تاشقى ئىشلار مىنىستىرى خاقان فىدان ئامېرىكانىڭ جورجىيە ئىشىتاتىنىڭ ئاتلانتا شەھىرىدە ئۆتكۈزۈلگەن G20 تاشقى ئىشلار مىنىستىرلىرى يىغىنى ھارپىسىداö ئامېرىكا تاشقى ئىشلار مىنىستىرى ماركو رۇبىيو بىلەن كۆرۈشتى.

تاشقى ئىشلار مىنىستىرلىقى مەنبەلىرىدىن ئىگىلەنگەن ئۇچۇرلارغا قارىغاندا، مىنىستىر فىدان ئامېرىكا تاشقى ئىشلار مىنىستىرى  ماركو رۇبىيو بىلەن بىر يەرگە جەم بولغان. سۆھبەتتە، ئىككى تەرەپلىك مەسىلىلەردىن تاشقىرى، ئامېرىكا بىلەن ئىران

ئوتتۇرىسىدىكى كېلىشىم مۇساپىسى، غەززەدىكى ۋەزىيەت، رۇسىيە-ئۇكرائىنا ئۇرۇشى ۋە باشقا رايونلۇق مەسىلىلەر مۇھاكىمە قىلىنغان.

يەنە شۇ مەنبەلەرگە ئاساسلانغاندا، تاشقى ئىشلار مىنىستىرى فىدان G20 تاشقى ئىشلار مىنىستىرلىرى يىغىنىغا قاتناشقان. ئىككى كۈن داۋاملىشىدىغان يىغىننىڭ بىرىنچى كۈنىدە مىنىستىر فىدان «گېئوسىياسىي جىددىيلىكلەر» ۋە «ئېنېرگىيە» تېمىلىق بۆلۈملەردە تۈركىيەگە ۋاكالىتەن سۆز قىلغان.

مىنىستىر فىدان يەنە ھىندونېزىيە تاشقى ئىشلار مىنىستىرى ئارماناتا كىرىستىياۋان ناسىر بىلەنمۇ كۆرۈشكەن.

ئۇ ياپونىيە تاشقى ئىشلار ۋەزىرى توشىمىتسۇ موتېگى بىلەنمۇ ئۇچرىشىپ، سودا ۋە مەبلەغ سېلىش ساھەلىرىدىكى مۇناسىۋەتلەرنى تېخىمۇ تەرەققىي قىلدۇرۇپ، بۇنى يېڭى ساھەلەرگە كېڭەيتىشنىڭ مۇھىملىقىنى ۋە ئۆزئارا مەبلەغ سېلىشنى كۆپەيتىشنى تەكىتلەش بىلەن بىرگە، تۈركىيە-ياپونىيە شىركەتلىرىنىڭ ئۈچىنچى دۆلەتلەردىكى ھەمكارلىقىنى كۈچەيتىشنىڭ زۆرۈرلۈكىگە دىققەت تارتقان.

ئۇچرىشىشتا، ئىككى دۆلەت ئوتتۇرىسىدا ئالدىمىزدىكى مەزگىللەردە ئەمەلگە ئاشۇرۇلىدىغان زىيارەتلەردىن سىرت، ئاسىيا-تىنچ ئوكيان ۋە ئوتتۇرا شەرق رايونلىرىدىكى ئۆزگىرىشلەرمۇ مۇزاكىرە قىلىنغان.