جۇمھۇر رەئىس رەجەپ تاييىپ ئەردوغان بىلەن قاتار ئەمىرى شەيخ تەمىم بىن ھەمەد ئالسانىنىڭ جۇمھۇر رەئىسلىك مەھكىمىسىنىڭ دولماباھچەدىكى ئايرىم ۋە ھەيئەتلەر ئارا ئۇچرىشىشلىرىدىن كېيىن، ئىككى دۆلەت ئوتتۇرىسىدا تۈزۈلگەن كېلىشىملەرگە ئىمزا قويۇش مۇراسىمى ئۆتكۈزۈلدى. جۇمھۇر رەئىس ئەردوغان ۋە قاتار ئەمىرى ئال سانىنىڭ ھۇزۇرىدا، تۈركىيە-قاتار ئالىي ئىستراتېگىيەلىك كومىتېتىنىڭ 12-نۆۋەتلىك يىغىنى دائىرىسىدە، ئىككى دۆلەت ئوتتۇرىسىدا 5 كېلىشىم ئىمزالاندى.

تۈركىيە ھۆكۈمىتى بىلەن قاتار ھۆكۈمىتى ئوتتۇرىسىدىكى «ئىستېمالچىلارنى قوغداش، بازارنى نازارەت قىلىش ۋە تەكشۈرۈش ساھەلىرىدە ھەمكارلىشىشقا دائىر چۈشىنىش ئەسلەتمىسى»، سودا مىنىستىرى ئۆمەر بولات بىلەن قاتار سودا ۋە سانائەت ۋەزىرى شەيخ فەيسەل بىن سانى بىن فەيسەل ئالسانى تەرىپىدىن ئىمزالاندى.

تۈركىيە بىلەن قاتار ئوتتۇرىسىدىكى «مائارىپ ساھەسىدە ھەمكارلىشىش كېلىشىمى» گە، مىللىي مائارىپ مىنىستىرى يۈسۈف تېكىن بىلەن قاتار دۆلەت ئەمىرى دوكتور مۇھەممەد بىن ئابدۇلئەزىز ئەل-خۇلەيفى ئىمزا قويدى.

تۈركىيە تاشقى ئىشلار مىنىستىرلىقى بىلەن قاتار تاشقى ئىشلار ۋازارىتى ئوتتۇرىسىدىكى «تىنچلىق، يارىشىش ۋە توقۇنۇشلارنى ھەل قىلىش مەسىلىسىدە ھەمكارلىشىش چۈشىنىش ئەسلەتمىسى»، تاشقى ئىشلار مىنىستىرى خاقان فىدان بىلەن قاتار باش ۋەزىرى ۋە تاشقى ئىشلار ۋەزىرى مۇھەممەد بىن ئابدۇررەھمان ئالسانى تەرىپىدىن ئىمزالاندى.

تۈركىيە بىلەن قاتار ئوتتۇرىسىدىكى «ئالىي ئىستراتېگىيەلىك كومىتېتنىڭ 12- يىغىنى ئورتاق باياناتى» غا، تاشقى ئىشلار مىنىستىرى خاقان فىدان بىلەن قاتار باش ۋەزىرى ۋە تاشقى ئىشلار ۋەزىرى ئالسانى ئىمزا قويدى.

تۈركىيە بىلەن قاتار ئوتتۇرىسىدىكى «ئۆزئارا مۇداپىئە كېلىشىمى» بولسا، جۇمھۇررەئىس ئەردوغان بىلەن قاتار ئەمىرى ئالسانى تەرىپىدىن ئىمزالاندى.

تۈركىيە-قاتار ئالىي ئىستراتېگىيەلىك كومىتېتى 12-يىغىنىنىڭ ئورتاق باياناتى ئېلان قىلىندى

تاشقى ئىشلار مىنىستىرلىقى تەرىپىدىن تۈركىيە بىلەن قاتار ئوتتۇرىسىدىكى ئالىي ئىستراتېگىيەلىك كومىتېتنىڭ 12-يىغىنىنىڭ ئورتاق باياناتى ئېلان قىلىندى.

باياناتتا، يىغىننىڭ جۇمھۇررەئىس رەجەپ تاييىپ ئەردوغان ۋە قاتار ئەمىرى تەمىم بىن ھەمەد ئالسانىنىڭ رىياسەتچىلىكىدە، 2014-يىلى 19-دېكابىردىكى ئالىي ئىستراتېگىيەلىك كومىتېت قۇرۇش توغرىسىدىكى ئورتاق ئەسلەتمىدە كۆرسىتىلگەن ھەمكارلىق ساھەلىرىگە مەسئۇل مىنىستىرلارنىڭ قاتنىشىشى ئاستىدا ئىستانبۇلدا ئۆتكۈزۈلگەنلىكى بىلدۈرۈلدى.

تەرەپلەرنىڭ 5 مىليارد ئامېرىكا دوللىرىلىق سودا سوممىسىغا يېتىش نىشانىنى قايتا تەكىتلىگەنلىكى قەيت قىلىنغان باياناتتا، سودا ۋە ئىقتىسادىي مۇناسىۋەتلەرنى كېڭەيتىش ۋە كۆپ خىللاشتۇرۇش ئۈچۈن يېڭى پۇرسەتلەرنى، شۇنداقلا سودا ۋە ئىقتىسادىي شېرىكلىك كېلىشىمىنىڭ (TEPA) بۇ نىشانغا يېتىشكە قوشىدىغان تۆھپىسىنى تەتقىق قىلىش مەسىلىسىدە پىكىر بىرلىكىگە كېلىنگەنلىكى ئىپادىلەندى.

باياناتتا تەرەپلەرنىڭ قاتارنىڭ تۈركىيەدىكى سېلىنمىلىرىدىن ۋە تۈركىيە قۇرۇلۇش شىركەتلىرىنىڭ قاتاردا جەمئىي 20.8 مىليارد دوللار قىممىتىدىكى 206 تۈرنى ئۈستىگە ئالغانلىقىدىن خۇرسەنلىك ھېس قىلغانلىقى، ئىقتىسادىي ۋە سودا ھەمكارلىقىنى كۈچەيتىش توغرىسىدا كېلىشكەنلىكى ئەسكەرتىلدى.

تۈركىيە-قاتار ئىقتىسادىي ۋە تېخنىكىلىق ھەمكارلىق بىرلەشمە كومىتېتىنىڭ 7-يىغىنى دوھادا ئۆتكۈزۈلىدۇ

تەرەپلەرنىڭ سودا مۇناسىۋەتلىرىنى تەرەققىي قىلدۇرۇشتا تۈركىيە-قاتار بىرلەشمە ئىقتىساد ۋە سودا كومىتېتىنىڭ (JETCO) ئەھمىيىتىنى تەكىتلىگەنلىكى ۋە كومىتېتنىڭ ئىككىنچى يىغىنىنى دوھادا ئۆتكۈزۈشكە تەييار ئىكەنلىكى بىلدۈرۈلگەن باياناتتا، تەرەپلەرنىڭ تۈركىيە-قاتار ئىقتىسادىي ۋە تېخنىكىلىق ھەمكارلىق بىرلەشمە كومىتېتىنىڭ 7-يىغىنىنىمۇ مۇمكىن بولغان ئەڭ بالدۇر ۋاقىتتا دوھادا ئۆتكۈزۈش توغرىسىدا كېلىشكەنلىكى مەلۇم قىلىندى.

باياناتتا، 2018-يىلى ئىمزالانغان ۋە 2025-يىلى 1-ئاۋغۇستتا كۈچكە ئىگە بولغان سودا ۋە ئىقتىسادىي شېرىكلىك كېلىشىمىنىڭ (TEPA) سودا ئالماشتۇرۇشنى تەرەققىي قىلدۇرۇش، تاۋار ۋە مۇلازىمەت ئېقىمىنى قولايلاشتۇرۇش ھەمدە ئۆزئارا مەبلەغ سېلىشنى ئىلگىرى سۈرۈش ئارقىلىق ئىككى دۆلەت ئوتتۇرىسىدىكى ئىستراتېگىيەلىك شېرىكلىكنى چوڭقۇرلاشتۇرۇشقا ۋە رايون خاراكتېرلىك ئىقتىسادىي بىر گەۋدىلىشىشنى قوللاشقا تۆھپە قوشىدىغان ئومۇميۈزلۈك بىر رامكا تەمىنلەيدىغانلىقى قەيت قىلىندى.

مۇداپىئە ساھەسىدىكى ھەمكارلىق

باياناتتا، ئىككى تەرەپنىڭ ئورتاق خەۋپسىزلىك ئەندىشىلىرىنى ئىستراتېگىيەلىك  ئالدىنقى ئورۇنغا قويۇپ مۇئامىلە قىلىش ۋە مۇداپىئەگە مۇناسىۋەتلىك مەسىلىلەردىكى ھەمكارلىقنى تېخىمۇ تەرەققىي قىلدۇرۇش يۆنىلىشىدىكى قەتئىي ئىرادىسىنى ئىپادىلىگەنلىكى بىلدۈرۈلدى.

تەرەپلەرنىڭ ئورتاق مۇداپىئەنى كۈچەيتىش، رايون خەۋپسىزلىكى ۋە مۇقىملىقىنى قوللاش بىلەن بىرگە، تاشقى قوراللىق ھۇجۇمغا قارشى ئورتاق بىر مەيداننى تەشۋىق قىلىش مەقسىتىدە «تۈركىيە بىلەن قاتار ئوتتۇرىسىدىكى ئۆزئارا مۇداپىئە كېلىشىمى» نىڭ ئىمزالىنىشىنى يۇقىرى باھالىغانلىقى تىلغا ئېلىنغان باياناتتا مۇنۇلار قەيت قىلىندى:

«ئىككى تەرەپ مەزكۇر كېلىشىمنىڭ پەقەت ئىمزا قويغۇچى تەرەپلەرنىڭ ئىگىلىك ھوقۇقىنى ۋە زېمىن پۈتۈنلۈكىنى قوغداش ۋەدىسىنىلا ئەمەس، بەلكى تېخىمۇ بىخەتەر ۋە مۇقىم بىر رايون تەرتىپىگە تۆھپە قوشۇش يۆنىلىشىدىكى ئورتاق ئىستىقبالىنىمۇ ئەكس ئەتتۈرىدىغانلىقىنى جەزملەشتۈردى. بۇ مەنىدە، ھەر ئىككى تەرەپ خەۋپسىزلىكىگە قارىتىلغان تەھدىتلەر بىلەن بىرگە، رايون خاراكتېرلىك ۋە يەر شارى خاراكتېرلىك خەۋپسىزلىك مەسىلىلىرى ھەمدە مۇداپىئە سىياسەتلىرى توغرىسىدا مەسلىھەتلىشىش، شۇنداقلا بىرلەشمە ھەربىي مانېۋىرلار، مۇداپىئە سانائىتى ھەمكارلىقى، خادىملارنى تەربىيەلەش ۋە ئۆزئارا ئالماشتۇرۇش ئارقىلىق ھەمكارلىقنى تەرەققىي قىلدۇرۇش مەسىلىسىدە پىكىر بىرلىكىگە كەلدى.»

باياناتتا، تۈركىيە، قاتار، پاكىستان ۋە ھىندونېزىيە تەرىپىدىن ئىمزالانغان بەدىر ئەسلەتمىسىنىڭ، يەرلىك ئىقتىدارلارنى تەرەققىي قىلدۇرۇش ئارقىلىق مۇداپىئە ئېھتىياجلىرىنى قاندۇرۇشقا قارىتىلغان ئورتاق سىغىمچانلىقىنى ئاشۇرۇش يولىدا مۇھىم بىر قەدەم سۈپىتىدە يۇقىرى باھالانغانلىقى ئەسكەرتىلىپ، تەرەپلەرنىڭ مەزكۇر ئەسلەتمىنىڭ بىرلەشمە ئىشلەپچىقىرىش، تېخنولوگىيە تەرەققىي قىلدۇرۇش، ئۇچۇر ۋە تەجرىبە ئالماشتۇرۇشتىن باشقا مۇداپىئە سانائىتى ئۇل- ئەسلىھەسى ۋە تەمىنلەش زەنجىرلىرىنى كۈچەيتىش ساھەلىرىدە تېخىمۇ يېقىن بىر ھەمكارلىققا ئاساس تەييارلايدىغانلىقىنى قەيت قىلغانلىقى بايان قىلىندى.

بىخەتەرلىك ساھەسىدىكى ھەمكارلىق مەسىلىسىدە بولسا، ئىككى دۆلەت ئوتتۇرىسىدا ئىمزالانغان كېلىشىملەرگە ئىشارەت قىلىنىپ، ئىككى دۆلەت ئوتتۇرىسىدا ئورۇنلاشتۇرۇلۇشى مۇمكىن بولغان تېخنىكىلىق ياردەم ۋە تەربىيەلەشنى ئۆز ئىچىگە ئالغان قىسقا ۋە ئۇزۇن مۇددەتلىك پىروگراممىلار تىلغا ئېلىندى.

غەززەگە قارىتىلغان ئىنسانپەرۋەرلىك ياردەم خىزمەتلىرىنى ماسلاشتۇرۇش مەسىلىسىدە بىردەكلىك ھاسىل قىلىندى

باياناتتا، تەرەپلەرنىڭ تۇتۇپ قېلىنغان بارلىق ئىنسانپەرۋەرلىك ياردەم خادىملىرى ۋە بىرلەشكەن دۆلەتلەر تەشكىلاتى خادىملىرىنىڭ دەرھال ۋە شەرتسىز قويۇپ بېرىلىشىنى تەلەپ قىلغانلىقى تەكىتلىنىپ مۇنۇلار قەيت قىلىندى:

«ئىككى تەرەپ غەززەنىڭ بالدۇر ئەسلىگە كېلىشى ۋە قايتا قۇرۇلۇشىغا قارىتىلغان قوللاشلىرىنى، شۇنداقلا غەززەگە قارىتىلغان ئىنسانپەرۋەرلىك ياردەم خىزمەتلىرىنى ماسلاشتۇرۇش مەسىلىسىدە پىكىر بىرلىكىگە كەلدى. ئۇنىڭدىن باشقا، غەززەگە تولۇق، بىخەتەر ۋە توسالغۇسىز ئىنسانپەرۋەرلىك ياردەم يەتكۈزۈشكە چاقىرىق قىلدى؛ غەززەدىكى پاناھلىنىش ئىمكانىيەتلىرىنى ۋە ئىنسانپەرۋەرلىك ياردەملىرىنى ئاشۇرۇش ئۈچۈن يېقىندىن ھەمكارلىشىش توغرىسىدا كېلىشتى. ھەر ئىككى تەرەپ پەلەستىنلىكلەرگە قىش پەسلىنىڭ تۇنجى تۇيۇقسىز كەلكۈن ئاپىتىنىڭ تەسىرىگە ئۇچرىشى ۋە ئاپەتلەرنىڭ ئەسلىدىنلا ئىنتايىن ئېغىر بولغان تۇرمۇش شارائىتىنى تېخىمۇ ناچارلاشتۇرۇپ، بۇ شارائىتنى بارغانسېرى چىدىغۇسىز ھالغا كەلتۈرۈشى سەۋەبىدىن، مۇھىم ئاپەتنىڭ ئالدىنى ئېلىش تەدبىرلىرىنى يولغا قويۇش كېرەكلىكىنى تەكىتلەيدۇ.»

باياناتتا، مۇھىت ۋە كىلىمات ئۆزگىرىشى ساھەسىدىكى ھەمكارلىقلار دائىرىسىدە، بىرلەشكەن دۆلەتلەر تەشكىلاتى كىلىمات ئۆزگىرىشى رامكا شەرتنامىسى 31-قېتىملىق باشلىقلار يىغىنى (COP31)، 2030-يىللىق ئىمكانىيەتلىك سىجىل تەرەققىيات كۈنتەرتىپى ۋە نۆل ئەخلەت تەشەببۇسى تىلغا ئېلىندى ھەمدە تەرەپلەر ئائىلە ۋە ئىجتىمائىي مۇلازىمەت ساھەسىدىكى ھەمكارلىقنى كۈچەيتىش جەھەتتىكى قەتئىي ئىرادىسىنى قايتا تەكىتلىدى.

ئىسرائىلىيەگە مەجبۇرىيەتلىرىگە تولۇق رىئايە قىلىش چاقىرىقى

باياناتتا، تەرەپلەرنىڭ ئىسرائىلىيەنى ئۇرۇش توختىتىش كېلىشىمى ۋە خەلقئارا قانۇن دائىرىسىدىكى بارلىق مەجبۇرىيەتلىرىگە تولۇق رىئايە قىلىشقا چاقىرغانلىقى، پۇقرالارنى قوغداش ۋە ئىنسانپەرۋەرلىك ياردەملىرىگە توسالغۇسىز يول ئېچىشنىڭ مۇھىملىقىنى تەكىتلىگەنلىكى بايان قىلىندى.

تەرەپلەرنىڭ ئىسرائىلىيەنىڭ شەرقىي قۇددۇسنى ئۆز ئىچىگە ئالغان غەربىي قىرغاقتىكى قانۇنسىز ئولتۇراقلاشتۇرۇش ھەرىكەتلىرىنى، كۆچمەنلەرنىڭ زوراۋانلىقى ۋە تېررورلۇق ھەرىكەتلىرىنى، زېمىن مۇسادىرە قىلىش ۋە مەجبۇرىي كۆچۈرۈش قىلمىشلىرىنى قاتتىق ئەيىبلىگەنلىكى، شۇنداقلا ئىشغال ئاستىدىكى پەلەستىن زېمىنلىرىنىڭ قانۇنىي، جۇغراپىيەلىك ۋە نوپۇس ئورنىنى ئۆزگەرتىشنى مەقسەت قىلغان بارلىق تەدبىرلەرنى رەت قىلغانلىقى تەكىتلەنگەن باياناتتا مۇنۇلارغا ئورۇن بېرىلدى:

«بۇنىڭدىن باشقا، تارىخىي ھاشىمى ھامىيلىقىنىڭ ئالاھىدە رولىنى ئېتىراپ قىلىش بىلەن بىرگە، ئىشغال ئاستىدىكى قۇددۇسقا جايلاشقان مەسجىدى ئەقسا بىلەن باشقا ئىسلام ۋە خىرىستىيان مۇقەددەس جايلىرىنىڭ تارىخىي ۋە قانۇنىي ھالىتىنى ئۆزگەرتىشكە قارىتىلغان ھەر قانداق ئۇرۇنۇشنى قەتئىيلىك بىلەن رەت قىلىدىغانلىقىنى قايتا تەكىتلىدى. تەرەپلەر ئاشقۇن ئىسرائىلىيەلىك كۆچمەنلەر ۋە ئەمەلدارلارنىڭ ئىسرائىلىيە كۈچلىرىنىڭ قوغدىشى ئاستىدا مەسجىدى ئەقساغا قاراتقان داۋاملىشىۋاتقان ھۇجۇملىرىنى ئەيىبلىدى ۋە مەسجىدى ئەقسانىڭ  144 نىڭ كىۋادرات مېتىرلىق بارلىق يېرىنىڭ پەقەتلا مۇسۇلمانلارغا تەۋە ئىبادەت ئورنى ئىكەنلىكىنى، قۇددۇس ۋەخپىلىرى ۋە مەسجىدى ئەقسا ئىشلىرى ئىدارىسىنىڭ بۇ رايوننى باشقۇرۇشقا مەسئۇل ھوقۇقلۇق ئورگان ئىكەنلىكىنى قايتا جەزملەشتۈردى.»

ئىككى دۆلەتنىڭ پەلەستىن ۋە غەززە مەسىلىسىدىكى باياناتلىرى بىلەن مەيدانلىرىغا، ئىسرائىلىيەگە قارىتىلغان ئەيىبلەشلىرىگە ئىشارەت قىلىنغان باياناتتا، تەرەپلەرنىڭ سۈرىيە مەسىلىسىدىمۇ دۆلەتنىڭ ئىنتايىن قىيىن شارائىت ئاستىدا مۇقىملىقنى قايتا ئورنىتىشى، دۆلەت ئورگانلىرىنى كۈچەيتىشى ۋە سۈرىيەنىڭ يېتەكچىلىكى ھەم ئىگىدارچىلىقىدا ئومۇميۈزلۈك بىر سىياسىي مۇساپىنى ئىلگىرى سۈرۈشكە قارىتىلغان تىرىشچانلىقلىرىنى قوللايدىغانلىقىنى قايتا جەزملەشتۈرگەنلىكى بىلدۈرۈلدى.

تەرەپلەرنىڭ خەلقئارا جەمئىيەتنىڭ ئىسرائىلىيەنىڭ سۈرىيەنىڭ ئىگىلىك ھوقۇقى ۋە زېمىن پۈتۈنلۈكىگە قارىتا داۋاملىشىۋاتقان دەخلى-تەرۇزلىرىنى توختىتىش، 1974-يىلىدىكى چېگرالارنى ئايرىش كېلىشىمىگە ھۆرمەت قىلىشنى كاپالەتكە ئىگە قىلىش ۋە خەلقئارا قانۇنغا خىلاپ ھالدا ئىشغال قىلىنغان سۈرىيە زېمىنلىرىدىن ئىسرائىلىيە كۈچلىرىنىڭ چېكىنىشىنى ئەمەلگە ئاشۇرۇش مەقسىتىدە قەتئىي پوزىتسىيە ۇتۇشى كېرەكلىكىنى تەكىتلىگەنلىكى، بۇ نىشانلارغا يېتىشكە قارىتىلغان دىپلوماتىك تىرىشچانلىقلارنى قوللاش ۋەدىسىنى قايتا جەزملەشتۈرگەنلىكى قەيت قىلىندى.

تەرەپلەرنىڭ ئامېرىكا بىلەن ئىران ئوتتۇرىسىدا يۈز بەرگەن ئىختىلاپ ۋە رايوندىكى كەڭ دائىرىلىك تەسىرلىرىنىڭ دىيالوگ ۋە دىپلوماتىيە يولى بىلەن ھەل قىلىنىشى كېرەكلىكى تەكىتلەنگەن باياناتتا، رايوندىكى بارلىق دۆلەتلەرنىڭ ئىگىلىك ھوقۇقى ۋە زېمىن پۈتۈنلۈكىگە ھۆرمەت قىلىنىشى بىلەن بىرگە، پۇقرالارنىڭ ۋە ئاممىۋى ئۇل- ئەسلىھەلەرنىڭ قوغدىلىشى كېرەكلىكى قايتا جەزملەشتۈرۈلدى.

باياناتتا، تەرەپلەرنىڭ يەنە قانۇنلۇق دېڭىز قاتنىشىغا توسقۇنلۇق قىلىدىغان ھەر قانداق تەدبىر ياكى چەكلىمىنى رەت قىلغانلىقى ۋە ھورمۇز بوغۇزىدىن بىخەتەر، ئىشەنچلىك ۋە توسالغۇسىز ئۆتۈشنىڭ تېزدىن ۋە تولۇق قايتا باشلىنىشىغا چاقىرىق قىلغانلىقى ئىپادىلەندى.

تەرەپلەرنىڭ ئىسرائىلىيەنىڭ لىۋاننىڭ ئىگىلىك ھوقۇقى ۋە زېمىن پۈتۈنلۈكىگە دەخلى-تەرۇز قىلغان ھەرىكەتلىرىنى ئەيىبلىگەنلىكى ئەسكەرتىلگەن باياناتتا، لىۋان دۆلىتى، ھۆكۈمىتى ۋە خەلقى بىلەن تولۇق ھەمكارلىق ئىچىدە ئىكەنلىكى جەزملەشتۈرۈلدى.

يەمەننىڭ بىرلىكى ۋە ئىگىلىك ھوقۇقىنى قوغداش چاقىرىقى

تەرەپلەرنىڭ يەمەننىڭ بىرلىكى، ئىگىلىك ھوقۇقى ۋە زېمىن پۈتۈنلۈكىنى قوغداش بىلەن بىرگە، خەلقئارادا ئېتىراپ قىلىنغان ھۆكۈمەتنى قوللاشنىڭ ھاياتىي ئەھمىيەتكە ئىگە ئىكەنلىكىنى تەكىتلىگەنلىكى قەيت قىلىنغان باياناتتا مۇنداق دېيىلدى: «تەرەپلەر يەنە خۇسىي قوراللىقلىرىنىڭ سەئۇدى ئەرەبىستانى پادىشاھلىقىغا قارىتا پۇقرالارنى ۋە ئاممىۋى ئۇل- ئەسلىھەلەرنى نىشان قىلغان ھۇجۇملىرى بىلەن قىزىل دېڭىز ۋە بابۇلمەندەب بوغۇزىدىكى سودا دېڭىز تىرانسپورتىغا قاراتقان ھۇجۇملىرىنى ئەيىبلىدى. تەرەپلەر يەمەن ھۆكۈمىتى ۋە سەئۇدى ئەرەبىستانى پادىشاھلىقى بىلەن ھەمكارلىق ئىچىدە ئىكەنلىكىنى قايتا تەكىتلىدى؛ سىجىل سىياسىي ھەل قىلىش چارەسى تېپىش مەقسىتىدە بىرلەشكەن دۆلەتلەر تەشكىلاتىنىڭ يېتەكچىلىكىدە ئېلىپ بېرىلىۋاتقان ۋە باشقا دىپلوماتىك تىرىشچانلىقلارنى قوللايدىغانلىقىنى جەزملەشتۈردى ھەمدە خۇسىي قوراللىقلىرىنى ھۇجۇملىرىنى دەرھال توختىتىپ، ياخشى نىيەت بىلەن سىياسىي مۇساپىگە قايتىشقا چاقىردى.»

باياناتتا، تەرەپلەرنىڭ سۇداننىڭ بىرلىكى، ئىگىلىك ھوقۇقى ۋە زېمىن پۈتۈنلۈكىنى مۇھاپىزەت قىلىش ئارقىلىق دۆلەتتىكى كىرىزىسنى تىنچ ھەل قىلىشنى مەقسەت قىلغان ھازىرقى مۇرەسسەچىلىك تىرىشچانلىقلىرىغا ۋە دىپلوماتىك تىرىشچانلىقلارغا قارىتا قوللاشلىرىنى جەزملەشتۈرگەنلىكى بايان قىلىندى.

تۈركىيە بىلەن قاتارنىڭ ئافرىقا تۇمشۇقىدا تىنچلىق، خەۋپسىزلىك ۋە مۇقىملىقنى ئەمەلگە ئاشۇرۇشنىڭ مۇھىملىقىنى تەكىتلىگەنلىكى بايان قىلىنغان بۇ قۇرلاردا، سومالىنى ئۆز ئىچىگە ئالغان رايوندىكى بارلىق دۆلەتلەرنىڭ ئىگىلىك ھوقۇقى، بىرلىكى ۋە زېمىن پۈتۈنلۈكىگە ھۆرمەت قىلىنىشى بىلەن بىرگە، ياخشى قوشنىدارچىلىق مۇناسىۋەتلىرىنىڭ ساقلىنىشى كېرەكلىكى قەيت قىلىندى.

ئۇنىڭدىن باشقا، تەرەپلەر ھەر ئىككى تەرەپنىڭ قىبرىس مەسىلىسىگە ئادىل، ئۇزۇن مۇددەتلىك، ئىمكانىيەتلىك سىجىل ۋە ئۆزئارا قوبۇل قىلغىلى بولىدىغان ھەل قىلىش چارەسى تېپىش ئېھتىياجىنى تەكىتلىدى ۋە «رايون خاراكتېرلىك خەۋپسىزلىك سىناقلىرى بىلەن بۇلارنىڭ بىخەتەرلىك ۋە مۇقىملىققا قاراتقان يوشۇرۇن خەۋپلىرىنى تونۇپ يەتكەن ھالدا ھەر ئىككى تەرەپ، رايون خەۋپسىزلىكى ۋە ئورتاق مۇقىملىقنى كۈچەيتىش مەقسىتىدە، تېررورىزمنىڭ ھەر قانداق شەكلى ۋە ئىپادىسىگە قارشى كۈرەشتە يېقىن ھەمكارلىقنى داۋاملاشتۇرۇش ھەمدە پ ك ك|پ ي د| پ ي گ (PKK/PYD/YPG)، دائېش (DEAŞ) ۋە فەتۆ (FETÖ) گە چېتىشلىق تەشكىلاتلارنى ئۆز ئىچىگە ئالغان بارلىق تېررورلۇق تەشكىلاتلىرىغا قارشى كۈرەش قىلىش ۋەدىسىنى قايتا جەزملەشتۈردى» دېگەن ئىبارىلەرگە ئورۇن بەردى.

تۈركىيە-قاتار ئالىي ئىستراتېگىيەلىك كومىتېتىنىڭ 13-يىغىنىنىڭ 2027-يىلىغىچە قاتاردا ئۆتكۈزۈلۈشى توغرىسىدا بىردەكلىك ھاسىل قىلىنغانلىقى قەيت قىلىندى.