تاشقى ئىشلار مىنىستىرلىقى مەنبەلىرىنىڭ مەلۇماتلىرىغا قارىغاندا، مىنىستىر خاقان فىدان ئەتە بۇلغارىيەدە رەسمىي ئۆتكۈزىدىغان سۆھبەتلەردە، بۇلغارىيە بىلەن ئېنېرگىيە، قاتناش، ئالاقە ۋە دۆلەت مۇداپىئە سانائىتى قاتارلىق ئىستراتېگىيەلىك ساھەلەردىكى ھەمكارلىقنى تېخىمۇ تەرەققىي قىلدۇرۇشنى نىشان قىلغان ئورتاق قەدەملەرنى تاشلاش ۋە يېڭى ھەمكارلىق پۇرسەتلىرىنى يارىتىش ھەققىدە تەپسىلىي مۇزاكىرە ئېلىپ بارىدىكەن.
خاقان فىدان بۇلغارىيەنىڭ تۈركىيە ئۈچۈن ياۋروپاغا قۇرۇقلۇق تىرانسپورتىدا ھالقىلىق رول ئويناۋاتقانلىقىنى تىلغا ئېلىپ، تۈركىيەدىن بۇلغارىيەگە مال ۋە يولۇچىلارنىڭ ئۆتۈشىنىڭ توسالغۇسىز ئەمەلگە ئېشىشىغا بولغان ئۈمىدلىرىنى يەتكۈزىدىكەن. خاقان فىدان تۈركىيەنىڭ ياۋروپا ئىتتىپاقىغا ئەزا بولۇش ئىستراتېگىيەلىك نىشانىنىمۇ ئۆز ئىچىگە ئالغان ياۋروپا ئىتتىپاقى بىلەن بولغان مۇناسىۋەتلىرىدىكى مۇھىم نۇقتىلارنى ۋە كۈتكەن ئۈمىدلىرىنى بايان قىلىش بىلەن بىرگە، بۇ جەھەتتە بۇلغارىيەنىڭ قوللىشىغىمۇ زور ئەھمىيەت بېرىدىغانلىقىنى بىلدۈرىدىكەن.
رۇسىيە-ئۇكرائىنا ئۇرۇشىنىڭ ياۋروپا بىخەتەرلىكى ۋە قارادېڭىز رايونىدىكى مۇقىملىققا قاتتىق تەسىر كۆرسىتىشنى داۋاملاشتۇرۇۋاتقانلىقىنى تىلغا ئالىدىغان خاقان فىدان، تۈركىيەنىڭ ئۇرۇشنى ئادىل ۋە ئۇزۇن مۇددەتلىك ھەل قىلىش چارىسى ئاساسىدا ئاخىرلاشتۇرۇشقا قارىتىلغان دىپلوماتىك تىرىشچانلىقلارنى قوللايدىغانلىقىنى يەنە بىر قېتىم تەكرارلايدىكەن.
تاشقى ئىشلار مىنىستىرى خاقان فىدان تۈركىيە، بۇلغارىيە ۋە رۇمىنىيە ئوتتۇرىسىدا تەشكىل قىلىنغان «قارادېڭىز مىناغا قارشى تۇرۇش تەدبىرلىرى خىزمەت گۇرۇپپىسى» (MCM Black Sea) نىڭ قارادېڭىزدىكى كېمە قاتنىشى بىخەتەرلىكى جەھەتتە مۇھىم رول ئويناۋاتقانلىقىنى تەكىتلەيدىكەن.
مىنىستىر خاقان فىدان ئىران بىلەن ئامېرىكا ئوتتۇرىسىدا ئېلىپ بېرىلىۋاتقان سۆھبەتلەرنىڭ ئۈزۈلۈپ قالماي داۋاملىشىشىنىڭ ھالقىلىق ئەھمىيەتكە ئىگە ئىكەنلىكىنى، ئىسرائىلىيەنىڭ غەززە ۋە لىۋاننى ئاساس قىلغان ھالدا ئوتتۇرا شەرقتە ئۇزۇن مۇددەتلىك توقۇنۇش ۋە مۇقىمسىزلىق مۇھىتى يارىتىشنى نىشان قىلىۋاتقانلىقىنى ئوتتۇرىغا قويىدىكەن.
فىدان ئەڭ ئاخىرقى قېتىم 2024-يىلى 29-30-يانۋار كۈنلىرى بۇلغارىيەدە رەسمىي زىيارەتتە بولغان ئىدى.
ئىككى تەرەپ مۇناسىۋەتلىرى
تۈركىيە بىلەن بۇلغارىيە ئوتتۇرىسىدىكى ھەمكارلىق ئىناق قوشنىدارچىلىق مۇناسىۋەتلىرى ۋە ئىتتىپاقداشلىق ئاساسىدا تەرەققىي قىلماقتا.
بۇلغارىيەنىڭ ئەڭ چوڭ سودا شېرىكلىرىنىڭ بىرى بولغان تۈركىيەنىڭ بۇ دۆلەت بىلەن بولغان ئومۇمىي سودا سوممىسى 2025-يىلى 8 مىليارد 400 مىليون ياۋرودىن ئېشىپ كەتكەن ئىدى.
بىر مىليوندىن ئارتۇق قېرىنداش تۈركلەر ياشايدىغان بۇلغارىيە، بالقان رايونىدا ئەڭ كۆپ قېرىنداشلارغا ساھىبخانىلىق قىلىۋاتقان دۆلەت ھېسابلىنىدۇ.
