ۋېنگىرىيەنىڭ يېڭى ھۆكۈمىتى نەچچە ئايدىن بۇيانقى قارشىلىقىدىن ۋاز كەچكەندىن كېيىن، ياۋروپا ئىتتىپاقى پەلەستىنلىكلەرگە زوراۋانلىق قىلغان ئىسرائىلىيەلىك كۆچمەنلەرگە قارىتىلغان ئىمبارگو تەدبىرلىرىنى تەستىقلاشقا تەييارلانماقتا.
ياۋروپا ئىتتىپاقىنىڭ تاشقى ئىشلار ۋە بىخەتەرلىك سىياسىتى ئالىي ۋەكىلى كايا كاللاس ۋېنگىرىيەدىكى ھۆكۈمەت ئۆزگىرىشىگە دائىر نەچچە ئايدىن بۇيانقى تۇيۇق يول ئاخىرلاشقاندىن كېيىن، پەلەستىنلىكلەرگە زوراۋانلىق قىلغان ئىسرائىلىيەلىك قانۇنسىز كۆچمەنلەرگە يېڭى ئېمبارفگو يۈرگۈزۈش مەسىلىسىدە كېلىشىم ھاسىل قىلىنىشىنىڭ كۈتۈلۈۋاتقانلىقىنى ئېيتتى.
كاللاس دۈشەنبە كۈنى ياۋروپا ئىتتىپاقى تاشقى ئىشلار مىنىستىرلىرى يىغىنىدىن ئىلگىرى بەرگەن باياناتىدا: «زوراۋانلىق قىلغان كۆچمەنلەرگە ئېمبارگو يۈرگۈزۈش مەسىلىسىدە سىياسىي كېلىشىم ھاسىل قىلىنىشىنى كۈتۈۋاتىمەن، بۇنى ئەمەلگە ئاشۇرالايمىز دەپ ئۈمىد قىلىمەن» دېدى.
ئىسرائىلىيە ئىشغالىيىتى ئاستىدىكى غەربىي قىرغاقتا كۈچىيىۋاتقان زوراۋانلىق ۋە قانۇنسىز كۆچمەنلەر نوقتىلىرىنىڭ كېڭىيىشىگە جاۋابەن تاشلانغان بۇ قەدەم، ئىلگىرى ۋېنگىرىيە باش مىنىستىرى ۋىكتور ئوربان تەرىپىدىن توسۇپ قىلىنغان ئىدى.
ئەمما ۋىكتور ئورباننىڭ رەقىبى پېتېر ماجيار ھاكىمىيەتنى ئۆتكۈزۈۋېلىشى بىلەن ۋېنگىرىيەنىڭ رەت قىلىش ھوقۇقىنىڭ ئەمەلدىن قېلىشىغا يول ئېچىلغاندەك كۆرۈنمەكتە.
ياۋروپا ئىتتىپاقى ئەمەلدارلىرى يەتتە نەپەر كۆچمەن ياكى كۆچمەنلەر تەشكىلاتىنىڭ قارا تىزىملىككە كىرگۈزۈلۈشىنىڭ پىلانلانغانلىقىنى ئېيتتى. ئىتتىپاق يەنە پەلەستىن قارشىلىق كۆرسىتىش تەشكىلاتى ھاماسنىڭ ۋەكىللىرىگىمۇ ئېمبارگو يۈرگۈزۈشكە تەييارلانماقتا.
ئىشغالىيەت ئاستىدىكى غەربىي قىرغاق 2023-يىلى ئۆكتەبىردە ئىسرائىلىيە غەززەگە قارشى باشلىغان قىرغىنچىلىق ئۇرۇشىدىن بۇيان، ھەم ئىسرائىلىيە ئەسكەرلىرى، ھەم قانۇنسىز كۆچمەنلەر چېتىشلىق بولغان ۋە ھەر كۈنى دېگۈدەك يۈز بېرىدىغان زوراۋانلىق ۋەقەلىرىگە سەھنە بولۇپ كەلمەكتە.
پەلەستىنلىك ئەمەلدارلار ۋە بىرلەشكەن دۆلەتلەر تەشكىلاتى، ئىشغالىيەت ئاستىدىكى غەربىي قىرغاقتا ئىسرائىلىيەلىك كۆچمەنلەر تەرىپىدىن ئېلىپ بېرىلغان ئۆلۈم خاراكتېرلىك ھۇجۇملارنىڭ ئۇرۇش باشلانغاندىن بۇيان زور دەرىجىدە كۆپەيگەنلىكىنى تىلغا ئالدى.
ياۋروپا ئىتتىپاقى ئىسرائىلىيەلىك كۆچمەنلەرگە جازا يۈرگۈزۈش مۇساپىسىنى داۋاملاشتۇرۇۋاتقان بولسىمۇ، ئەمما ئىتتىپاققا ئەزا دۆلەتلەر ئارىسىدا سودا مۇناسىۋىتىنى چەكلەشكە ئوخشاش ئىسرائىلىيەگە قارشى تېخىمۇ ئىلگىرىلىگەن قەدەملەرنى تاشلاش مەسىلىسىدە تېخىچە ئورتاق بىرلىك ھاسىل قىلىنغىنى يوق.
