ئىسرائىلىيە باش مىنىستىرى بېنيامىن نېتانياھۇ ئامېرىكا پىرېزىدېنتى دونالد ترامپنىڭ تېھران ھاكىمىيىتىگە يۈرگۈزگەن ئىقتىسادىي جازالىرىنى مەدھىيەلەپ، ئىران بىلەن دىپلوماتىك كېلىشىم ھاسىل قىلىشنىڭ مۇمكىن ئەمەسلىكىنى ئوتتۇرىغا قويدى.

پىرېزىدېنت سارىيى ئاخبارات ئىشخانىسىنىڭ بىلدۈرۈشىچە، نېتانياھۇ تۈنۈگۈن كەچتە بىر پائالىيەتتە سۆزلىگەن نۇتىقىدا، ئىران بىلەن بولغان نۆۋەتتىكى ۋەزىيەتكە قارىتا ئۆز قاراشلىرىنى بايان قىلغان. نېتانياھۇ 28-ئىيۇل كۈنى ئاقسارايدا ترامپ بىلەن ئۆتكۈزگەن كۆرۈشۈشىنى تىلغا ئېلىپ، ئۈچ خىل ئېھتىماللىق ئۈستىدە توختالغان. ئۇ بىرىنچى ئېھتىماللىقنىڭ كېلىشىم ئىكەنلىكىنى، ئەمما ئىران تەرەپ بىلەن كېلىشىم ھاسىل قىلىشنىڭ مۇمكىن ئەمەسلىكىنى ترامپقا ئېيتقانلىقىنى بىلدۈرگەن.

ئىككىنچى ئېھتىماللىقنىڭ ھەربىي ھەرىكەت ئىكەنلىكىنى ئىلگىرى سۈرگەن نېتانياھۇ: «بىز ئۆزىمىزنى قوغدايمىز، ئىراننىڭ بىزگە ھۇجۇم قىلىشىغا يول قويمايمىز. ئەگەر بىزگە ھۇجۇم قىلسا، ئۇلار تەسەۋۋۇر قىلالمايدىغان دەرىجىدە زەربىگە ئۇچرايدۇ» دېگەن. ئۇ يەنە ئۈچىنچى ئېھتىماللىقنىڭ ئىرانغا قارىتا «قورشاۋنى كۈچەيتىش» ئىكەنلىكىنى ئەسكەرتىپ، ترامپنىڭ تېھران ھاكىمىيىتىگە قاراتقان ئىقتىسادىي جازالىرىغا يۇقىرى باھا بەرگەن.

نېتانياھۇ ئاخىرىدا ئىشغالىيەت ئاستىدىكى ئىيوردان دەرياسىنىڭ غەربىي قىرغىقىدا قانۇنسىز 104 ئولتۇراق رايون ۋە 160 دېھقانچىلىق مەركىزىنىڭ قۇرۇلغانلىقىنى ماختاپ: «بۇلارنىڭ بىر قىسمى ئالدىنقى ئامېرىكا ھۆكۈمىتى دەۋرىدە، بىر قىسمى ھازىرقى ئامېرىكا ھۆكۈمىتى دەۋرىدە ئېلىپ بېرىلدى» دېگەن.