لىۋان دۆلەتلىك خەۋەر ئاگېنتلىقىنىڭ خەۋىرىگە قارىغاندا، ئىسرائىلىيە ئۇرۇش توختىتىش كېلىشىمى ئېلان قىلىنىپ بىرنەچچە سائەتتىن كېيىن، يەنى جۈمە كۈنى ئەتىگەن تەرەپلەردە لىۋاننىڭ جەنۇبىدا ھاۋا ھۇجۇملىرى ۋە توپقا تۇتۇش ھەرىكەتلىرىنى ئېلىپ بارغان.

ئىسرائىلىيە ئۇرۇش ئايروپىلانلىرى ئەتىگەن تەرەپلەردە مەرجايۇن ناھىيەسىگە قاراشلىق تۇلىن يېزىسىدىكى بىر ئۆينى بومباردىمان قىلغان؛ رايوندىكى ھۇجۇملار زەمبىرەك ھۇجۇملىرى بىلەن داۋاملاشقان. بۇنىڭدىن باشقا يەنە، خەربەت سەلم يېزىسىمۇ بومباردىمان قىلىنغان.

تۇر ناھىيەسىدە ئىسرائىلىيە ئايروپىلانلىرى مەجدەل زۇن ئېتەكلىرىنى بومباردىمان قىلغان، شۇنداقلا كېچىچە جەززىن رايونىدىكى رىھان ئېگىزلىكلىرىمۇ بومباردىمان قىلىنغان.

بۇ ھۇجۇملار ئاقسارايدا ئۆتكۈزۈلگەن باش ئەلچى دەرىجىلىك سۆھبەتلەردىن كېيىن، ئامېرىكا پىرېزىدېنتى دونالد ترامپنىڭ ئىسرائىلىيە بىلەن لىۋان ئوتتۇرىسىدىكى ئۇرۇش توختىتىش كېلىشىمىنىڭ مۇددىتىنىڭ ئۈچ ھەپتە ئۇزارتىلغانلىقىنى ئېلان قىلىشىدىن بىرنەچچە سائەت كېيىنلا يۈز بەرگەن.

ئامېرىكانىڭ مۇرەسسەچىلىكىدە ھاسىل قىلىنغان 10 كۈنلۈك ئۇرۇش توختىتىش كېلىشىمى 16-ئاپرېل يولغا قويۇلغان بولۇپ، مۇددىتىنىڭ يەكشەنبە كۈنى توشۇشى كۈتۈلۈۋاتاتتى.

بۇنىڭدىن ئىلگىرى ئىسرائىلىيەنىڭ بىرلەشكەن دۆلەتلەر تەشكىلاتىدا تۇرۇشلۇق دائىمىي ۋەكىلى داننىي دانون لىۋان بىلەن ھاسىل قىلىنغان ئۇرۇش توختىتىش كېلىشىمىنىڭ «يۈز پىرسەنت ئەمەسلىكىنى» ئىلگىرى سۈرگەن ئىدى.

دانون ئامېرىكا پىرېزىدېنتى ترامپ ئۇرۇش توختىتىش كېلىشىمىنىڭ مۇددىتىنىڭ ئۇزارتىلغانلىقىنى ئېلان قىلغاندىن كېيىنلا بەرگەن باياناتىدا مۇنداق دېدى: «بۇ ئەھۋالنى ئۇرۇش توختىتىشتىن بۇرۇن يۈز بەرگەن ۋەقەلەر بىلەن سېلىشتۇرۇپ كۆرۈڭ؛ ئەھۋالنىڭ كۆرۈنەرلىك دەرىجىدە ياخشىلانغانلىقىنى بىلىسىز. مېنىڭچە ئەسلى مەسىلە، لىۋان ھۆكۈمىتىنىڭ ئۇرۇش توختىتىش ياكى تىنچلىق كېلىشىمىنى ئىجرا قىلىش ۋەياكى لىۋاننىڭ جەنۇبىدا ھەقىقىي ئىگىلىك ھوقۇقىنى تىكلەش ئىقتىدارىغا ئىگە ياكى ئەمەسلىكىدۇر.»

لىۋان دائىرىلىرىنىڭ بىلدۈرۈشىچە، 2-مارتتىن بۇيان ئىسرائىلىيەنىڭ ھۇجۇملىرى لىۋاندا 2200 دىن ئارتۇق كىشىنىڭ ھاياتىدىن ئايرىلىشىغا ۋە 1 مىليوندىن ئارتۇق كىشىنىڭ ئۆي-ماكانلىرىدىن ئايرىلىپ قېلىشىغا سەۋەب بولغان.