تېھران رايوندىكى ئامېرىكا بازىلىرىغا ۋە نېفىت پاراخوتلىرىغا قاراتقان تەھدىتلىرىنى كېڭەيتمەكتە. ئىران يېقىندا يۈز بەرگەن ئامېرىكا ھۇجۇملىرىغا جاۋابەن ئۆچ ئېلىش ئۈچۈن ئىيوردانىيەدىكى بىر ئامېرىكا بازىسىغا باشقۇرۇلىدىغان بومبىلارنى ئاتتى ۋە ئامېرىكانىڭ ئىككى ۋەيران قىلغۇچى پاراخوتىغا زەربە بەرگەنلىكىنى ئىلگىرى سۈردى.
ئىيوردانىيە ئارمىيەسى ئىران تەرىپىدىن بىر ئامېرىكا بازىسىنى نىشان قىلغان ھۇجۇمدا 20 باللىستىك باشقۇرۇلىدىغان بومبىدىن 18 ىنىڭ ئىيوردانىيە ھاۋا مۇداپىئە سىستېمىلىرى تەرىپىدىن توسۇپ قېلىنغانلىقىنى جەزملەشتۈردى.
بىر ھەربىي باياناتچى ئېشىپ قالغان بومبىلارنىڭ پۇقرالارنىڭ ئۆلۈم-يىتىمىگە ياكى ئۇل ئەسلىھەلەرنىڭ ۋەيران بولۇشىغا سەۋەب بولماستىنلا ئوچۇق يەرلەرگە چۈشكەنلىكىنى بىلدۈردى.
مەزكۇر بومبا ھۇجۇملىرى، ئىران ئىنقىلابىي مۇھاپىزەتچىلەر قىسمىنىڭ (IRGC) ئىيوردانىيەدىكى بىر ئامېرىكا ھەربىي بازىسىدىن سىرت، قاناتلىق باشقۇرۇلىدىغان بومبا ۋە «Aegis» جەڭ سىستېمىلىرى سەپلەنگەن ئامېرىكاغا تەۋە DDG-119 ۋە DDG-53 تىپلىق ۋەيران قىلغۇچى پاراخوتلارغا قارىتىلغان ھۇجۇملارنى تەشكىللىگەنلىكىنى ئېلان قىلىشىنىڭ ئارقىسىدىنلا يۈز بەردى.
يېرىم رەسمىي تاسنىم ئاگېنتلىقىدا ئېلان قىلىنغان بىر باياناتتا، ئىران ئىنقىلابىي مۇھاپىزەتچىلەر قىسمى «ئىران نېفىت پاراخوتلىرى ۋە كېمىلىرىگە قارىتىلغان تاجاۋۇزچىلىق ھەرىكەتلىرى ھەمدە رەزىل نىيەتلىك پاراكەندىچىلىكلەرگە» قارشى «خېلىلا كۈچلۈك شەكىلدە» قايتۇرما زەربە بەرگەنلىكىنى ئىلگىرى سۈرۈپ، ۋەيران قىلغۇچى پاراخوتلار بىلەن ئامېرىكا ئەسلىھەلىرىگە ئېغىر زىيان يەتكۈزگەنلىكىنى دەۋا قىلدى.
پارس قولتۇقىدا كۈچىيىۋاتقان دېڭىزدىكى توقۇنۇشلار بىلەن بىر ۋاقىتتا چېگرا ھالقىغان بومبا ھۇجۇملىرى يۈز بەرمەكتە.
دۆلەتلىك رادىيو-تېلېۋىزىيە ئورگىنى «IRIB» نىڭ جەزملەشتۈرۈشىچە، ئىران دېڭىز ئارمىيەسى ئامېرىكانىڭ ئىران پاراخوتلىرىغا قىلغان ھۇجۇملىرىغا ئالاقىدار خەۋەرلەردىن كېيىن، ئۆچ ئېلىش ھۇجۇملىرىدا كۇۋەيت بىلەن بەھرەين پورتلىرىدىكى نېفىت پاراخوتلىرىنىڭ نىشانغا ئېلىنىدىغانلىقى توغرىسىدا ئاگاھلاندۇرۇش بېرىپ، خادىملارنى دەرھال تارقاقلىشىشقا چاقىرغان.
