ئىگىلىنىشىچە، ئىراننىڭ پايتەختى تېھراندا تۈركىيە، سەئۇدى ئەرەبىستان، پاكىستان ۋە ئىران ۋەكىللەر ئۆمەكلىرى ئوتتۇرىسىدا ئۆتكۈزۈلگەن مۇھىم تۆت تەرەپلىك يىغىننىڭ رەسمىي خۇلاسە باياناتى ئېلان قىلىندى. مەزكۇر يىغىندا نۆۋەتتىكى رايون خەۋپسىزلىكى، ئىسرائىلىيەنىڭ رايوندا ئېلىپ بېرىۋاتقان پائالىيەتلىرى، شۇنداقلا پەلەستىن ۋە لىۋاندا يۈز بېرىۋاتقان ئەڭ يېڭى ئۆزگىرىشلەر چوڭقۇر مۇزاكىرە قىلىندى.
خۇلاسە باياناتىدا، بۇ تۆت دۆلەت ئوتتۇرىسىدىكى ئىستراتېگىيەلىك ھەمكارلىقنى كۈچەيتىش ۋە كېڭەيتىش مەقسىتىدە كەلگۈسىدىكى سۆھبەتلەرنى ئىزچىل داۋاملاشتۇرۇش توغرىسىدا ئورتاق تونۇش ھاسىل قىلىنغانلىقى تەكىتلەندى.
بۇ قېتىمقى يىغىنغا ئىران ئالىي دۆلەت خەۋپسىزلىك كېڭىشىنىڭ باش كاتىپى مۇھسىن رىزائىي ئۆزى ساھىبخانىلىق قىلغان بولۇپ، يىغىنغا يەنە ئىران پىرېزىدېنتى مەسئۇد پەزېشكىيان ۋە ئىران تاشقى ئىشلار مىنىستىرى ئابباس ئاراقچىمۇ قاتناشتى.
يىغىندا تۈركىيە تەرەپكە دۆلەتلىك مىللىي ئىستىخبارات ئىدارىسى (MİT) نىڭ باشلىقى ئىبراھىم قالىن، سەئۇدى ئەرەبىستان تەرەپكە دۆلەت مۇداپىئە مىنىستىرى شاھزادە خالىد بىن سەلمان، پاكىستان تەرەپكە بولسا قوراللىق قىسىم باش ئىشتاب باشلىقى ئاسىم مۇنىر قاتارلىق يۇقىرى دەرىجىلىك ئەربابلار ۋەكىللىك قىلدى.
