قىرغىزىستاننىڭ پايتەختى بىشكەكتە ئېلىپ بېرىلغان مەمۇرىي ۋە رايونلۇق ئىسلاھاتتىن كېيىن، تەكرارلىنىپ قالغان ناملارنى يوقىتىش ۋە قاتناش لىنىيەلىرىنى ئاددىيلاشتۇرۇش مەقسىتىدە، نۇرغۇن كوچا - كويلار بىرلەشتۈرۈلۈپ، مىللىي ناملار بىلەن قايتىدىن ئاتالدى.

بىشكەك شەھەرلىك مەجلىسىنىڭ قارارى بىلەن، ئوخشىمىغان نامدىكى نۇرغۇن كوچىلار بىرلا نام ئاستىدا توپلانغان. يېڭى بەلگىلىمىگە ئاساسلانغاندا، 2010-يىلى 7-ئاپرېلدىكى خەلق ئىنقىلابىدىن كېيىن قويۇلغان «7-ئاپرېل» دېگەن نامنىڭ قىسقارتىلغانلىقى دىققەت قوزغىدى. شۇنداقلا سابىق سوۋېت ئىتتىپاقى دەۋرىدىن قالغان پۇتېپروۋودنايا، مولوتايا گۋاردىيە، سېلېكسىيوننايا، مۇرومسكايا، پوپېدا، ۋاسىلىيېۋىسكىي تراكت، ماكسىم گوركىي، ئوكرايننايا، نابېرېژنايا ۋە سېنترالنايا بېرېگوۋايا قاتارلىق ناملارنىڭ ئەمدى ئىشلىتىلمەيدىغانلىقى مەلۇم بولدى.

يېڭىلانغان ناملارغا ئاساسەن، بىر مىليون 500 مىڭ نوپۇسلۇق بىشكەك شەھىرى چۇي، جىبەك يولى، چىڭگىز ئايتماتوۋ ۋە ئالى توكومبايېۋ قاتارلىق ئاساسلىق كوچىلاردىن تەشكىل تاپتى. ئاساسلىق كوچىلارغا بولسا ماناس، شابدان باتىر، جۈسۈپ ئابدراخمانوۋ، قۇرمانجان داتكا، ئىمانالى ئايداربېكوۋ، ئابسامات مەسالىيېۋ، ئەنقەرە (تۈركىيەنىڭ پايتەختى)، ماخاتما گەندى (ھىندىستاننىڭ سابىق رەھبىرى) ۋە دېڭ شياۋپىڭ (خىتاينىڭ سابىق رەھبىرى) قاتارلىق ناملار بېرىلدى.

قىرغىزىستان پىرېزىدېنت سارىيى جايلاشقان چىڭگىز ئايتماتوۋ ۋە ماناس كوچىلىرى بىرلەشتۈرۈلۈپ «چىڭگىز ئايتماتوۋ كوچىسى» دەپ ئاتالدى. شەھەرنىڭ شەرق بىلەن غەربىنى تۇتاشتۇرىدىغان مىخايىل فرۇنزې، دېڭ شياۋپىڭ، چۇي ۋە شابدان باتىر كوچىلىرى «چۇي كوچىسى» غا ئۆزگەرتىلدى. باشقا نۇرغۇن كوچىلارمۇ ئوخشاش ئۇسۇلدا بىرلا نام ئاستىدا جەم قىلىندى. مەسىلەن، ماكسىم گوركىي ۋە ئەنقەرە كوچىلىرى «ئەنقەرە كوچىسى» دەپ ئاتالدى.

مەمۇرىي ئىسلاھات نەتىجىسىدە يەر مەيدانى تەخمىنەن ئۈچ ھەسسە كېڭەيگەن بىشكەكتە، ئەتراپتىكى ئولتۇراق رايونلارنىڭ مەركەزگە قوشۇلۇشى بىلەن كوچا ناملىرىنىڭ تەكرارلىنىپ قېلىش مەسىلىسى كۆرۈلگەن ئىدى. تېخنىكىلىق خىزمەتلەر تاماملانغاندىن كېيىن، بىشكەك شەھەرلىك ھۆكۈمىتى ئاممىۋى قاتناش لىنىيەلىرى، بېكەت ئۇچۇرلىرى ۋە شەھەرنىڭ رەقەملىك ئادرېس خەرىتىسىنىڭ پۈتۈنلەي يېڭىلىنىدىغانلىقىنى ئۇقتۇردى.