سۈرىيە تاراتقۇلىرىنىڭ خەۋىرىگە قارىغاندا، ئىسرائىلىيە ئارمىيەسى سۈرىيەنىڭ جەنۇبىدىكى قۇنەيترا ۋىلايىتىگە قارىتا يېڭى بىر قېتىملىق بېسىپ كىرىش ھەرىكىتى ئېلىپ بارغان.
«ئەلئىخبارىييە» تېلېۋىزىيە قانىلىنىڭ بىلدۈرۈشىچە، ئىسرائىلىيە كۈچلىرى قۇنەيترانىڭ جەنۇبىدىكى ئەررافىد يېزىسىنىڭ غەربىگە قاراپ ئىلگىرىلەپ، بىر كىشىنى قولغا ئالغان.
بۇ رايون ئىلگىرىمۇ ئىسرائىلىيەنىڭ كۆپ قېتىم بېسىپ كىرىشىگە دۇچ كەلگەن بولۇپ، جۈمە كۈنىمۇ ئەررافىدنىڭ غەربىدە يەنە بىر قېتىملىق باسقۇن قىلىش ۋەقەسىنىڭ يۈز بەرگەنلىكى مەلۇم قىلىنغان ئىدى. نەچچە ئايدىن بۇيان، سۈرىيەنىڭ جەنۇبى ئىسرائىلىيەنىڭ ھۇجۇملىرى، ئاختۇرۇش-تەكشۈرۈشلىرى، تۇتقۇن قىلىشلىرى ۋە ھەربىي تەكشۈرۈش پونكىتلىرىنى قۇرۇشىغا شاھىت بولۇپ كەلمەكتە. بۇ ھەرىكەتلەر 2024-يىلى دېكابىردىن كېيىن تېخىمۇ ئەۋج ئېلىپ كەتكەن بولۇپ، ئەينى ۋاقىتتا ئىسرائىلىيە 1974-يىللىق «ئايرىلىش كېلىشىمى» نىڭ كۈچتىن قالغانلىقىنى ئېلان قىلىپ، سۈرىيە بۇففېر رايونىنىڭ كونتروللۇقىنى قولغا ئالغان ئىدى.
سۈرىيە ئەرەب خەۋەر ئاگېنتلىقى (SANA) نىڭ خەۋىرىگە قارىغاندا، قۇرۇقلۇقتىكى بۇ باسقۇن قىلىش سۈرىيە ۋە ئىسرائىلىيە يۇقىرى دەرىجىلىك ۋەكىللەر ئۆمىكىنىڭ ئامېرىكانىڭ مۇرەسسەچىلىكىدە ئىيوردانىيەدە كۆرۈشۈپ، جىددىيچىلىكنى پەسەيتىشنى نىشان قىلغان سۆھبەتلىرى بىلەن بىر ۋاقىتقا توغرا كەلگەن.
سۈرىيە تاشقى ئىشلار مىنىستىرى ئەسەد ھەسەن شەيبانى رەھبەرلىكىدىكى سۈرىيە ۋەكىللەر ئۆمىكى ئىستىخبارات باشلىقلىرى بىلەن بىرلىكتە، ئىسرائىلىيەنىڭ ھۇجۇملىرىنى، قولغا ئېلىش ۋە بېسىپ كىرىش ھەرىكەتلىرىنى توختىتىدىغان ئەمەلىي مېخانىزم ئورنىتىشقا ئەھمىيەت بەردى. شۇنىڭ بىلەن بىر ۋاقىتتا، بىر بىخەتەرلىك شەرتنامىسىنى جانلاندۇرۇشمۇ مۇزاكىرە قىلىندى.
سۆھبەت جەريانىدا دەمشق سۈرىيەنىڭ ئىگىلىك ھوقۇقلۇق بىر دۆلەت ئىكەنلىكىنى، ئۆز دۆلەت ئارمىيەسىنى قايتىدىن قۇرۇپ چىقىش ۋە ھەمكارلىق مۇناسىۋەتلىرىنى چەكلىمىگە ئۇچرىمىغان مېخانىزملار ئارقىلىق بېكىتىش جەھەتتە تولۇق ھوقۇققا ئىگە ئىكەنلىكىنى تەكىتلىدى. سۈرىيە ئىشغالىيەت ئاستىدىكى گۆلان ئېگىزلىكىنىڭ سۈرىيە زېمىنى ئىكەنلىكىنى يەنە بىر قېتىم جەزملەشتۈرۈپ، ئالدىنقى قاتاردىكى تەلىپىنىڭ ئىسرائىلىيە كۈچلىرىنىڭ 2024-يىلى 8-دېكابىردىن بۇرۇنقى سىزىقلارغا چېكىنىشى ۋە 1974-يىللىق «ئايرىلىش كېلىشىمى» نىڭ پۈتۈنلەي قايتىدىن يولغا قويۇلۇشى ئىكەنلىكىنى بىلدۈردى.
