشىللار پارتىيەسى «بايتاق» %1.07 ئاۋازغا ئېرىشكەن. «ھەممىسىگە قارشى» تاللىشىنى بەلگىلىگەنلەرنىڭ نىسبىتى %2.51 بولغان.

شۇنىڭ بىلەن، سايلامغا قاتناشقان پارتىيەلەر ئىچىدىن %5 لىك چەك سىزىقىدىن ئۆتكەن بەش پارتىيە قازاقىستاننىڭ بىر پارلامېنتلىق قۇرۇلتاي مەجلىسىگە كىرىش ھوقۇقىنى قولغا كەلتۈرگەن. ھازىرقى ھاكىمىيەت بېشىدىكى ئادالەت پارتىيەسى، ئاۋىل پارتىيەسى، رېسپۇبلىكا پارتىيەسى، ئاق يول دېموكراتىك پارتىيەسى ۋە دۆلەتلىك ئىجتىمائىي دېموكراتلار پارتىيەسى 145 ئورۇندۇقلۇق قۇرۇلتايدا ۋەكىللىك قىلىنىدۇ.

قازاقىستاندا تۈنۈگۈن بىر پارلامېنتلىق قۇرۇلتاينىڭ تۇنجى ئەزالىرىنى بېكىتىش ئۈچۈن سايلام ئۆتكۈزۈلگەن ئىدى.