ياۋروپا ئىتتىپاقى كېڭىشىنىڭ رەئىسى ئانتونىيو كوستا رۇسىيە-ئۇكرائىنا سۆھبىتىدە ئۇرۇشنى توختىتىش، قارا دېڭىزدىكى پاراخوتلارنىڭ ئەركىن قاتنىشىغا كاپالەتلىك قىلىش ۋە تىنچلىق كېلىشىمى ئىمزالاشقا تېگىشلىك زېمىن ھازىرلاشنىڭ نۆۋەتتىكى ئەڭ تەخىرسىز ۋەزىپە ئىكەنلىكىنى ئوتتۇرىغا قويدى.
ئىرېلاندىيە پايتەختى دۇبلىندا ئۆتكۈزۈلگەن ياۋروپا سىياسىي ھەمجەمئىيىتىنىڭ 9-نۆۋەتلىك باشلىقلار يىغىنى ئاياغلاشقاندىن كېيىنكى مۇخبىرلارنى كۈتۈۋېلىش يىغىنىدا سۆز قىلغان كوستا، ئۇكرائىنادا ئادىل ۋە ئۇزاق مۇددەتلىك تىنچلىق ئورنىتىش چارىلىرى ئۈستىدە ئىزدىنىشنىڭ بۇ قېتىمقى يىغىننىڭ ئاساسلىق كۈنتەرتىپى بولغانلىقىنى تەكىتلىدى. شۇنىڭ بىلەن بىرگە، ئۇ رۇسىيە تەرەپنىڭ تىنچلىق ئورنىتىشقا نىسبەتەن تېخىچە ھېچقانداق سەمىمىيەت ياكى بېشارەت كۆرسەتمىگەنلىكىنى تىلغا ئالدى.
2022-يىلى فېۋرالدىن بۇيان داۋام قىلىۋاتقان بۇ ۋەيران قىلغۇچ ئۇرۇشنى ئاخىرلاشتۇرۇش ئۈچۈن دىپلوماتىك تىرىشچانلىقلارنىڭ بارغانسېرى كۈچىيىۋاتقانلىقىنى ئەسكەرتكەن كوستا، ياۋروپادا خەۋپسىزلىك تەرتىپىنى قايتىدىن ئورنىتىشنىڭ چوقۇم ئېنىق پىرىنسىپلار ئاساسىدا بولۇشى كېرەكلىكىنى جەكىلىدى.
كوستانىڭ ئېيتىشىچە، ئۇكرائىنا ئۆز كەلگۈسىنى تاللاشتا تولۇق ئەركىنلىككە ئىگە بولۇشى ھەمدە ياۋروپا قىتئەسىنىڭ كەلگۈسى خەۋپسىزلىكىگە ئائىت سۆھبەتلەردە ئۆز ئورنىنى تېپىشى شەرت. شۇنىڭدەك، ياۋروپانىڭ بىخەتەرلىك مېخانىزمىمۇ جەزمەن 1975-يىلدىكى خېلسىنكى خۇلاسە ھۆججىتىدە بېكىتىلگەن پىرىنسىپلارنى ئۆلچەم قىلىشى كېرەك. ئۇ سۆزىنىڭ ئاخىرىدا: «بىزنىڭ خەۋپسىزلىكىمىزنىڭ ئۇكرائىنانىڭ خەۋپسىزلىكىگە باغلانغانلىقى ئىنتايىن ئېنىق. بىز ئۇكرائىنانى قوللاشتىن قەتئىي ئارقىغا يانمايمىز» دېدى.
