جۇمھۇر رەئىس ئەردوغان ۋىيېتنام دۆلەت رەئىسى تو لام بىلەن كۆرۈشتى. كۆرۈشۈشتە تۈركىيە—ۋىيېتنام مۇناسىۋىتى، رايون ۋە دۇنياغا دائىر مەسىلىلەر مۇزاكىرە قىلىندى.
ئەردوغان تۈركىيەنىڭ ئىككى دۆلەت مۇناسىۋىتىنى «ئىستراتېگىيەلىك شېرىكلىك» سەۋىيەسىگە كۆتۈرۈش تەكلىپىگە ۋىيېتنامنىڭ ئىجابىي جاۋاب قايتۇرغانلىقىدىن مەمنۇن بولغانلىقىنى بىلدۈردى. ئۇ يەنە ۋىيېتنام بىلەن مەبلەغ سېلىش، سودا ۋە مۇداپىئە سانائىتىنى ئۆز ئىچىگە ئالغان نۇرغۇن ساھەدىكى ھەمكارلىقنى تەرەققىي قىلدۇرۇش ئۈچۈن خىزمەت قىلىۋاتقانلىقىنى ئېيتتى.
ئەردوغان لىۋىيە پىرېزىدېنتلىق كېڭىشىنىڭ رەئىسى مۇھەممەد يۇنۇس ئەلمەنفى بىلەنمۇ كۆرۈشتى. تۈركىيە—لىۋىيە مۇناسىۋىتى ۋە رايونلۇق، دۇنياۋى مەسىلىلەر مۇزاكىرە قىلىنغان كۆرۈشۈشتە، ئەردوغان تۈركىيەنىڭ لىۋىيەدە مۇقىملىقنىڭ داۋاملىشىشى ئۈچۈن تىرىشچانلىق كۆرسىتىۋاتقانلىقىنى بىلدۈردى. ئۇ دىيالوگ ۋە مۇرەسسەنى نىشان قىلغان مۇساپىنىڭ داۋاملىشىشىنىڭ مۇھىم ئىكەنلىكىنى، تۈركىيەنىڭ لىۋىيە مەنپەئەتىگە ئۇيغۇن بولمىغان ھېچقانداق لايىھەگە قوشۇلمايدىغانلىقىنى تەكىتلىدى.
ئەردوغان ئىككى دۆلەتنىڭ ئېنېرگىيە، مۇداپىئە ۋە كانچىلىق ساھەلىرىدىكى ھەمكارلىقىنى ئاشۇرۇش خىزمەتلىرىنىڭ داۋاملىشىۋاتقانلىقىنى بىلدۈردى.
ئەردوغان ئارقىدىن كۇۋەيت ۋەلىئەھدى ساباھ خالىد ئەلھامەد ئەسساباھ بىلەن كۆرۈشتى. كۆرۈشۈشتە تۈركىيە—كۇۋەيت ئىككى تەرەپ مۇناسىۋىتى، رايون ۋە دۇنياغا دائىر مەسىلىلەر مۇزاكىرە قىلىندى.
ئەردوغان ئىككى دۆلەتنىڭ سودا ۋە ئېنېرگىيەنى ئالدىنقى ئورۇنغا قويغان ھالدا نۇرغۇن ساھەدىكى ھەمكارلىقنى تەرەققىي قىلدۇرۇش ئۈچۈن خىزمەت قىلىۋاتقانلىقىنى بىلدۈردى. ئۇ تۈركىيەنىڭ رايوندىكى مۈشكۈل ۋە توقۇنۇشقا تولغان بۇ مەزگىلدە كۇۋەيتكە ئوخشاش قېرىنداش دۆلەتلەرنىڭ يېنىدا ئىكەنلىكىنى يەنە بىر قېتىم تەكىتلىدى.
ئەردوغان ئىسرائىلىيەنىڭ رايوندىكى تاجاۋۇزچىلىقىنىڭ ئالدىنى ئېلىش كېرەكلىكىنى تەكىتلەپ، بۇنىڭ ئۈچۈن خەلقئارا تىرىشچانلىقلارنى قوللاشنىڭ مۇھىملىقىنى ئەسكەرتتى.
ئەردوغان كوسوۋو باش مىنىستىرى ئالبىن كۇرتىنىمۇ قوبۇل قىلدى. كۆرۈشۈشتە تۈركىيە—كوسوۋو ئىككى تەرەپ مۇناسىۋىتى، رايون ۋە دۇنياغا دائىر مەسىلىلەر مۇزاكىرە قىلىندى.
ئەردوغان ئىككى دۆلەتنىڭ سودا ھەجىمىنى يوشۇرۇن كۈچىگە ماس ھالدا ئاشۇرۇش ئۈچۈن قەدەم تاشلاشنى داۋاملاشتۇرىدىغانلىقىنى، بىخەتەرلىك ۋە مۇداپىئە سانائىتى ساھەلىرىدىكى ھەمكارلىقنىمۇ ئىلگىرى سۈرىدىغانلىقىنى بىلدۈردى.
ئۇ تۈركىيەنىڭ كوسوۋونىڭ خەلقئارا جەمئىيەتتە ئۆزىگە تېگىشلىك ئورۇنغا ئېرىشىشىنى داۋاملىق قوللايدىغانلىقىنى، بالقان دۆلەتلىرى ئوتتۇرىسىدىكى دىيالوگنىمۇ قوللايدىغانلىقىنى ئېيتتى.
ئەردوغان بۇنىڭدىن كېيىن لىۋان باش مىنىستىرى نەۋۋاف سالام بىلەن كۆرۈشتى. ئۇچرىشىشتا، تۈركىيەنىڭ لىۋاندا ئۇزاق مۇددەتلىك تىنچلىق ۋە مۇقىملىق ئورنىتىش ئۈچۈن تىرىشچانلىق كۆرسىتىۋاتقانلىقىنى بىلدۈرگەن ئەردوغان، ب د ت نىڭ لىۋاندىكى ۋاقىتلىق ۋەزىپە ئۆتەش قىسمىنىڭ ئورنىنى ئالىدىغان خەلقئارا بىر كۈچكە ئېھتىياج بارلىقىنى ئېيتتى. ئۇ تۈركىيەنىڭ قىيىن كۈنلەردە لىۋان خەلقىنىڭ يېنىدا تۇرۇشنى، لىۋانغا ئىنسانپەرۋەرلىك ياردىمى ۋە داۋالاش ياردىمى ئەۋەتىشنى داۋاملاشتۇرىدىغانلىقىنى بىلدۈردى.
جۇمھۇر رەئىس ئەردوغان ئاخىرىدا گىرۇزىيە باش مىنىستىرى ئىراكلى كوباخىدزېنى قوبۇل قىلدى. كۆرۈشۈشتە تۈركىيە—گىرۇزىيە مۇناسىۋىتى، رايون ۋە دۇنياغا دائىر مەسىلىلەر مۇزاكىرە قىلىندى.
ئەردوغان تۈركىيەنىڭ 18 يىلدىن بۇيان گىرۇزىيەنىڭ ئەڭ چوڭ سودا شېرىكى بولۇپ كەلگەنلىكىدىن مەمنۇن ئىكەنلىكىنى بىلدۈردى. ئۇ سودا، قاتناش ۋە بىخەتەرلىكنى ئۆز ئىچىگە ئالغان نۇرغۇن ساھەدىكى ھەمكارلىقنى تېخىمۇ ئىلگىرى سۈرىدىغان قەدەملەرنى داۋاملىق تاشلايدىغانلىقىنى ئېيتتى.
ئەردوغان ئىككى دۆلەتنىڭ خەلقئارا سەھنىدىكى ھەمكارلىقىنى داۋاملاشتۇرۇشىنىڭ مۇھىملىقىنى تەكىتلەپ، تۈركىيە—گىرۇزىيە—ئەزەربەيجان ھەمكارلىق مېخانىزملىرىدىن ئەڭ ئۈنۈملۈك پايدىلىنىشنىڭمۇ بۇ دۆلەتلەرگە مەنپەئەت يەتكۈزىدىغانلىقىنى بىلدۈردى.
