چارشەنبە كۈنى بالىدىن (Bali) لومبوكقا (Lombok) كېتىۋاتقان بىر يولۇچىلار پاراخوتى لومبوك بوغۇزىدا ئوت كېتىپ، بىر كىشى جېنىدىن ئايرىلدى. پاراخوتتىكى 211 كىشى قۇتقۇزۇۋېلىندى.

ئەمەلدارلارنىڭ ئېيتىشىچە، پەيشەنبە (2026-يىلى 13-ئاۋغۇست) كۈنى قۇتقۇزۇش خادىملىرى ھىندونېزىيەنىڭ بالى ئارىلىغا يېقىن لومبوك بوغۇزىدا، پاراخوتتا ئوت كېتىش ۋەقەسىدىن كېيىن يوقالغان بەش كىشىنى ئىزدىمەكتە ئىكەن. ۋەقەدە بىر يولۇچى جېنىدىن ئايرىلغان بولۇپ، ئونلىغان يولۇچى دېڭىزغا سەكرەشكە مەجبۇر بولغان.

چارشەنبە كۈنى نەق مەيدانغا يېتىپ بارغان ھەربىي پاراخوت ۋە ئەتراپتىكى يەنە بىر يولۇچىلار پاراخوتى جەمئىي 211 كىشىنى قۇتقۇزۇپ قىرغاققا ئېلىپ چىققان.

ۋەقەدە 19 ياشلىق بىر ھىندونېزىيەلىك ئايالنىڭ جەسىتى تېپىلغان.

لومبوك ئارىلىدىكى ماتارام قۇتقۇزۇش ئىشخانىسىنىڭ باياناتىدا دېيىلىشىچە، پەيشەنبە كۈنىگە كەلگەندە قۇتقۇزۇش خىزمىتىنىڭ مۇھىم نۇقتىسى يەنىلا ئىز-دېرىكى يوق بەش يولۇچىنى ئىزدەشكە قارىتىلغان.

مەزكۇر پاراخوت چارشەنبە كۈنى سەھەردە بالىدىن لومبوكقا كېتىۋاتقاندا ۋەقەگە يولۇققان.

باياناتتا قۇتقۇزۇش ئەمەلدارى مۇھەممەت ھارىيادىنىڭ مۇنداق دېگەنلىكى نەقىل كەلتۈرۈلدى: «بىۋاسىتە ئىزدەشتىن سىرت، بىز يەنە لومبوك بوغۇزىدىن ئۆتكەن پاراخوتلارغا دەسلەپكى ياردەمدە بولۇشنى ياكى قۇربانلارنى ئۇچراتسىلا دەرھال قوماندانلىق مەركىزىگە خەۋەر قىلىشنى بۇيرۇدۇق.»

مۇناسىۋەتلىك ئۇچۇرلارTRT World - Indonesia shuts schools as wildfire haze blankets parts of archipelago

ۋەقەگە يولۇققانلار مالىمانچىلىق ئىچىدىكى تارقاقلاشتۇرۇشنى ئەسلىدى

ۋەقەدە ئامان قالغان 25 ياشلىق كىكى ئوكتا پرادىكا (Kiky Okta Pradika) چارشەنبە كۈنى لومبوكتىكى لېمباردا مۇخبىرلارغا ئۆزىنىڭ باشقا بىر قانچە يولۇچى بىلەن بىرلىكتە پاراخوتتىن سەكرەشتىن بۇرۇن بىر قۇتقۇزۇش كىيىمىنى ئالغانلىقىنى ئېيتىپ: «ياردەم كەلگۈچە بىر قانچە سائەت ئۆتتى» دېدى.

يەنە بىر تىرىك قالغان 45 ياشلىق سۇترىسنا (Sutrisna) ئاپەتكە ئۇچرىغان پاراخوتتىن قۇتقۇزۇش قولۋاقلىرى چۈشۈرۈلگەندە يولۇچىلارنىڭ ۋەھىمىگە چۈشۈپ، قۇتقۇزۇش كىيىمى تالاشقانلىقىنى ئەسلەپ مۇنداق دېدى: «تارقاقلاشتۇرۇش ئىنتايىن قىيىن بولدى، چۈنكى دولقۇن بەك چوڭ ئىدى، قۇتقۇزۇش پاراخوتى كەلگەندە دولقۇن بىز ئولتۇرغان پاراخوتتىنمۇ ئىگىز ئىدى.»

17 مىڭدىن ئارتۇق ئارالدىن تەركىب تاپقان ۋە كۈندىلىك قاتناش ھەم ساياھەتتە پاراخوتقا تايىنىدىغان ھىندونېزىيەدە، دېڭىز ۋەقەلىرى دائىم يۈز بېرىپ تۇرىدۇ. بىخەتەرلىك ئۆلچەملىرىنىڭ بوشلۇقى ۋە مۆلچەرلىگۈسىز ھاۋا رايى بۇ خىل ئاپەتلەرنىڭ ئارقىسىدىكى ئاساسلىق سەۋەبلەرنىڭ بىرى ھېسابلىنىدۇ.

ئۆتكەن ھەپتىمۇ جاۋا (Java) ئارىلىغا يېقىن جايدا بىر پاراخوتقا ئوت كېتىپ بەش كىشى جېنىدىن ئايرىلغان ئىدى.

ئۆتكەن ئايدا سۇلاۋېسىنىڭ جەنۇبىدىكى كىچىك ئارال سېلايارغا (Selayar) يېقىن جايدا 70 تىن ئارتۇق يولۇچى بار بىر پاراخوت چۆكۈپ كەتكەن. ئىزدەش-قۇتقۇزۇش خىزمىتى ئاخىرلىشىشتىن بۇرۇن تۆت جەسەت تېپىلغان بولۇپ، 14 كىشى رەسمىي تىزىملىكتە يەنىلا يوقاپ كەتكەن دەپ ھېسابلانماقتا.

مۇناسىۋەتلىك ئۇچۇرلارTRT World - Malaysian pilot faces death penalty in Indonesia over alleged drug smuggling