ئامېرىكانىڭ مۇرەسسەچىلىكىدە ئىككى تەرەپ ئوتتۇرىسىدا ئۆتكۈزۈلگەن سۆھبەتلەردە، ئىسرائىلىيەنىڭ لىۋاننىڭ ئىشغالىيەتچى ئىسرائىلىيە كۈچلىرىنىڭ لىۋاننىڭ جەنۇبىدىن چېكىنىشىگە ئالاقىدار تەلىپىنى رەت قىلغانلىقى بىلدۈرۈلدى.
ئىسرائىلىيە دۆلەتلىك تېلېۋىزىيە قانىلى KAN نىڭ خەۋىرىگە ئاساسلانغاندا، لىۋاننىڭ بۇ مەسىلىنى ئامېرىكانىڭ مۇرەسسەچىلىكىدە ئىككى دۆلەتنىڭ ھەربىي ۋەكىللىرى قاتناشقان سۆھبەتلەردە كۈنتەرتىپكە ئېلىپ كەلگەن. ئىسرائىلىيە بولسا مۇرەسسەچىلەرگە چېكىنمەيدىغانلىقىنى ئۇقتۇرغان.
سۆھبەتلەردە يەنە ھىزبۇللاھنىڭ قوراللىرى مەسىلىسىنىمۇ ئۆز ئىچىگە ئالغان تېخىمۇ كەڭ كۆلەملىك بىر ئۇرۇش توختىتىش كېلىشىمى تۈزۈش ئېھتىماللىقىمۇ مۇزاكىرە قىلىنغان.
مەزكۇر قانال لىۋان تاراتقۇلىرىنىڭ خەۋەرلىرىنى نەقىل كەلتۈرۈپ، ئىسرائىلىيە ۋە لىۋان ھەربىي ۋەكىللەر ئۆمەكلىرىنىڭ بىۋاسىتە سۆھبەت ئۆتكۈزمىگەنلىكىنى، بارلىق ئۇچۇرلارنىڭ ئامېرىكا ئارقىلىق يەتكۈزۈلگەنلىكىنى خەۋەر قىلدى.
خەۋەرلەرگە قارىغاندا، لىۋان ئىسرائىلىيەنىڭ ھەربىي ئىشغالىيىتىنى يوللۇق كۆرسىتىش ئۈچۈن ئىشلىتىۋاتقان «يېقىن خەتەر» ۋە «تەھدىتلەرگە جاۋاب قايتۇرۇش» قاتارلىق دەۋالىرى ھەققىدە چۈشەنچە بېرىشنى تەلەپ قىلغان. بۇنىڭدىن باشقا، ئىسرائىلىيەنىڭ، ئىسرائىلىيە ۋە لىۋان ئارمىيەلىرى ئوتتۇرىسىدا بىۋاسىتە ئالاقە مېخانىزمى ئورنىتىلىشىنى ۋە ھىزبۇللاھنى قورالسىزلاندۇرۇش مەسىلىسىدە ھەمكارلىق ئورنىتىلىشىنى تەلەپ قىلغان.
لىۋان بولسا ھەرقانداق شەكىلدىكى بىۋاسىتە ماسلىشىشنى رەت قىلىپ؛ ئالدىنقى نىشاننىڭ ئىسرائىلىيەنىڭ ئىشغالىيىتىگە ۋە ھۇجۇملىرىغا خاتىمە بېرىش ھەمدە ئامېرىكانىڭ مۇرەسسەچىلىكىدە ھاسىل قىلىنغان بەلگىلىمىلەرگە ئەمەل قىلىنىشقا كاپالەتلىك قىلىش ئىكەنلىكىنى ئىلگىرى سۈرمەكتە.
KAN يەنە سۆھبەت جەريانىدا ئىسرائىلىيە ئارمىيەسىنىڭ لىتانى دەرياسىنىڭ شىمالىدىكى ھىزبۇللاھقا تەۋە ئۇچقۇچىسىز ھاۋا ئاپپاراتى ۋە ھەربىي ئەسلىھەلىرىگە زېھنىنى مەركەزلەشتۈرگەنلىكىنى خەۋەر قىلدى.
ئامېرىكا سۆھبەتنى «نەتىجىلىك» دەپ تەسۋىرلىدى
لېكىن ئامېرىكالىق بىر ئەمەلدار يىغىننى «نەتىجىلىك» دەپ باھالاپ، بۇنىڭ ئالدىمىزدىكى مەزگىلدە ئۆتكۈزۈلىدىغان دىپلوماتىك سۆھبەتلەرنىڭ تولۇقلىغۇچىسى بولىدىغانلىقىنى قەيت قىلدى.
پېنتاگوننىڭ ئىككىنچى دەرىجىلىك قوماندانى ئېلبرىج كولبى، ئاممىۋى ئورتاقلىشىش تور بېتى X سەھىپىسىدە ئېلان قىلغان باياناتىدا مۇنداق دېدى:
«بۈگۈن پېنتاگوندا، ئىككى دۆلەت ئوتتۇرىسىدا داۋاملىشىۋاتقان تينچلىق سۆھبەتلىرىنى قوللايدىغان بىخەتەرلىك لىنىيەسى ئۈچۈن ئىسرائىلىيە ۋە لىۋاندىن كەلگەن ھەربىي ۋەكىللەر ئۆمىكىنى كۈتۈۋالدىم. كېلەر ھەپتە تاشقى ئىشلار مىنىستىرلىقىنىڭ رەھبەرلىكىدىكى سىياسىي لىنىيەگە مەلۇمات بېرىدىغان، ھەربىي ئەمەلدارلار ئوتتۇرىسىدا نەتىجىلىك سۆھبەت ئۆتكۈزدۇق.»
ئامېرىكانىڭ مۇرەسسەچىلىكىدە ۋاسىتىلىك سۆھبەتلەردىن كېيىن 17-ئاپرېلدا يولغا قويۇلغان ۋە 17-مايدىن باشلاپ مۇددىتى 45 كۈن ئۇزارتىلغان ئۇرۇش توختىتىش كېلىشىمى كۈچكە ئىگە بولسىمۇ، لېكىن ئىسرائىلىيە لىۋاننىڭ جەنۇبى ۋە باشقا رايونلاردىكى ئىشغالىيىتىنى ھەمدە ھۇجۇملىرىنى داۋاملاشتۇردى.
لىۋان سەھىيە مىنىستىرلىقى 2-مارتتىن بۇيان ئىسرائىلىيە ھۇجۇملىرىنىڭ مەملىكەت مىقياسىدا 3355 كىشىنىڭ ھاياتىدىن ئايرىلىشىغا يول ئاچقانلىقىنى بىلدۈردى.
