ئامېرىكا پېرىزىدېنتى دونالد ترامپ، ئىراننىڭ ئىسرائىلىيەگە قارىتا ئېلىپ بارغان باشقۇرۇلىدىغان بومبا ھۇجۇمىدىن كېيىن تېھران ھۆكۈمىتىنى مۇزاكىرە ئۈستىلىگە قايتىپ كېلىشكە چاقىردى. ترامپ تەرەپلەر ئوتتۇرىسىدا بىر قانچە كۈن ئىچىدە ئاخىرقى بىر تىنچلىق كېلىشىمى ھاسىل قىلىنىشى مۇمكىنلىكىدىن سىگنال بەردى.
ترامپ «Fox News» قانىلىغا بايانات بېرىپ: «باشقۇرۇلىدىغان بومبىلىرىڭلارنى ئاتتىڭلار، مۇشۇنچىلىك قىلغىنىڭلار يېتەرلىك. ئەمدى مۇزاكىرە ئۈستىلىگە قايتىپ كېلىپ، بىر كېلىشىم تۈزۈڭلار» دېدى. ئامېرىكا پېرىزىدېنتى تېھران بىلەن ئېلىپ بېرىلىۋاتقان سۆھبەتلەردە ئاخىرقى ئىمزالارنىڭ ئىنتايىن يېقىنلاپ قالغانلىقىنى تەكىتلەپ: «دۈشەنبە، سەيشەنبە ياكى چارشەنبە كۈنى بىر كېلىشىم ئىمزالىنىشى مۇمكىن» دېدى.
«ھۇجۇملاردىن مەمنۇن ئەمەسمەن»
ئىراننىڭ ھايفا ۋە ناسىرا شەھەرلىرىنى نىشانلىغان باشقۇرۇلىدىغان بومبا ھۇجۇمى، 8-ئاپرېلدا كۈچكە ئىگە بولغان ئۇرۇش توختىتىشتىن كېيىن، ئىسرائىلىيە زېمىنىغا قىلىنغان تۇنجى بىۋاسىتە زەربە بولدى. بۇ ھۇجۇم ئىسرائىلىيەنىڭ يەكشەنبە كۈنى ئەتىگەن تەرەپلەردە لىۋاننىڭ پايتەختى بەيرۇتقا قىلغان بومباردىمانچىلىقىدىن كېيىن ئېلىپ بېرىلدى.
ئىسرائىلىيەنىڭ لىۋانغا قاراتقان ھۇجۇملىرى ئۈستىدىمۇ توختالغان ترامپ، بۇ ھەربىي مەشغۇلاتلارنىڭ ئامېرىكا بىلەن ماسلاشقان ھالدا ئېلىپ بېرىلمىقانلىقىنى تەكىتلىدى. ترامپ بەيرۇتتا ھىزبۇللاھنى نىشانلىغان ھۇجۇملاردىن «مەمنۇن ئەمەسلىكىنى» تىلغا ئالدى.
ترامپ نېتانياھۇغا تېلېفوندا «قايتۇرما زەربە بەرمە» دېدى
ئىراننىڭ ھۇجۇملىرىدا ھېچكىمنىڭ زىيانغا ئۇچرىمىغانلىقىنى بىلدۈرگەن ترامپ، ئىسرائىلىيەنىڭ بۇ قىلمىشقا قايتۇرما جاۋاب قايتۇرماسلىقىنى ئۈمىد قىلىدىغانلىقىنى ئېيتتى. ئۆزئارا قايتۇرما زەربە بېرىشلەرنىڭ تۈگىمەس بىر ئايلانما ئۇرۇش قالايمىقانچىلىققا يول ئاچىدىغانلىقىنى تەكىتلىگەن ترامپ: «ئۆزئارا ھۇجۇملار خۇددى ئۆتكەن 47 يىلدا ياكى ئاخىرقى 3 مىڭ يىلدا بولغىنىدەكلا ئۈزلۈكسىز داۋاملىشىپ كېتىۋېرىدۇ» دەپ ئاگاھلاندۇردى.
ترامپ، ئىسرائىلىيە باش مىنىستىرى بىنيامىن نېتانياھۇنىڭ لىۋان بىلەن «ئۈزلۈكسىز ئۇرۇش قىلىش» يۆنىلىشىدىكى پوزىتسىيەسىدىن «بىئارام بولۇۋاتقانلىقىنى» مۇ سۆزىگە ئىلاۋە قىلدى.
رايون خاراكتېرلىك جىددىيچىلىكنىڭ تېخىمۇ ئەۋج ئېلىپ كېتىشىنىڭ ئالدىنى ئېلىش مەقسىتىدە ھەرىكەتكە ئۆتكەنلىكىنى بىلدۈرگەن ئامېرىكا پېرىزىدېنتى، «Axios» غا بەرگەن باياناتىدا، نېتانياھۇغا تېلېفون قىلىپ، ئىرانغا قارىتا قايتۇرما زەربە بەرمەسلىكنى تاپىلىغانلىقىنى ئېيتتى.
