كۇبا ھۆكۈمىتى دومىنىكا جۇمھۇرىيىتىنىڭ مەزكۇر قارارىغا قاتتىق نارازىلىق بىلدۈرۈپ، سانتو دومىنگو دائىرىلىرىنى «ئامېرىكانىڭ بېسىمى ئاستىدا ھەرىكەت قىلىۋاتىدۇ» دەپ ئەيىبلىدى.

كۇبا تاشقى ئىشلار مىنىستىرلىقى ئېلان قىلغان يازما باياناتتا كۆرسىتىلىشىچە، دومىنىكا جۇمھۇرىيىتىنىڭ كۇبالىق دىپلوماتلارنى چېگرادىن چىقىرىۋېتىش قارارىنى ئاقلايدىغان ھېچقانداق ئورۇنلۇق سەۋەب يوق. باياناتتا، مەزكۇر دىپلوماتلارنىڭ 1961-يىلىدىكى «دىپلوماتىك مۇناسىۋەتلەر توغرىسىدىكى ۋىيېننا ئەھدىنامىسى» گە ۋە دومىنىكا جۇمھۇرىيىتىنىڭ قانۇنلىرىغا تولۇق ئەمەل قىلغان ھالدا خىزمەت قىلغانلىقى ئالاھىدە تەكىتلەندى.

باياناتتا يەنە: «بۇ قەدەمنى دومىنىكا جۇمھۇرىيىتى ھۆكۈمىتىنىڭ ئامېرىكا ھۆكۈمىتىدىن كەلگەن بېسىمغا باش ئەگكەنلىكىدىن باشقا ھېچقانداق سەۋەب بىلەن چۈشەندۈرگىلى بولمايدۇ» دېيىلدى. شۇنداقلا، ھاۋانا دائىرىلىرى ۋاشىنگتوننى كۇبانى يەكلەش ۋە ئۇنىڭ رايوندىكى باشقا دۆلەتلەر بىلەن بولغان دىپلوماتىك مۇناسىۋەتلىرىگە زىيان يەتكۈزۈشكە ئۇرۇنۇش بىلەن ئەيىبلىدى.

باياناتتا، دومىنىكا جۇمھۇرىيىتىنىڭ كۇبانى كېچىكتۈرۈلگەن 10-نۆۋەتلىك ئامېرىكا قىتئەسى باشلىقلار يىغىنىغا قاتناشتۇرماسلىقى ۋە بىرلەشكەن دۆلەتلەر تەشكىلاتى (ب د ت) ئومۇمىي كېڭىشىدە ئامېرىكانىڭ كۇباغا يۈرگۈزۈۋاتقان ئېمبارگوسىغا قارشى تەييارلانغان قارار لايىھەسىگە بېلەت تاشلاش مەيدانىنى ئۆزگەرتىشى قاتارلىقلار، «سانتو دومىنگونىڭ ۋاشىنگتون تەرەپتە تۇرغانلىقىنىڭ ئېنىق ئىپادىسى» دەپ باھالاندى.

مەزكۇر قارارنىڭ ئىككى دۆلەت ھۆكۈمەتلىرى ئوتتۇرىسىدىكى مۇناسىۋەتلەرگە «ئېغىر زىيان يەتكۈزىدىغانلىقى» ئەسكەرتىلگەن باياناتتا، شۇنداق بولسىمۇ، بۇ ئىشنىڭ كۇبا بىلەن دومىنىكا خەلقلىرى ئوتتۇرىسىدىكى چوڭقۇر يىلتىز تارتقان دوستلۇق رىشتىسىگە زىيان يەتكۈزمەيدىغانلىقى قەيت قىلىندى.

دومىنىكا جۇمھۇرىيىتى تاشقى ئىشلار مىنىستىرلىقى تۈنۈگۈن ھېچقانداق سەۋەب كۆرسەتمەيلا، ۋىيېننا ئەھدىنامىسى بەرگەن ھوقۇققا ئاساسەن، كۇبانىڭ 10 نەپەر دىپلوماتىك خادىمى ۋە ئۇلارنىڭ ئائىلە تاۋابىئاتلىرىنىڭ 7 كۈن ئىچىدە دۆلەتتىن چىقىپ كېتىشىنى تەلەپ قىلغان ئىدى.