دىپلوماتلارنىڭ ئېيتىشىچە، ۋاشىنگتون ئىراننىڭ ھورمۇز بوغۇزىدىكى ھۇجۇملىرىنى ۋە مىنا قويۇش ھەرىكەتلىرىنى توختىتىشنى تەلەپ قىلغان ب د ت قارار لايىھەسىگە تۈزىتىش كىرگۈزگەن، ئەمما بۇنىڭ خىتاي بىلەن رۇسىيەنىڭ توسقۇنلۇقىنىڭ ئالدىنى ئېلىشى ناتايىن ئىكەن.
پەيشەنبە (2026-يىلى 7-ماي) كۈنى چۈشتىن كېيىن ب د ت خەۋپسىزلىك كېڭىشى ئەزالىرىغا سۇنۇلغان ۋە رويتېرس ئاگېنتلىقى قولغا چۈشۈرگەن ئامېرىكانىڭ تۈزىتىش كىرگۈزگەن تەكلىپ لايىھەدە، ب د ت نىزامنامەسىنىڭ خەۋپسىزلىك كېڭىشىگە جازا يۈرگۈزۈشتىن ھەربىي ھەرىكەت قوللىنىشقىچە بولغان تەدبىرلەرنى قوللىنىش ھوقۇقى بېرىدىغان «7-باب» تىلغا ئېلىنغان ماددا چىقىرىۋېتىلگەن.
شۇنداقتىمۇ، لايىھەدە يەنىلا بىر ماددا ساقلاپ قېلىنغان بولۇپ، ئۇنىڭدا ئەگەر بۇنىڭغا ئەمەل قىلىنمىسا، كېڭەشنىڭ «شۇ رايوندىكى پاراخوتلارنىڭ ئەركىن قاتنىشىغا كاپالەتلىك قىلىش ئۈچۈن، جازا تەدبىرلىرىنى ئۆز ئىچىگە ئالغان ئۈنۈملۈك تەدبىرلەرنى مۇزاكىرە قىلىش ئۈچۈن قايتا جەم بولىدىغانلىقى» كۆرسىتىلگەن.
كېڭەشنىڭ مەزكۇر قارار لايىھەسىنى قاچان ئاۋازغا قويىدىغانلىقى تېخى ئېنىق ئەمەس.
گەرچە تەكلىپ لايىھەسىدە كۈچ ئىشلىتىشكە ئېنىق ھوقۇق بېرىلمىگەن بولسىمۇ، ئەمما بۇ ئېھتىماللىق يوققا چىقىرىلمىغان، ھەمدە «ئەزا دۆلەتلەرنىڭ ئۆز پاراخوتلىرىنى ھۇجۇم ۋە تەھدىتلەردىن، جۈملىدىن كېمە قاتنىشى ھوقۇقى ۋە ئەركىنلىكىگە زىيان يەتكۈزىدىغان قىلمىشلاردىن قوغداش ھوقۇقى» قايتا تەكىتلەنگەن.
مۇناسىۋەتلىك ئۇچۇرلارTRT World - Washington expects Iran response to US proposal on Friday: Rubio
