تەجرىبىلىك يېتەكچىلەر ۋە ئۆسۈۋاتقان چولپانلاردىن تەشكىل تاپقان «ئاي-يۇلتۇزلۇق كوماندا»، 24 يىلدىن كېيىن تۇنجى قېتىم قاتنىشىدىغان دۇنيا لوڭقىسى پۇتبول مۇسابىقىسىدىن بۇرۇنقى ئەڭ ئاخىرقى تەييارلىق باسقۇچىنى باشلىۋەتتى.
تۈركىيە دۆلەتلىك ئەرلەر پۇتبول كوماندىسى 2026-يىللىق دۇنيا لوڭقىسى پۇتبول مۇسابىقىسى تەييارلىقىنىڭ ئەڭ ئاخىرقى باسقۇچىغا قەدەم قويدى. كوماندا سەيشەنبە كۈنى ئامېرىكاغا يېتىپ باردى.
كوماندا ئولتۇرغان ئايروپىلان فلورىدا ئىشتاتىنىڭ فورت-لاۋدېردېل شەھىرىگە قوندى، بۇ يەردە ئۇلارنى تۈركىيەنىڭ ئامېرىكادا تۇرۇشلۇق باش ئەلچىسى سادات ئۆنال شۇنداقلا باش كونسۇل رەسۇل شاھىنول قارشى ئالدى.
كوماندا مۇسابىقىگە پۈتۈن زېھنىنى يىغىشتىن ئىلگىرى ۋېنېزۇئېلا كوماندىسى بىلەن ئەڭ ئاخىرقى بىر مەيدان سىناق تەرىقىسىدىكى تەييارلىق مۇسابىقىسى ئۆتكۈزىدۇ.
ۋىنچېنزو مونتېللا رەھبەرلىكىدىكى تۈركىيە كوماندىسى 2002-يىلىدىن بۇيان تۇنجى قېتىم دۇنيا لوڭقىسى پۇتبول مۇسابىقىسىدە مۇسابىقىگە چۈشىدۇ. كوماندا كاپىتان خاقان چاھانئوغلۇ، ئاردا گۈلەر ۋە كەنان يىلدىز قاتارلىق ماھىرلار ئورۇن ئالغان كۈچلۈك بىر ئەترەت بىلەن مۇسابىقىگە ئاتلاندى.
ھەممىنىڭ دىققىتى D گۇرۇپپىسىدا
تۈركىيە كوماندىسى ۋېنېزۇئېلا كوماندىسى بىلەن ئۆتكۈزىدىغان تەييارلىق مۇسابىقىسىدىن كېيىن، D گۇرۇپپىسىدا ئاۋستىرالىيە كوماندىسى بىلەن تۇنجى مەيدان مۇسابىقىسىقىگە چۈشۈشتىن ئىلگىرى، ئارىزونا ئىشتاتىنىڭ مېسا شەھىرىدە دۇنيا لوڭقىسى ئۈچۈن لاگېر قۇرىدۇ.
«ئاي-يۇلتۇزلۇق كوماندا» رىقابەت ئىنتايىن كەسكىن بولىدىغان D گۇرۇپپىسىدىن كېيىنكى باسقۇچقا ئۆرلەش ئۈچۈن، پاراگۋاي ۋە ساھىبخان ئامېرىكا كوماندىلىرى بىلەنمۇ مۇسابىقىلىشىدۇ.
ئامېرىكا، كانادا ۋە مېكسىكانىڭ بىرلىكتە ساھىبخانلىق قىلىشىدا ئۆتكۈزۈلىدىغان ھەمدە جەمئىي 48 كوماندا قاتنىشىدىغان دۇنيا لوڭقىسى مۇسابىقىسى 11-ئىيۇن باشلىنىپ، 19-ئىيۇلغىچە داۋاملىشىدۇ.
