ھىندونېزىيەنىڭ غەربىي جاۋا ئۆلكىسىگە قاراشلىق بېكاسى شەھىرىدە يۈز بەرگەن ئىككى پويىز سوقۇلۇش ۋەقەسىدە قازا قىلغانلارنىڭ سانى 14 كە، يارلانغانلارنىڭ سانى 84 كە يەتتى. دۆلەت تاراتقۇلىرىنىڭ سەيشەنبە كۈنى مەسئۇللارنىڭ سۆزلىرىنى نەقىل كەلتۈرۈپ خەۋەر قىلىشىچە، بۇ ۋەقە يېقىنقى يىللاردىن بۇيانقى ئەڭ كۆپ ئادەم ئۆلگەن تۆمۈر يول پاجىئەلىرىنىڭ بىرى ھېسابلىنىدىكەن.
«ئانتارا خەۋەر ئاگېنتلىقى»نىڭ بىلدۈرۈشىچە، ۋەقە دۈشەنبە كۈنى كەچتە شەرق بېكاسى بېكىتىدە بىر شەھەر ئەتراپى پويىزىنىڭ ئۇزۇن يوللۇق پويىز بىلەن سوقۇلۇشى نەتىجىسىدە كېلىپ چىققان. دۆلەت تۆمۈر يول باشقۇرۇش ئىدارىسى «PT Kereta Api Indonesia (KAI)» مەسئۇللىرى يارىلانغان ئونلارچە يولۇچىنىڭ تۈرلۈك دوختۇرخانىلاردا داۋالىنىۋاتقانلىقىنى ئاشكارىلىدى.
«جاكارتا گىلوب» گېزىتىنىڭ خەۋىرىگە ئاساسلانغاندا، دۆلەت تۆمۈر يول باشقۇرۇش ئىدارىسى باياناتچىسى فىرانوتو ۋىبوۋو ۋەقەنىڭ جەريانى ھەققىدە توختىلىپ، ۋەقەنىڭ بېكاسىدىكى «بۇلاك قاپال» تۆمۈر يول ئۆتۈشمە يولىدا بىر تاكسىنىڭ ئېلېكتىرلىك شەھەر ئەتراپى پويىزىغا سوقۇلۇشى بىلەن كېلىپ چىققانلىقىنى بايان قىلدى. سوقۇلۇشتىن كېيىن، شەھەر ئەتراپى پويىزى رېلىس ئۈستىدە توختاپ قالغان، ئارقىدىنلا ئوخشاش لىنىيەدە كېلىۋاتقان ئۇزۇن يوللۇق پويىز توختاپ قالغان پويىزغا سوقۇلغان.
دۆلەتلىك ئىزدەش-قۇتقۇزۇش ئىدارىسى (Basarnas) نى ئۆز ئىچىگە ئالغان جىددىي تاقابىل تۇرۇش ئەترەتلىرى كېچىچە خىزمەت ئىشلەپ، بەزىلىرى ئېغىر يارلانغان تالاپەتكە ئۇچرىغۇچىلارنى تارقاقلاشتۇردى. دائىرىلەر ھاياتىدىن ئايرىلغانلارنىڭ كىملىكىنى ئېنىقلاش ئۈچۈن جەسەتلەرنىڭ ساقچى دوختۇرخانىسىغا ئاپىرىلغانلىقىنى بىلدۈردى.
مەسئۇللار تالاپەتكە ئۇچرىغۇچىلارنىڭ بارلىق داۋالىنىش ۋە دەپنە چىقىملىرىنىڭ ئۈستىگە ئېلىنىدىغانلىقىنى، ئائىلە-تاۋابىئاتلىرىغا ياردەم بېرىش ئۈچۈن جىددىي تاقابىل تۇرۇش مەركىزى بىلەن ئۇچۇر نۇقتىلىرىنىڭ تەسىس قىلىنغانلىقىنى تىلغا ئالدى. ھازىرچە ۋەقە يۈز بەرگەن رايوندىكى پويىز قاتنىشى قىسمەن كاشىلاغا ئۇچراۋاتقان بولۇپ، بىر تەرەپتە تەكشۈرۈش ئەترەتلىرى ۋەقەنىڭ تەپسىلاتىنى ئېنىقلىماقتا، يەنە بىر تەرەپتە پويىز سەپەرلىرى چەكلىك ھالدا داۋاملاشماقتا. ھىندونېزىيە قاتناش دائىرىلىرى قالدۇقلارنى تازىلاش ۋە قۇتقۇزۇش مەشغۇلاتلىرىنىڭ يەنىلا داۋاملىشىۋاتقانلىقىنى ئەسكەرتتى.
