مىسىر پرېزىدېنتى ئابدۇلفەتتاھ ئەسسىسى سەئۇدى ئەرەبىستان بىلەن يەمەندىكى ھۇسىي قوراللىقلىرى ئوتتۇرىسىدا توقۇنۇشلار كەسكىنلەشكەن بىر مەزگىلدە، تەلەپ قىلىنغان تەقدىردە دۆلىتىنىڭ سەئۇدى ئەرەبىستاننى قوغداشقا تەييار ئىكەنلىكىنى ئېلان قىلدى.
سىسى شەنبە كۈنى مىسىر ھەربىي ئاكادېمىيەسىدە ئۆتكۈزۈلگەن ئوقۇش پۈتتۈرۈش مۇراسىمىدا سۆز قىلىپ، سەئۇدى ئەرەبىستاننىڭ زىيانغا ئۇچرىشى ياكى بىخەتەرلىكى ۋە مۇقىملىقىنىڭ تەھدىتكە ئۇچرىشىغا قارىتا مىسىرنىڭ قاراپ تۇرۇشىنى «تەسەۋۋۇر قىلغىلى بولمايدىغانلىقىنى» ئېيتتى.
سىسى: «مىسىر ئەلۋەتتە پادىشاھ سالمان ۋە ۋەلىئەھد شاھزادە مۇھەممەد بىن سەلماننىڭ يوليورۇقلىرىغا ئاساسەن، سىلەرنى قوغداش ياكى مۇداپىئە قىلىش ئۈچۈن كېرەكلىك بولغان ھەر خىل تەدبىرلەرنى ئالىدۇ» دېدى.
مىسىرنىڭ رايون خاراكتېرلىك توقۇنۇشلاردا «ئۆزىگە بىر رول ئىزدىمەيدىغانلىقىنى» تەكىتلىگەن سىسى، ئېھتىماللىقى بولغان بىر ھەربىي ئورۇنلاشتۇرۇشنىڭ پارلامېنتنىڭ تەستىقىدىن ئۆتۈشى كېرەكلىكىنى بىلدۈردى.
سىسى مۇنداق بىر تەلەپ ئوتتۇرىغا قويۇلغان تەقدىردە، پارلامېنت ئەزالىرىنىڭ ھوقۇق بېرىش ئۈچۈن پەۋقۇلئاددە بىر يىغىندا جەم بولۇشىنى ئۈمىد قىلىدىغانلىقىنى ئېيتتى.
سىسى: «ھېچكىم بىلەن ئۇرۇش قىلىش ياكى ھېچكىمگە ھۇجۇم قىلىش توغرىسىدا سۆز قىلىۋاتقىنىم يوق.پەقەتلا قوغدىنىشتىن سۆز قىلىۋاتىمىز» دېدى.
يەمەندە ئۇرۇش ئىيۇل ئېيىدا قايتىدىن ئۇلغايغاندىن بۇيان ھۇسىي قوراللىقلىرى ئېنېرگىيە ئەسلىھەلىرى ۋە رىياد خەلقئارالىق ئايرودورۇمىنى ئۆز ئىچىگە ئالغان سەئۇدى ئەرەبىستاندىكى نىشانلارغا كۆپ قېتىم ھۇجۇم قىلدى. ئۆتكەن ھەپتە ئايرودورۇمغا قىلىنغان ھۇجۇملارنىڭ بىرىدە 13 كىشى ھاياتىدىن ئايرىلدى.
ھۇسىي قوراللىقلىرى يەنە بابۇلمەندەپ بوغۇزىنى قامال ئاستىغا ئالغان بولسا، ئىراننىڭ ھورمۇز بوغۇزىغا قاراتقان قامىلىنىڭ داۋاملىشىشى ئېنېرگىيە ئېكسپورتى ئۈستىدىكى بېسىمنى ئاشۇرۇۋەتتى.
قىزىل دېڭىزدا دېڭىز تىرانسپورتىغا دائىر ئەندىشىلەر
سەئۇدى ئەرەبىستان ۋەلىئەھد شاھزادىسى مۇھەممەد بىن سەلمان بىلەن سىسى، ئۆتكەن ئايدا مىسىرغا قىلىنغان زىيارەت جەريانىدا، ھاياتىي ئەھمىيەتكە ئىگە بىر سودا لىنىيەسى بولغان قىزىل دېڭىزدا دېڭىز قاتنىشىنىڭ ئەركىن ۋە بىخەتەر شەكىلدە داۋاملاشتۇرۇلۇشىغا چاقىرىق قىلغان ئىدى.
توقۇنۇشلار سەئۇدى ئەرەبىستاننىڭ بىخەتەرلىكى ۋە ئېنېرگىيە ئېكسپورتىدىن باشقا، مىسىرنىڭ مۇھىم چەتئەل پېرېۋوتى مەنبەلىرىدىن بىرى بولغان سۈۋەيىش قانىلىدىن كىرىدىغان كىرىملىرىگىمۇ تەھدىت بولماقتا.
