ئەزەربەيجان دائىرىلىرى سەيشەنبە كۈنى كېچىدە بىر ئوق-دورا ئامبىرىدا يۈز بەرگەن ئوت ئاپىتىنىڭ پارتلاشلارنى كەلتۈرۈپ چىقارغانلىقىنى، بۇنىڭ نەتىجىسىدە 5 مىڭ كىشىنىڭ بىخەتەر جايلارغا كۆچۈرۈلگەنلىكىنى بىلدۈردى. جىددىي ئەھۋاللارغا تاقابىل تۇرۇش، دۆلەت مۇداپىئە ۋە ئىچكى ئىشلار مىنىستىرلىقلىرى بىرلىكتە ھەرىكەت قىلىپ ۋەزىيەتنى كونترول ئاستىغا ئالدى. ئوت ئاپىتى گورانبوي ناھىيەسىگە قاراشلىق نىزامى يېزىسى ئەتراپىدىكى ئوق-دورا ئامبىردا يۈز بەرگەن.
گورانبوي ناھىيەسى مۇئاۋىن ھاكىمى سەيمۇر نەزەروۋنىڭ بىلدۈرۈشىچە، نىزامى ۋە خويلۇ يېزىلىرىدىكى ئاھالىلەر ئالدىنى ئېلىش تەدبىرى سۈپىتىدە تارقاقلاشتۇرۇلغان. پارتلاشتا ھېچقانداق ئادەم ئۆلۈش ياكى يارىلىنىش ۋەقەسى كۆرۈلمىگەن، تۇرالغۇ بىنالىرىمۇ زىيانغا ئۇچرىمىغان. نۆۋەتتە ئوت ئاپىتىنى پۈتۈنلەي كونتىرول ئاستىغا ئېلىش خىزمىتى داۋاملىشىۋاتقان بولۇپ، يېزىلارنىڭ كىرىش-چىقىش ئېغىزلىرىدا دۆلەت خەۋپسىزلىك كۈچلىرى تەرىپىدىن قاتتىق بىخەتەرلىك تەدبىرلىرى يولغا قويۇلدى. كۆچۈرۈلگەن ئاھالىلەر مۇۋاپىق ئورۇنلارغا ئورۇنلاشتۇرۇلدى.
