يەرلىك تاراتقۇلارنىڭ خەۋەرلىرىگە قارىغاندا، ئىران مەجلىسى دۆلەت خەۋپسىزلىك كومىتېتى سەيشەنبە كۈنى ھورمۇز بوغۇزىدىن ئۆتىدىغان پاراخوتلاردىن ھەق ئېلىشقا دائىر قانۇن لايىھەسىنى ماقۇللىغان.
بۇ لايىھە مەزكۇر ئىستراتېگىيەلىك سۇ يولىنى باشقۇرۇشقا ئالاقىدار بىر يۈرۈش يېڭى بەلگىلىمىلەرنى يولغا قويۇشنى نىشان قىلىدۇ. بۇلارنىڭ ئىچىدە پاراخوتلارنىڭ ئىراننىڭ مىللىي پۇلى بولغان رىيال بىلەن ئۆتۈش ھەققى تۆلىشىگە ئالاقىدار مالىيە ماددىلىرىمۇ بار.
فارس خەۋەر ئاگېنتلىقىنىڭ خەۋەر قىلىشىچە، كومىتېت ئەزاسى مۇجتەبا زارېي مەزكۇر قانۇن لايىھەسىنىڭ ئامېرىكا قوشما ئىشتاتلىرى ۋە ئىسرائىلىيە بىلەن ئالاقىسى بار پاراخوتلارنىڭ بوغۇزدىن ئۆتۈشىنى چەكلەيدىغان ماددىلارنىمۇ ئۆز ئىچىگە ئالىدىغانلىقىنى ئېيتقان.
قوشۇمچە ماددىلار ئىرانغا قارىتا بىر تەرەپلىمە ئېمبارگولارغا قاتناشقان دۆلەتلەرنىڭ پاراخوتلىرىنىڭمۇ بوغۇزدىن ئۆتۈشىنى مەنئىي قىلىدۇ.
مەزكۇر قانۇننىڭ يولغا قويۇلۇشى ئۈچۈن، ئالدى بىلەن مەجلىسنىڭ ئومۇمىي يىغىنىدا ئاۋازغا قويۇلۇشىغا، ئاندىن ئاساسىي قانۇننى قوغداش كېڭىشى تەرىپىدىن كۆزدىن كەچۈرۈلۈشىگە ۋە پىرېزىدېنت تەرىپىدىن ئىمزالىنىشىغا توغرا كېلىدۇ.
ئىسرائىلىيە بىلەن ئامېرىكا قوشما ئىشتاتلىرىنىڭ 28-فېۋرال كۈنى ئىرانغا قاراتقان بىرلەشمە ھۇجۇمىدىن كېيىن، رايونلۇق جىددىيچىلىك بارغانسېرى يامانلاشماقتا. ئامېرىكا ۋە ئىسرائىلىيەنىڭ ھۇجۇملىرىدا ئەينى ۋاقىتتىكى دىنىي رەھبەر ئەلى خامەنېينىمۇ ئۆز ئىچىگە ئالغان 1340 تىن ئارتۇق كىشى ھاياتىدىن ئايرىلدى.
ئىران بولسا ئىسرائىلىيە، ئىيوردانىيە، ئىراق ۋە ئامېرىكا قوشما ئىشتاتلىرىنىڭ ھەربىي بازىلىرى جايلاشقان پارىس قولتۇقى دۆلەتلىرىنى نىشان قىلغان ئۇچقۇچىسىز ھاۋا ئاپپاراتى ۋە باشقۇرۇلىدىغان بومبا ھۇجۇملىرى بىلەن قايتۇرما زەربە بەردى. بۇ ھۇجۇملار جانغا زامىن بولۇش ۋە ئۇل ئەسلىھەلەرنىڭ ۋەيران بولۇشىنى كەلتۈرۈپ چىقىرىش بىلەن بىرگە، دۇنياۋى بازارلار ۋە ئاۋىياتسىيە ساھەسىگىمۇ سەلبىي تەسىر كۆرسەتتى.
