ئۇكرائىنا دۆلەتلىك جىددىي ئەھۋاللارغا تاقابىل تۇرۇش مەھكىمىسى (DSNS) ئاممىۋى ئورتاقلىشىش تور بېتىدىكى سەھىپىسىدە ئېلان قىلغان باياناتىدا، رۇسىيە ئارمىيەسىنىڭ تۈنۈگۈن كېچىدىن بۇيان ئۇكرائىناغا ھاۋا ھۇجۇمى قىلىۋاتقانلىقىنى بىلدۈردى.
باياناتتا، ھۇجۇملاردا پايتەخت كىيېۋنىمۇ ئۆز ئىچىگە ئالغان دۆلەتنىڭ ئوخشىمىغان رايونلىرىنىڭ نىشان قىلىنغانلىقى ئەسكەرتىلدى. شۇنداقلا مەزكۇر ھۇجۇملار سەۋەبىدىن 4 كىشىنىڭ ھاياتىدىن ئايرىلغانلىقى، 35 كىشىنىڭ يارىلانغانلىقى قەيت قىلىندى.
كىيېۋ شەھەر باشلىقى ۋىتالىي كلىچكومۇ ئاممىۋى ئورتاقلىشىش تور بېتىدىكى سەھىپىسىدە ئېلان قىلغان باياناتىدا، رۇسىيەنىڭ بۈگۈن كېچە پايتەختكە قىلغان ھۇجۇمىدا بىر كىشىنىڭ ھاياتىدىن ئايرىلغانلىقىنى، 21 كىشىنىڭ يارىلانغانلىقىنى ئېيتتى.
ئۇكرائىنا ھاۋا ئارمىيەسى قوماندانلىق ئىشتابىنىڭ باياناتىدا، رۇسىيەنىڭ ئۇكرائىناغا قاراتقان ھۇجۇملىرىدا ئىشلەتكەن ئوخشىمىغان تىپتىكى 186 دانە ئۇچقۇچىسىز ھاۋا ئاپپاراتىدىن 150 دانىسىنىڭ يوقىتىلغانلىقى بىلدۈرۈلدى.
رۇسىيە ئارمىيەسىنىڭ بۇ ھۇجۇملاردا باشقۇرۇلىدىغان بومبىلارنىمۇ ئىشلەتكەنلىكى قەيت قىلىنغان باياناتتا، ئۇكرائىنانىڭ ئوخشىمىغان رايونلىرىغا قارىتىلغان ھاۋا ھۇجۇملىرىنىڭ داۋاملىشىۋاتقانلىقى تەكىتلەندى.
