روسىيە دۆلەت رەئىسى ۋلادىمىر پۇتىن بىلەن ئامېرىكالىق ۋەكىللەر ستېۋ ۋىتكوف ۋە جارەد كۇشنېر ئوتتۇرىسىدا ئۇكرائىنا ئىختىلاپىنى مۇزاكىرە قىلىش ئۈچۈن موسكۋادا ئۆتكۈزۈلگەن سۆھبەت ئاخىرلاشتى. كرېمىل ئۈچ سائەت داۋاملاشقان بۇ سۆھبەتنى «ئىنتايىن سەمىمىي ۋە ئوچۇق» دەپ باھالىدى، ئاقسارايمۇ كەلگۈسى ھەپتىلەردە كونكرېت قەدەملەرنىڭ ئېلان قىلىنىدىغانلىقىنى جەزملەشتۈردى.
بىر ئاقساراي ئەمەلدارى ئامېرىكالىق ۋە روسىيەلىك ئەمەلدارلارنىڭ كەلگۈسى ھەپتىلەردە رەسمىي ئېلان قىلىنىدىغان سۆھبەتلەردىكى كېيىنكى باسقۇچلارغا مۇناسىۋەتلىك كونكرېت پىلانلارنى مۇزاكىرە قىلغانلىقىنى بىلدۈردى.
ئاقساراي ۋىتكوف ۋە كۇشنېرنىڭ پىرېزىدېنت دونالد ترامپنىڭ روسىيە بىلەن ئۇكرائىنا ئوتتۇرىسىدا تىنچلىق ئورنىتىش كۈنتەرتىپىنى ئىلگىرى سۈرۈش مەقسىتىدە پۇتىن بىلەن كۆرۈشكەنلىكىنى بىلدۈردى ۋە ھەر ئىككى تەرەپنىڭ ئۇكرائىنادا شۇنىڭغا ئوخشاش ئۈنۈملۈك سۆھبەتلەرنى ئۆتكۈزۈشنى ئۈمىد قىلىدىغانلىقىنى تەكىتلىدى.
دۆلەت خەۋەر ئاگېنتلىقى «رىئا» قاتارلىقلارنىمۇ ئۆز ئىچىگە ئالغان روسىيە ئاخبارات ئورگانلىرى ۋىتكوف ۋە كۇشنېرنىڭ سۆھبەتلەردىن كېيىن كرېمىلدىن ئايرىلغانلىقىنى خەۋەر قىلدى.
كرېمىل تاشقى سىياسەت مەسلىھەتچىسى يۇرى ئۇشاكوف ژۇرنالىستلارغا: «ئامېرىكالىق ۋەكىللەر بۇ ساەياھەت ئۈچۈن ئەتراپلىق تەييارلىق قىلغان ئىدى. ئۇلار پەقەتلا توقۇنۇشلارنى تېز سۈرەتتە ئاخىرلاشتۇرۇش توغرىسىدىكى ئەنئەنىۋى قىزىقىشىنى ئىپادىلەپلا قالماستىن، بەلكى بىر چارە تېپىشقا ئېلىپ بارىدىغان مۇمكىن بولغان يوللارغا دائىر بىر قاتار پىكىرلەرنىمۇ ئوتتۇرىغا قويدى» دەپ بايانات بەردى.
ئۇشاكوف بۇ مۇزاكىرىنى «قۇرۇلما خاراكتېرلىك، ئىنتايىن ئوچۇق ۋە ئىشەنچكە تايانغان» دەپ باھالىدى. روسىيە ھۆكۈمىتىنىڭ «بەلگىلەنگەن نىشانلارغا يېتىدىغانلىقىغا بولغان ئىشەنچىسىنى ئىپادىلىگەنلىكى» نى بىلدۈردى.
سۆھبەتتىن ئىلگىرىكى باياناتلار
پۇتىن سۆھبەتلىشىشتىن ئىلگىرىكى باياناتىدا ۋەزىيەتنى «ئەلۋەتتە مۇرەككەپ» دەپ ئاتىغان بولسا، «قىيىن بىر ۋەزىيەتكە» كىرىپ قالغانلىقىغا قارىماي تىنچلىق تىرىشچانلىقلىرىنى داۋاملاشتۇرغانلىقى ئۈچۈن ئامېرىكا پىرېزىدېنتى دونالد ترامپقا رەھمەت ئېيتتى.
پۇتىن بىۋاسىتە ئالاقىلەرنى «ھەمىشە پايدىلىق» دەپ ئاتاپ: «بۈگۈن بارلىق تەركىبلىرى ۋە يۆنىلىشلىرى بىلەن مەسىلىنى مۇزاكىرە قىلىمىز. بىزمۇ ئۆز نۆۋىتىمىزدە ۋەزىيەتكە بولغان قاراشلىرىمىزنى سىلەرگە يەتكۈزۈشكە تەييارمىز» دېدى.
دۆلەت رەئىسىنىڭ مەخسۇس ۋەكىلى كىرىل دمىترىيېۋمۇ سۆھبەتلەرگە قاتناشتى.
ۋىتكوف ۋە كۇشنېر رايون خاراكتېرلىك ۋەزىپىلىرىنى ئىجرا قىلىش جەريانىدا ئۈچ كۈنلۈك ئۇرۇش توختىتىشنى قوبۇل قىلغانلىقى ئۈچۈن پۇتىنغا رەھمەت ئېيتتى ۋە 2022-يىلدىن بۇيان قاماقتا ياتقاندىن كېيىن ئۆتكەن ئاي موسكۋا تەرىپىدىن قويۇپ بېرىلغان سابىق ئامېرىكا دېڭىز پىيادە ئەسكىرى روبېرت گىلماننىڭ ئائىلە-تاۋابىئاتلىرىنىڭ مىننەتدارلىقىنى يەتكۈزدى.
ئامېرىكالىق ئەلچىلەر شەنبە كۈنى موسكۋانىڭ ۋنۇكوۋو ئايرودۇرۇمىغا يېتىپ بارغان بولۇپ، تۇنجى زىيارىتى ئۈچۈن يەكشەنبە كۈنى كىييېۋغا بېرىشى پىلانلانماقتا.
ترامپ جۈمە كۈنى كۇشنېر بىلەن ۋىتكوفنىڭ تۆت يىلدىن ئارتۇق داۋاملاشقان ئۇرۇشنى ئاخىرلاشتۇرۇشقا قارىتىلغان كونكرېت بىر تەكلىپ ئېلىپ بارىدىغانلىقىنى بىلدۈرگەن ئىدى.
