يەرلىك ئاخبارات ۋاسىتىلىرىنىڭ خەۋەر قىلىشىچە، ئامېرىكا، جەنۇبىي كورېيە ۋە ياپونىيە دۈشەنبە كۈنى ھەر خىل ساھەلەردە ھەربىي ھەرىكەت ۋە ئورتاق تاقابىل تۇرۇش ئىقتىدارلىرىنى كۈچەيتىشنى مەقسەت قىلغان بەش كۈنلۈك ئورتاق ھەربىي مانىۋېر باشلىغان.
«يونخاپ» خەۋەر ئاگېنتلىقى كورېيە ئارمىيە باش ئىشتابىنىڭ باياناتىنى مەنبە قىلاغان ھالدا، «Freedom Edge» مانىۋېرىنىڭ جەنۇبىي كورېيەنىڭ چېجۇ ئارىلىنىڭ شەرق ۋە جەنۇبىدىكى خەلقئارا دېڭىز تەۋەلىكىدە باشلانغانلىقىنى خەۋەر قىلدى.
بۇ مانىۋېر ئامېرىكا پىرېزىدېنتى دونالد ترامپ ھۆكۈمىتىنىڭ شىمالىي كورېيەنى سۆھبەتكە قايتىشقا ئۈندەش ئۈچۈن ئۆتكەن ئاي جەنۇبىي كورېيە بىلەن ئۆتكۈزۈلگەن ئۆزئارا«Ulchi Freedom Shield» مانىۋېرىنى قىسقارتقان بولۇشىغا قارىماي، ئەسلىدىكى پىلان بويىچە باشلاندى.
ئارمىيە باش ئىشتابى مۇنداق دېدى: «ئۈچ دۆلەت مۇستەھكەم ۋە تۇراقلىق ھەمكارلىق مۇناسىۋىتىنى داۋاملاشتۇرۇش بىلەن بىرگە، مەشىقلەرنى دېڭىز، ھاۋا ۋە تور ساھەلىرىنى ئۆز ئىچىگە ئالغان ھەر خىل ساھەلەردە ھەربىي ھەرىكەت ئىقتىدارلىرى ۋە ئورتاق تاقابىل تۇرۇش ئىقتىدارلىرىنى يۈكسەلدۈرۈش ئۈچۈن ئىشلىتىدۇ»
مانىۋېرغا ئۈچ دۆلەتنىڭ مۇھىم دېڭىز ۋە ھاۋا كۈچلىرى قاتنىشىدىغان بولۇپ، ھەرىكەتلەرنىڭ سىستېمىلىق ۋە بىخەتەر ئېلىپ بېرىلىشىغا كاپالەتلىك قىلىش ئۈچۈن بىر مەشىق كونترول گۇرۇپپىسى بولىدۇ.
جەنۇبىي كورېيە ئارمىيەسى مەشىقلەرنىڭ شىمالىي كورېيەنىڭ يادرو ۋە باشقۇرۇلىدىغان بومبا تەھدىتلىرىگە قارشى تۇرۇش ۋە تاقابىل تۇرۇش ئىقتىدارلىرىنى كۈچەيتىش بىلەن بىرگە، رايون خاراكتېرلىك تىنچلىق ۋە مۇھىملىقنى قوغداشنى مەقسەت قىلىدىغانلىقىنى بىلدۈردى.
شىمالىي كورېيە بولسا بۇ دۆلەتلەر ئۆتكۈزگەن ھەربىي مانىۋېرلارنىڭ ئۇرۇش سىنىقى ئىكەنلىكىنى ئېيتماقتا.
«يونخاپ» نىڭ مەسىلىگە مۇناسىۋەتلىك مەنبەلەرنى ئاساس قىلغان خەۋىرىدە، ئۈچ دۆلەت ئېگىس (Aegis) سىستېمىسى بىلەن تەمىنلەنگەن ئالتە قوغدىغۇچى پاراخوت بىلەن دېڭىز چارلاش ئايروپىلانلىرى، ئۇرۇش ئايروپىلانلىرى ۋە ماي قاچىلاش ئايروپىلانلىرىنىڭ ۋەزىپە ئۆتەيدىغانلىقىنى يازدى.
