نېفىت مەھسۇلاتلىرىنىڭ 90 پىرسەنتتىن ئارتۇقىنى رۇسىيەدىن ئىمپورت قىلىدىغان قىرغىزىستان، يىللىق 1 مىليون 500 مىڭ توننىدىن ئاشىدىغان ئېھتىياجىنى كاپالەتكە ئىگە قىلىش مەقسىتىدە تەمىنلەش تورىنى كېڭەيتىۋاتىدۇ.

مىنىستىرلار كابىنېتى ئېلان قىلغان يازما باياناتقا قارىغاندا، قىرغىزىستان پىرېزىدېنت مەھكىمىسىنىڭ باشلىقى ۋە مىنىستىرلار كابىنېتىنىڭ رەئىسى ئادىل‌بەك قاسىمبەلىيېۋنىڭ رىياسەتچىلىكىدە، ئىچكى بازاردىكى يېقىلغۇ ئەھۋالى ۋە نېفىت مەھسۇلاتلىرى بىلەن تەمىنلەش مەسىلىسى مۇزاكىرە قىلىنغان يىغىن ئۆتكۈزۈلگەن. يىغىندا ئىچكى بازارنىڭ بىخەتەرلىكىگە كاپالەتلىك قىلىش ئۈچۈن يولغا قويۇلغان تەدبىرلەر، ئاپتوموبىل يېقىلغۇسى ۋە نېفىت مەھسۇلاتلىرى ئىمپورتى، ئىستراتېگىيەلىك زاپاس ساقلاش ھەمدە ئاپتوموبىل يېقىلغۇسى ساھەسىدىكى شىركەتلەرنى دۆلەت تەرىپىدىن قوللاش مەسىلىلىرى تونۇشتۇرۇلغان.

قاسىمبەلىيېۋ بازاردىكى مۇقىملىقنى ساقلاش ۋە تەمىنلەش زەنجىرىدە ئاقساپ قېلىش كۆرۈلمەسلىكى ئۈچۈن جەرياننىڭ زىچ كۆزىتىلىۋاتقانلىقىنى تەكىتلىگەن. ئۇ دۆلەتنىڭ يىللىق نېفىت مەھسۇلاتلىرى ئېھتىياجىنىڭ ئوتتۇرا ھېساب بىلەن 1 مىليون 500 مىڭ توننىدىن كۆپ ئىكەنلىكىنى ئەسكەرتىپ، رۇسىيە، بېلارۇسىيە، خىتاي ۋە ئۆزبېكىستان بىلەن زىچ ھەمكارلىق ئېلىپ بېرىلىۋاتقانلىقىنى بىلدۈرگەن.

قاسىمبەلىيېۋ يەنە يۈز بېرىش ئېھتىماللىقى بولغان كىرىزىسلارنىڭ ئالدىنى ئېلىش ئۈچۈن يېڭى ئىمپورت كېلىشىملىرىنى ئىمزالاش ھەققىدە كۆرسەتمە بەرگەن. رۇسىيە بىلەن ئۇكرائىنا ئوتتۇرىسىدىكى جىددىيچىلىك سەۋەبىدىن قىرغىزىستاندا بېنزىن باھاسى كۆرۈنەرلىك ئۆسكەن بولۇپ، بەزى يېقىلغۇ پونكىتلىرىدا بىر ئاپتوموبىلغا ئەڭ كۆپ بولغاندا 30 لىتىر يېقىلغۇ سېتىش چەكلىمىسى يولغا قويۇلغان ئىدى.