رۇسىيەدىكى ئېلېكترونلۇق سودا سۇپىسى «Ozon» نىڭ ئۈچ ئوخشىمىغان رايوندىكى ئامبارلىرى ئۇچقۇچىسىز ھاۋا ئاپپاراتى ھۇجۇمى سەۋەبىدىن تىجارىتىنى ۋاقىتلىق توختاتتى، داغىستاندىكى مۇئەسسەسەدە ئوت ئاپىتى يۈز بەردى.
«Ozon» شىركىتى ئېلان قىلغان باياناتىدا، رۇسىيەنىڭ داغىستان رايونىدىكى ماخاچقەلئە شەھرىگە جايلاشقان ئەشيا ئوبوروت مەركىزىنىڭ ئۇچقۇچىسىز ھاۋا ئاپپاراتى ھۇجۇمىغا ئۇچرىغانلىقىنى بىلدۈردى.
باياناتتا مۇئەسسەسەدىكى خادىملارنىڭ تارقاقلاشتۇرۇلغانلىقى، دەسلەپكى ئېنىقلاشلارغا ئاساسلانغاندا بىرنەچچە كىشىنىڭ يارىلانغانلىقى، سالامەتلىك تەكشۈرۈشىدىن ئۆتكەن يارىدارلارنىڭ ھاياتىغا خەۋپ يەتمەيدىغانلىقى قەيت قىلىندى. ھۇجۇمدىن كېيىن يۈز بەرگەن ئوت ئاپىتىگە جىددىي ئەھۋاللارغا تاقابىل تۇرۇش ئەترەتلىرىنىڭ مۇداخىلە قىلغانلىقى ۋە ئامبارنىڭ تىجارىتى توختىتىلغانلىقى ئىپادىلەندى.
بۇنىڭدىن باشقا، «Ozon» شىركىتىنىڭ ئادىگېيسك ۋە نېۋىننومىسسك شەھەرلىرىدىكى ئامبارلىرىنىڭمۇ كېچە سائەتلىرىدە ئۇچقۇچىسىز ھاۋا ئاپپاراتى ھۇجۇمى سەۋەبىدىن تارقاقلاشتۇرۇلغانلىقى ئەسكەرتىلدى. مەزكۇر مۇئەسسەسەلەردىكى خادىملارنىڭ زىيانغا ئۇچرىمىغانلىقى، ئامبار ۋە مەھسۇلاتلاردا زىيان كۆرۈلمىگەنلىكى، جىددىي ئەھۋاللارغا تاقابىل تۇرۇش ئەترەتلىرىنىڭ خىزمەتلىرى تۈپەيلىدىن ئامبارلارنىڭ ۋاقىتلىق تاقالغانلىقى بىلدۈرۈلدى.
ئۇكرائىنا يېقىنقى مەزگىللەردە رۇسىيەنى مەركەز قىلغان يەنە بىر ئېلېكترونلۇق سودا سۇپىسى «Wildberries» گە تەۋە ئامبار ۋە ئەشيا ئوبوروت مۇئەسسەسەلىرىگە قارىتا ئۇچقۇچىسىز ھاۋا ئاپپاراتى ھۇجۇملىرىنى ئېلىپ بارغان ئىدى.
