دۆلەت مۇداپىئە مىنىستىرلىقىنىڭ ئاخبارات ۋە ئاممىۋى ئالاقە ئىشلىرى مەسلىھەتچىسى، قوشۇمچە مىنىستىرلىق باياناتچىسى دېڭىز ئارمىيە بېرىگادا گېنرالى زەكى ئاقتۈرك، ھاۋا ئارمىيەسى قۇرۇلغانلىقىنىڭ 115-يىللىقى مۇناسىۋىتى بىلەن ئىزمىر چىغلىدىكى 2-باش رېئاكتىپ ئايروپىلان بازىسى قوماندانلىق مەركىزىدە ئۆتكۈزۈلگەن ھەپتىلىك مۇخبىرلارنى كۈتۈۋېلىش يىغىنىدا، گىرېتسىيە بىلەن جەنۇبىي قىبرىس رۇم دائىرىلىرىنىڭ قورال سېتىۋېلىشنى كۈچەيتىشى مەسىلىسى ھەققىدە توختالدى.
ئۇ مىنىستىرلىق تەرىپىدىن گىرېتسىيە ۋە جەنۇبىي قىبرىس رۇم دائىرىلىرىنىڭ يېقىنقى مەزگىلدىكى قوراللىنىش پائالىيەتلىرى ھەمدە رايوندىكى ھەربىي تەشەببۇسلىرىنىڭ يېقىندىن ۋە ئەستايىدىللىق بىلەن كۆزىتىلىۋاتقانلىقىنى تەكىتلىدى.
تۈركىيەنىڭ ئەگە دېڭىزى ۋە شەرقىي ئاقدېڭىزدا تىنچلىق، مۇقىملىق ھەم ياخشى قوشنىدارچىلىق مۇناسىۋەتلىرىنى ياقلايدىغانلىقى، شۇنىڭ بىلەن بىر ۋاقىتتا ئۆز ھوقۇق ۋە مەنپەئەتلىرىنى قوغداش جەھەتتىكى قەتئىيلىكىنى داۋاملاشتۇرۇۋاتقانلىقى تەكىتلەنگەن باياناتتا مۇنداق دېيىلدى:
«تۈركىيە ئارمىيەسى دۆلىتىمىزنىڭ ۋە شىمالىي قىبرىس تۈرك جۇمھۇرىيىتىنىڭ بىخەتەرلىكىگە مۇناسىۋەتلىك بارلىق زۆرۈر تەدبىرلەرنى ئالماقتا. رايونىمىزنىڭ ئېھتىياجلىق بولغىنى قوراللىنىش مۇسابىقىلىرى ۋە جىددىيچىلىكنى كۈچەيتىدىغان قەدەملەر ئەمەس، بەلكى خەلقئارا قانۇن ئاساسىدا ھەمكارلىق ۋە دىيالوگ مۇھىتىنى كۈچەيتىشتۇر. بۇنىڭ بىلەن بىر ۋاقىتتا، گىرېتسىيەنىڭ مۇداپىئە چىقىمىنى ئاشۇرۇشى، ئالدى بىلەن گىرېتسىيە خەلقى ئويلىنىشقا تېگىشلىك بىر مەسىلىدۇر.»
